ວັນທີ 23 ມິຖຸນາ 2021 ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ນຳພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມລະດັບສູງ ໜຶ່ງແລວ ໜຶ່ງເສັ້ນທາງ ສຳລັບພາກພື້ນອາຊີ-ປາຊີຟິກ ທີ່ຈັດຂຶ້ນໃນຮູບແບບທາງໄກ ພາຍໃຕ້ຫົວຂໍ້: “ສົ່ງເສີມການຮ່ວມມືໃນການຕ້ານພະຍາດລະບາດ ເພື່ອການຟື້ນຟູແບບຍືນຍົງ ໂດຍການເປັນປະທານຂອງທ່ານ ຫວັງ ອີ້ ທີ່ປຶກສາແຫ່ງລັດ ລັດຖະມົນຕີຕ່າງປະເທດແຫ່ງ ສປ ຈີນ ມີບັນດາຮອງນາຍົກລັດຖະມົນຕີ ລັດຖະມົນຕີຕ່າງປະເທດຂອງປະເທດຄູ່ຮ່ວມມື ແລະ ຕາງໜ້າອົງການຈັດຕັ້ງສາກົນ ໜຶ່ງແລວ ໜຶ່ງເສັ້ນທາງ ຈາກພາກພື້ນອາຊີ-ປາຊີຟິກເຂົ້າຮ່ວມ.
ກອງປະຊຸມໄດ້ແລກຄຳຄິດເຫັນກ່ຽວກັບການສະກັດກັ້ນ ເຝົ້າລະວັງ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ປຶກສາຫາລືຜົນກະທົບ ແລະ ມາດຕະການແກ້ໄຂສິ່ງທ້າທາຍຕ່າງໆທີ່ເກີດຈາກພະຍາດດັ່ງກ່າວ ເປັນຕົ້ນ ການຮ່ວມມືການສະໜອງວັກຊິນໃຫ້ພຽງພໍ ແລະ ທົ່ວເຖິງ ລວມໄປເຖິງມາດຕະການຊ່ວຍເຫຼືອຂະແໜງເສດຖະກິດຂະໜາດນ້ອຍ ແລະ ກາງ ທີ່ໄດ້ຮັບຜົນກະທົບຢ່າງໜັກໜ່ວງຈາກການແຜ່ລະບາດພະຍາດໂຄວິດ-19 ໃນຊຸມຊົນ.
ກອງປະຊຸມ ຍັງໄດ້ປຶກສາຫາລືທິດທາງການຮ່ວມມືໃນຕໍ່ໜ້າ ໂດຍເນັ້ນໃສ່ການຮ່ວມມືກັນສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການຟື້ນຟູເສດຖະກິດສັງຄົມ ຢູ່ໃນບັນດາປະເທດຄູ່ຮ່ວມຂອງຂອບການຮ່ວມມື ໜຶ່ງແລວ ໜຶ່ງເສັ້ນທາງ ກໍຄືພາກພື້ນອື່ນໆໃນອານະຄົດ.
ໃນກອງປະຊຸມຄັ້ງນີ້ ທ່ານ ສະເຫຼີມໄຊ ກົມມະສິດ ໄດ້ຍົກໃຫ້ເຫັນສະພາບການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ແລະ ບັນດາມາດຕະການສໍາຄັນຕ່າງໆທີ່ລັດຖະບານໄດ້ວາງອອກ ເພື່ອຮັບມື ແລະ ຕ້ານກັບພະຍາດຮ້າຍແຮງດັ່ງກ່າວໃນແຕ່ລະໄລຍະ. ທ່ານໄດ້ຖືໂອກາດສຳຄັນນີ້ ສະແດງຄວາມຂອບໃຈຕໍ່ການຊ່ວຍເຫຼືອອັນລໍ້າຄ່າຂອງ ສປ ຈີນ ກໍຄືບັນດາປະເທດເພື່ອນມິດ ປະເທດຄູ່ຮ່ວມມື ແລະ ບັນດາອົງການຈັດຕັ້ງສາກົນ ໃນການຮັບມືສະກັດກັ້ນ ຄວບຄຸມ ແລະ ແກ້ໄຂການແຜ່ລະບາດຂອງພະຍາດດັ່ງກ່າວຢູ່ ສປປ ລາວ.
ກອງປະຊຸມຄັ້ງນີ້ ໄດ້ສະໜັບສະໜູນ 2 ຂໍ້ລິເລີ່ມໃໝ່ຂອງ ສປ ຈີນ ຄື: “ຂໍ້ລິເລີ່ມວ່າດ້ວຍການຮ່ວມມືດ້ານວັກຊິນຕ້ານໂຄວິດ-19 ສໍາລັບຄູ່ຮ່ວມມື ໜຶ່ງແລວ ໜຶ່ງເສັ້ນທາງ” ແລະ “ຂໍ້ລິເລີ່ມວ່າດ້ວຍການພັດທະນາສີຂຽວສໍາລັບຄູ່ຮ່ວມມືໜຶ່ງແລວໜຶ່ງເສັ້ນທາງ” ເຊິ່ງເປັນຂໍ້ລິເລີ່ມສຳຄັນທີ່ປະກອບສ່ວນສົ່ງເສີມການພັດທະນາເສດຖະກິດສີຂຽວ ພະລັງງານສະອາດ ການລົງທຶນທີ່ເປັນມິດຕໍ່ສິ່ງແວດລ້ອມ ແລະ ຂົງເຂດການເງິນທີ່ທັນສະໄໝ ກໍຄືການຈັດຕັ້ງປະຕິບັດວາລະ 2020 ເພື່ອການພັດທະນາແບບຍືນຍົງ.
# ຂ່າວ – ພາບ: ລັດເວລາ