ຖືວ່າເປັນຂ່າວດີອີກວັນ ທີ່ທຸກຄົນລໍຟັງກ່ຽວກັບການລະບາດຂອງພະຍາດໂຄວິດ-19 ເຊິ່ງວັນນີ້ກໍເປັນວັນທີ 9 ແລ້ວ ທີ່ລາວເຮົາຍັງຢັ້ງຢືນບໍ່ພົບຜູ້ຕິດເຊື້ອເພີ່ມ ແຕ່ເຖິງຢ່າງໃດກໍຕາມ ຮຽກຮ້ອງໃຫ້ພໍ່ແມ່ປະຊາຊົນຢ່າສະລ່າໃຈ ຈົ່ງພ້ອມກັນສືບຕໍ່ເອົາໃຈໃສ່ຈັດຕັ້ງປະຕິບັດບັນດາມາດຕະການຕ່າງໆຂອງຄະນະສະເພາະກິດ ໂດຍສະເພາະ ຄຳສັ່ງເລກທີ 06/ນຍ ວາງອອກຢ່າງເຄັ່ງຄັດ ຈົນຮອດວັນທີ 3 ພືດສະພາ 2020 ເພື່ອຮັບປະກັນເຮັດໃຫ້ການສະກັດກັ້ນ ແລະ ການແຜ່ລະບາດຂອງເຊື້ອພະຍາດໂຄວິດ-19 ຢູ່ ສປປ ລາວ ໝົດໄປ.
ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈຳການຄະນະສະເພາະກິດ ຄວບຄຸມພະຍາດໂຄວິດ-19 ພ້ອມດ້ວຍຄະນະ ໄດ້ກ່າວຖະແຫຼງຕໍ່ສື່ມວນຊົນໃນວັນທີ 21 ເມສາ 2020 ທີ່ສູນປະຕິບັດງານ ຄະນະສະເພາະກິດຄວບຄຸມໂຄວິດ-19 ວ່າ: ໃນວັນທີ 20 ເມສາ 2020 ໄດ້ເກັບຕົວຢ່າງມາກວດທັງໝົດ 29 ຄົນ ໃນນັ້ນມີຜູ້ສຳຜັດໃກ້ຊິດກັບຜູ້ຕິດເຊື້ອ 14 ຄົນ ແລະ ກໍລະນີມີອາການສົງໄສ 15 ຄົນ ເຊິ່ງໃນຈຳນວນ 29 ຄົນທີ່ມາກວດນັ້ນ ມີນະຄອນຫຼວງວຽງຈັນ 14 ຄົນ ແລະ ຕ່າງແຂວງ 15 ຄົນ ເຊິ່ງຜົນການກວດທັງໝົດ 29 ກໍລະນີ ແມ່ນບໍ່ພົບເຊື້ອ.
ນັບແຕ່ເດືອນມັງກອນ ຮອດວັນທີ 20 ເມສາ 2020 ໄດ້ເກັບຕົວຢ່າງມາກວດທັງໝົດ ມີ 1.378 ຄົນ ກວດພົບເຊື້ອທັງໝົດ 19 ຄົນ (09 ມື້ແລ້ວທີ່ບໍ່ມີຜູ້ຕິດເຊື້ອເພີ່ມ) ຈຳນວນຜູ້ສຳຜັດໃກ້ຊິດກັບຜູ້ຕິດເຊື້ອທັງໝົດ ທີ່ໄດ້ຕິດຕາມແຕ່ວັນທີ 9 ມີນາ – 20 ເມສາ 2020 ມີ 313 ຄົນ ໝົດກຳນົດຕິດຕາມທັງໝົດ 300 ຄົນ ຍັງສືບຕໍ່ຕິດຕາມທັງໝົດ 13 ຄົນ ເຊິ່ງຕິດຕາມຢູ່ນະຄອນຫຼວງວຽງຈັນ (ໃນນັ້ນ 8 ຄົນ ແມ່ນຕິດຕາມຢູ່ໂຮງໝໍ 103 ແລະ 05 ຄົນ ຕິດຕາມຢູ່ເຮືອນ) ໂດຍສະເລ່ຍ ຍັງອີກ 04 ມື້ຈຶ່ງຄົບກຳນົດຕິດຕາມ 14 ວັນ.
ສຳລັບການຕິດຕາມປີ່ນປົວຄົນເຈັບຢູ່ໂຮງໝໍ ປັດຈຸບັນຍັງມີຜູ້ຕິດເຊື້ອທີ່ນອນຢູ່ໂຮງໝໍ 17 ຄົນ ເຊິ່ງໃນຈຳນວນ 03 ຄົນຢູ່ໂຮງໝໍແຂວງຫຼວງພະບາງ ເຫັນວ່າມີອາການຄົງຕົວ ຂັ້ນເບົາບາງ ແລະ ຍັງຕິດຕາມການກວດຫາເຊື້ອເພື່ອຢັ້ງຢືນ. ສ່ວນຈຳນວນ 14 ຄົນຢູ່ໂຮງໝໍມິດຕະພາບ ທັງໝົດເຫັນວ່າມີອາການເບົາບາງ ແລະ ຍັງຕິດຕາມການກວດຫາເຊື້ອເພື່ອຢັ້ງຢືນ ເຊິ່ງມື້ວານນີ້ ໄດ້ເກັບຕົວຢ່າງມາກວດ ແລະ ມື້ນີ້ກໍໄດ້ເກັບຕົວຢ່າງມາກວດຊ້ຳອີກຄັ້ງ ຄາດວ່າຈະມີຜູ້ບໍ່ພົບເຊື້ອ 2 ຄັ້ງຕໍ່ກັນ ແລະ ຈະມີຄົນອອກໂຮງໝໍຕື່ມອີກໃນໄວໆນີ້. ປັດຈຸບັນ ທົ່ວປະເທດຍັງມີສູນຈຳກັດບໍລິເວນທັງໝົດ 554 ສູນ ມີຜູ້ຈຳກັດບໍລິເວນຢູ່ສູນ 2.721 ຄົນ ແລະ ມີຜູ້ຈຳກັດບໍລິເວນຢູ່ເຮືອນ 2.087 ຄົນ.
ທ່ານຮອງລັດຖະມົນຕີກະຊວງສາທາລະນະສຸກ ໄດ້ເນັ້ນຕື່ມວ່າ: ເພື່ອສືບຕໍ່ໃຫ້ສະພາບການລະບາດຂອງພະຍາດໂຄວິດຜ່ອນຄາຍລົງໄປເລື້ອຍໆ ເຮັດໃຫ້ພວກເຮົາສາມາດກັບມາດຳລົງຊີວິດຕາມປົກກະຕິໄດ້ ໃນຕໍ່ໜ້ານີ້ ຈຶ່ງຮຽກຮ້ອງໃຫ້ພໍ່ແມ່ປະຊາຊົນບັນດາເຜົ່າ ອົງການຈັດຕັ້ງທຸກພາກສ່ວນ ຈົ່ງສືບຕໍ່ ຮ່ວມມື ເປັນເຈົ້າການຈັດຕັ້ງປະຕິບັດຄຳສັ່ງ ເລກທີ 06/ນຍ ແລະ ບັນດາຂໍ້ແນະນຳຕ່າງໆຢ່າງເຂັ້ມງວດ ສະເພາະມື້ນີ້ ກໍສັງເກດເຫັນວ່າໃນນະຄອນຫຼວງວຽງຈັນ ມີການສັນຈອນຂອງລົດລາພາຫະນະເປັນຈຳນວນຫຼາຍ ຈຶ່ງຂໍໃຫ້ພໍ່ແມ່ປະຊາຊົນ ສືບຕໍ່ຈຳກັດຕົນເອງຢູ່ເຮືອນ ແລະ ຂໍໃຫ້ຄະນະເຈົ້າໜ້າທີ່ກວດກາຄວາມເປັນລະບຽບຮຽບຮ້ອຍຄືໄລຍະຜ່ານມາ ຍ້ອນວ່າຄຳສັ່ງ 06/ນຍ ຍັງສືບຕໍ່ປະຕິບັດຈົນຮອດວັນທີ 3 ພຶດສະພາ 2020.