ວັນທີ 11 ມິຖຸນາ 2021 ເຈົ້າໜ້າທີ່ພະແນກສັນຕິບານ ປກສ ເມືອງຫາດຊາຍຟອງ ນະຄອນຫຼວງວຽງຈັນ ໄດ້ອອກກວດກາລາດຕະເວນຕາມຊາຍແດນແມ່ນ້ຳຂອງ ເພື່ອຕິດຕາມເບີ່ງສະພາບ ແລະ ການລັກລອບນຳໃຊ້ເຮືອຫາປາຕາມແມ່ນ້ຳຂອງທີ່ບໍ່ຖືກຕາມລະບຽບ ຕາມຄຳສັ່ງຂອງນາຍົກລັດຖະມົນຕີ ແລະ ແຈ້ງການຫ້ອງວ່າການສຳນັກງານນາຍົກລັດຖະມົນຕີ ກ່ຽວກັບມາດຕະການສືບຕໍ່ຈັດຕັ້ງປະຕິບັດ ຂໍ້ຫ້າມ ແລະ ມາດຕະການຜ່ອນຜັນ ການອະນຸຍາດນໍາໃຊ້ເຮືອຫາປາຕາມລຳແມ່ນ້ຳຂອງ ເຂດຊາຍແດນລະຫວ່າງປະເທດໃນໄລຍະເວລາ 8.00 ໂມງເຊົ້າ ຫາ 1600 ໂມງແລງທີ່ກຳນົດ ໂດຍໃຫ້ອົງການປົກຄອງທ້ອງຖິ່ນ ສົມທົບກັບກຳລັງ ປກສ ປກຊ ຢູ່ແຕ່ລະພື້ນທີ່ອອກລະບຽບການຄຸ້ມຄອງ ພ້ອມກຳນົດຈໍານວນເຮືອຫາປາ ແລ້ວຈື່ງອອກອະນຸຍາດ ໂດຍກ່ອນຈະອອກໄປ ກໍຕ້ອງໄດ້ບັນທຶກການປ່ອຍອອກ ແລະ ບັນທຶການເຂົ້າມາຈອດ ພ້ອມໃຫ້ມີການຕິດຕາມກວດກາການຈັດຕັ້ງປະຕິບັດຢ່າງໃກ້ຊິດ ແລະ ເຂັ້ມງວດ
ດັ່ງນັ້ນ ເຈົ້າໜ້າທີ່ ປກສ ຈື່ງໄດ້ຈັດຕັ້ງປະຕິບັດ ແລະ ອອກກວດກາຢ່າງເຂັ້ມງວດໃນສະຖານທີ່ດັ່ງກ່າວ ເຊີ່ງພົບເຫັນເຮືອຫາປາຂອງຊາວປະມົງຈຳນວນ 9 ຄົນທີ່ລະເມີດຂໍ້ຫ້າມຂອງແຈ້ງການດັ່ງກ່າວ ຄືອອກເຮືອຫາປາກ່ອນໂມງທີ່ກຳນົດ ດັ່ງນັ້ນ ຈື່ງຖືວ່າຜິດຕໍ່ລະບຽບການ ແລະ ຄຳສັ່ງຂອງທ່ານຫົວໜ້າກອງບັນຊາການ ປກສ ເມືອງຫາດຊາຍຟອງ ກ່ຽວກັບຄວາມເຂັ້ມງວດການຄຸ້ມຄອງນຳໃຊ້ເຮືອປະເພດຕ່າງໆຕາມແມ່ນ້ຳຂອງ ເຊີ່ງຖືວ່າໃນການປະຕິບັດມາດຕະການຕໍ່ໂມງເວລາຂອງຜູ້ນຳໃຊ້ເຮືອ ແມ່ນຜິດລະບຽບ ທັງນີ້ກໍເພື່ອເຂັ້ມງວດໃນການກວດກາເພື່ອປ້ອງກັນພະຍາດໂຄວິດ ໄລຍະທີ່ມີການລະບາດຢູ່ໃນປັດຈຸບັນ
ພ້ອມນີ້ ເຈົ້າໜ້າທີ່ ປກສ ເມືອງຫາດຂາຍຟອງ ຈື່ງເຊີນເອົາກຸ່ມຜູ້ນຳໃຊ້ເຮືອຫາປາທີ່ປະຕິບັດຜິດຕໍ່ລະບຽບນັ້ນ ຈຳນວນ 9 ຄົນ ຄື ບ້ານຫາດດອກແກ້ວ 6 ຄົນ ສົມໂຮງ 2 ຄົນ ແລະ ຫົວຫ້າ 1 ຄົນ ຂື້ນມາເຮັດບົດບັນທຶກສຶກສາອົບຮົມເພື່ອກ່າວເຕືອນ ແລະ ປັບໄໝຕາມລະບຽບການ ພ້ອມໃຫ້ຢຸດການເດີນເຮືອຊົ່ວຄາວເປັນເວລາ 7 ວັນ ຫາກຍັງມີການລະເມີດຝ່າຝືນອີກ ພົບເຫັນຄັ້ງທີສອງ ຈະປັບໄໝໜື່ງລ້ານກີບ ພ້ອມຢຶດເຮືອທັນທີ
ໃນວັນທີ 14 ມິຖຸນາ 2021 ເຈົ້າໜ້າທີ່ພະແນກສັນຕິບານ ປກສ ເມືອງຫາດຊາຍຟອງນະຄອນຫຼວງວຽງຈັນ ກໍ່ໄດ້ສືບຕໍ່ລົງກວດກາສະພາບລຽບຕາມຊາຍແດນເພື່ອກວດກາຜູ້ນຳໃຊ້ເຮືອ ແຕ່ກໍຍັງພົບເຫັນຄືເກົ່າ ແຕ່ຄັ້ງນີ້ ແມ່ນຜູ້ນຳໃຊ້ເຮືອອອກຫາປາ ປະຕິບັດຜິດລະບຽບ ອອກກ່ອນໂມງເວລາເຊັ່ນເຄີຍ ຈຳນວນ 19 ຄົນ ໃນນັ້ນ ບ້ານຊຽງຄວນ 3 ຄົນ ສິມມະໂນເໜືອ 8 ຄົນ ສິມມະໂນໃຕ້ 1 ຄົນ ແລະ ບ້ານນາລ້ອງ 7 ຄົນ ດັ່ງນັ້ນ ເຈົ້າໜ້າທີ່ຈື່ງໄດ້ລວບລວມຕົວທັງໝົດມາທີ່ກອງບັນຊາການເພື່ອເຮັດໜ້າທີ່ສຶກສາອົບຮົບ ປັບໄໝ ກ່າວເຕືອນ ແລະ ເພື່ອບໍ່ໃຫ້ມີການປະຕິບັດແບບເກົ່ານີ້ອີກຕໍ່ໄປ .