ທ່ານ ຖາວອນ ອາດສະໝຸດ ຫົວໜ້າພະແນກທຸລະກິດພະລັງງານ ແລະ ບໍ່ແຮ່ ສະມາຄົມນັກທຸລະ ກິດໜຸ່ມແຫ່ງຊາດລາວ ປະທານກຸ່ມບໍລິສັດລ່ອງແຈ້ງພັດທະນາ ໃຫ້ສຳພາດກ່ຽວການໃຫ້ຄວາມຊ່ວຍ ເຫຼືອແຮງງານລາວທີ່ຕົກຄ້າງຢູ່ຕ່າງປະເທດໃນວັນທີ 21 ເມສາ 2020 ວ່າ: ມື້ນີ້ ຂ້າພະເຈົ້າຮູ້ສຶກເປັນກຽດ ແລະ ພາກພູມໃຈເປັນຢ່າງຍິ່ງ ທີ່ໄດ້ມີສ່ວນຮ່ວມ ແລະ ປະກອບສ່ວນຊ່ວຍພັກ-ລັດຖະບານ ກໍຄືການຈັດຕັ້ງຜັນຂະຫຍາຍຄຳສັ່ງຂອງທ່ານ ນາຍົກລັດຖະມົນຕີ ເລກທີ 06/ນຍ ແລະ ບັນດາມາດຕະການ ແລະ ນະໂຍບາຍຕ່າງໆຂອງລັດຖະບານ ຕິດພັນກັບການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ -19 ເຊິ່ງວຽກງານດັ່ງກ່າວ ແມ່ນໜ້າທີ່ຂອງປວງຊົນລາວທັງຊາດ ກໍຄືທຸກພາກສ່ວນໃນທົ່ວສັງຄົມ ທີ່ຈະຕ້ອງໄດ້ຮ່ວມແຮງຮ່ວມໃຈເພີ່ມທະວີຄວາມສາມັກຄີເປັນປຶກແຜ່ນ ເປັນຈິດໜຶ່ງໃຈດຽວກັນ ເພື່ອຕໍ່ສູ້ກັບສົງຄາມທີ່ບໍ່ມີຕົວຕົນໃນຄັ້ງນີ້ ໃຫ້ໄດ້ຮັບໄຊຊະນະຢ່າງຈົບງາມ.
ດັ່ງນັ້ນ ຂ້າພະເຈົ້າ ຂໍຕາງໜ້າສະມາຄົມນັກທຸລະກິດໜຸ່ມແຫ່ງຊາດລາວ ກໍຄືໃນນາມສ່ວນຕົວ ຂໍເປັນສ່ວນໜຶ່ງເພື່ອປະກອບສ່ວນຕາມທ່າແຮງບົ່ມຊ້ອນຂອງຕົນເອງ ຊ່ວຍສັງຄົມໃນຍາມຫຍຸ້ງຍາກສັບສົນ ເພື່ອຈັດສົ່ງແຮງງານລາວຈາກຕ່າງປະເທດກັບຄືນສູ່ບ້ານເດີມຂອງເຂົາເຈົ້າ ເຊີ່ງມີລວມມີຈຳນວນຫຼາຍຮ້ອຍຄົນ ແລະ ຈະໄດ້ເຮັດໃຫ້ເຂົາເຈົ້າໄດ້ມີໂອກາດກັບຄືນມາປະເທດ ຢູ່ກັບຄອບຄົວພໍ່ແມ່ດ້ວຍຄວາມປອດໄພ.
ສຳລັບແຮງງານດັ່ງກ່າວທີ່ກັບມານີ້ ລ້ວນແລ້ວແຕ່ເປັນໄວໜຸ່ມທີ່ເປັນກຳລັງແຮງທີ່ສຳຄັນຂອງປະເທດຊາດ ກໍຄືສັງຄົມ ປັດຈຸບັນ ປະເທດເຮົາກໍເປັນປະເທດໜຶ່ງທີ່ມີການລົງທຶນໃນຫຼາຍດ້ານ ເຊິ່ງຍັງຕ້ອງການແຮງງານເປັນນວນຫຼວງຫຼາຍ ດັ່ງນັ້ນ ກໍຈະເປັນການດີ ເພື່ອໃຫ້ແຮງງານດັ່ງກ່າວໄດ້ມີສ່ວນຮ່ວມ ແລະ ປະກອບເຂົ້າໃນວຽກງານຕ່າງໆຢ່າງມີປະສິດທິຜົນ ເຊິ່ງສະມາຄົມນັກທຸລະກິດໜຸ່ມພວກເຮົາ ກໍມີການດຳເນີນທຸລະກິດຫຼາຍກິດຈະການທີ່ຍັງມີຄວາມຕ້ອງການແຮງງານທີ່ໜຸ່ມແໜ້ນເປັນຈຳນວນຫຼວງຫຼາຍເຊັ່ນກັນ ແລະ ອີກດ້ານໜຶ່ງ ກໍເພື່ອເປັນການປະຕິບັດຕາມແນວທາງນະໂຍບາຍຂອງພັກ ແລະ ລັດຖະບານ ເພື່ອສົ່ງເສີມການມີວຽກເຮັດງານທຳຂອງແຮງງານລາວ ແລະ ເປັນການພັດທະນາສີມືແຮງງານໂດຍຜ່ານວຽກງານຕົວຈິງໃຫ້ຫຼາຍຂຶ້ນ ມີລາຍໄດ້ ມີຊີວິດການເປັນຢູ່ທີ່ດີຂຶ້ນ ແນໃສ່ໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ.
ໃນຕໍ່ໜ້າ ສະມາຄົມນັກທຸລະກິດໜຸ່ມພວກເຮົາຈະໄດ້ສືບຕໍ່ເພີ່ມຄວາມເອົາໃຈໃສ່ຄົ້ນຄວ້າ ແລະ ປຶກສາຫາລືຮ່ວມກັບບັນດາຫົວໜ່ວຍນັກທຸລະກິດຕ່າງໆ ເພື່ອໝູນໃຊ້ແຮງງານຈຳນວນດັ່ງກ່າວຕາມຄວາມຮູ້ຄວາມສາມາດຂອງແຕ່ລະບຸກຄົນ ເຂົ້າໃນແຕ່ລະວຽກງານໃຫ້ເໝາະສົມ ໂດຍເປັນກຳລັງແຮງໜຶ່ງປະກອບເຂົ້າໃນວຽກງານດ້ານຕ່າງໆໃຫ້ໄດ້ຮັບຜົນດີ ມີຄຸນນະພາບ ແລະ ປະສິດທິຜົນສູງ ເພື່ອຫຼຸດຜ່ອນການຫຼັ່ງໄຫຼຂອງແຮງງານລາວ ໄປອອກແຮງງານທີ່ບໍ່ຖືກຕ້ອງຢູ່ຕ່າງປະເທດຕື່ມ ພ້ອມນັ້ນ ກໍເປັນການປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຂອງພວກເຮົາ ໃຫ້ຈະເລີນຮຸ່ງເຮືອງເທື່ອລະກ້າວ.