ອີງຕາມຂໍ້ມູນບົດສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ວຽກຈຸດສຸມ 6 ເດືອນທ້າຍປີ 2021 ທີ່ທ່ານ ນາງ ບົວວອນ ສຸກລາແສງ ຫົວໜ້າພະແນກແຜນການ ແລະ ການລົງທຶນ ນະຄອນຫຼວງວຽງຈັນ (ນວ) ລາຍງານຢູ່ໃນກອງປະຊຸມອົງການປົກຄອງ ນວ ຄັ້ງທີ 2 ຈັດຂຶ້ນວັນທີ 18 ມິຖຸນາ 2021 ວ່າ: ຄາດໝາຍການຂະຫຍາຍຕົວຂອງລວມຍອດຜະລິດຕະພັນພາຍໃນ (GDP) ປີ 2021 ຂອງ ນວ ຈະຂະຫຍາຍຕົວຢູ່ໃນລະດັບ 5,38% (ແຜນການວາງໄວ້ 6,5%) ຈະມີມູນຄ່າໃນປີປະມານ 56.039,92 ຕື້ກີບ (ແຜນການວາງໄວ້ 59.270 ຕື້ກີບ) ສະເລ່ຍຕໍ່ຫົວຄົນຈະບັນລຸໄດ້ 6.170,09 ໂດລາສະຫະລັດ (ແຜນການວາງໄວ້ 6.610 ໂດລາ) ໃນນັ້ນຂະແໜງກະສິກຳ-ປ່າໄມ້ ຂະຫຍາຍໃນລະດັບ 3,63% ກວມເອົາ 14,46% ຂອງ GDP ຂະແໜງອຸດສາຫະກຳ ແລະ ກໍ່ສ້າງ ຂະຫຍາຍຕົວໃນລະດັບ 6,41% ກວມເອົາ 49,57% ຂອງ GDP ຂະແໜງບໍລິການ ແລະ ການຄ້າຂະຫຍາຍຕົວໃນລະດັບ 4,72% ກວມເອົາ 35,97% ຂອງ GDP.
ການຈັດຕັ້ງປະຕິບັດແຜນງົບປະມານແຫ່ງລັດ ເຖິງວ່າການຈັດຕັ້ງປະຕິບັດປີ 2021 ຈະພົບຫຼາຍສິ່ງທ້າທາຍໃນຫຼາຍດ້ານ ແຕ່ການນຳ ນວ ໄດ້ເອົາໃຈໃສ່ໃນການຄົ້ນຄວ້າບັນດານະໂຍບາຍ ແລະ ສິ່ງອຳນວຍຄວາມສະດວກຕ່າງໆ ເພື່ອກະຕຸ້ນການຈັດເກັບລາຍຮັບ ແລະ ຄຸ້ມຄອງລາຍຈ່າຍຢ່າງສົມເຫດສົມຜົນ ເຊິ່ງສະແດງອອກໃນ 6 ເດືອນຕົ້ນປີ 2021 ຄື: ຕົວເລກການເກັບລາຍຮັບເຂົ້າງົບປະມານ (ທ້ອງຖິ່ນ ແລະ ສູນກາງ) ທີ່ລັດຖະບານມອບໃຫ້ ນວ ຜ່ານການຈັດຕັ້ງປະຕິບັດເຫັນວ່າສາມາດປະຕິບັດໄດ້ 1.976,5 ຕື້ກີບ ທຽບໃສ່ແຜນການປີ 5.094,87 ຕື້ກີບ ເທົ່າກັບ 36,9% ໃນນັ້ນ:ລາຍຮັບຂອງທ້ອງຖິ່ນປະຕິບັດໄດ້ 488,6 ຕື້ກີບ ທຽບໃສ່ແຜນການປີ 1.976,5 ຕືກີບ ເທົ່າກັບ 35,02% ໃນນີ້ ລາຍຮັບພາສີ-ອາກອນ 467,3 ຕື້ກີບ ແລະ ລາຍຮັບບໍ່ແມ່ນພາສີ-ສ່ວຍສາອາກອນ 21,3 ຕື້ກີບ ລາຍຮັບພູດສູນກາງປະຕິບັດໄດ້ 1.487,9 ຕື້ກີບ ທຽບໃສ່ແຜນການປີ 3.700 ຕື້ກີບ ເທົ່າກັບ 38,35% ໃນນີ້ລາຍຮັບພາສີ-ສ່ວຍສາອາກອນ 1.487,9 ຕື້ກີບ ດ້ານລາຍຈ່າຍ 6 ເດືອນຕົ້ນປີ 2021 ປະຕິບັດໄດ້ 195,58 ຕື້ກີບ ທຽບໃສ່ແຜນການປີ 509,08 ຕື້ກີບ ເທົ່າກັບ 38,41% ໃນນັ້ນເງິນບໍລິຫານຂອງລັດ 9,56 ຕື້ກີບ ເງິນເດືອນ ແລະ ເງິນນະໂຍບາຍ 166 ຕື້ກີບ ເງິນບໍລິຫານ ດັດສົມ-ສົ່ງເສີມ ຊື້ໃໝ່ ເງິນແຮ ແລະ ອື່ນໆ 1,74 ຕື້ກີບ ລາຍຈ່າຍການລົງທຶນຂອງລັດ 18,28 ຕື້ກີບ ດຸ່ນດ່ຽງໃຫ້ສູນກາງ 293,02 ຕື້ກີບ ທຽບໃສ່ແຜນການປີ 840,92 ຕື້ກີບ ເທົ່າກັບ 34,84%.
# ຂ່າວ-ພາບ: ສົມສະຫວັນ