ວັນທີ 11 ມິຖຸນາ 2021 ຫ້ອງການກະສິກຳ ແລະ ປ່າໄມ້ ເມືອງຫາດຊາຍຟອງ ນະຄອນຫຼວງວຽງຈັນ ຈັດກິດຈະກຳປູກຕົ້ນໄມ້ລຽບຕາມແຄມທາງ ຖະໜົນທ່າເດື່ອ ໃນໂອກາດວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ຢູ່ທີ່ໜ້າສວນນໍ້າອິນແປງ ບ້ານດົງໂພສີ ເຂົ້າຮ່ວມໂດຍມີທ່ານ ບຸນເພັງ ສີນະວົງພອນ ເຈົ້າເມືອງຫາດຊາຍຟອງ ທ່ານຮອງເຈົ້າເມືອງ ພ້ອມດ້ວຍຫ້ອງການ ແລະ ພາກສ່ວນກ່ຽວຂ້ອງເຂົ້າຮ່ວມ
ໂອກາດດັ່ງກ່າວ ທາງຫ້ອງການກະສິກຳ ແລະ ປ່າໄມ້ເມືອງຫາດຊາຍຟອງ ກໍໄດ້ລາຍງານແຈ້ງໃຫ້ຊາບຕໍ່ກັບລາຍລະອຽດ ແລະ ແຜນການໃນການຈັດຕັ້ງປະຕິບັດປູກໄມ້ ໃນເດືອນມິຖຸນາປີ 2021 ທົ່ວເມືອງຫາດຊາຍຟອງ ເຊີ່ງມີເນື້ອທີ່ທັງໝົດ 10 ເຮັກຕາ ເຊີ່ງໃນນັ້ນແມ່ນຈະປູກເພື່ອຂະຫຍາຍພື້ນທີ່ສີຂຽວ ແລະ ຮັກສາສິ່ງແວດລ້ອມ ອີກສ່ວນໜື່ງແມ່ນຈະປູກເພື່ອເປັນສິນຄ້າ ໄມ້ອຸດສາຫະກຳປະມານ 2000 ຕົ້ນ ທັງນີ້ກໍເພື່ອແນໃສ່ຮັບປະກັນການປະຕິບັດໃຫ້ບັນລຸໄດ້ຕາມທິດສີຂຽວ ແລະ ນະໂຍບາຍການສ້າງນະຄອນຫຼວງວຽງຈັນໃຫ້ໜ້າຢູ່ ດ້ວຍການປູກຕົ້ນໄມ້ສອງຕົ້ນຕໍ່ຄົນຕໍ່ປີ ເຊີ່ງແມ່ນພັນທະຂອງປະຊາຊົນຊາວນະຄອນຫຼວງວຽງຈັນ
ສຳລັບຕົ້ນໄມ້ທີ່ປູກລຽບຕາມແຄມທາງຖະໜົນທ່າເດື່ອ ສ່ວນໃຫຍ່ຈະເປັນຕົ້ນກະເລົາ ເຊີ່ງປູກແຕ່ເຂດບ້ານຫາດຊາຍຂາວ ຍາວລົງມາຈົນຮອດຂອບເຂດທີ່ກຳນົດໄວ້ ແຕ່ຈະເນັ້ນປູກໃນຈຸດບ່ອນດິນເປົ່າຫວ່າງເປັນສ່ວນໃຫຍ່ ພາຍຫຼັງປູກສຳເລັດ ກໍຈະມອບໃຫ້ເປັນໜ້າທີ່ຂອງສຳນັກງານຫ້ອງການ ແລະ ບ້ານ ໃນການຈັດຕັ້ງປະຕິບັດເພື່ອປົກປັກຮັກສາຄຸ້ມຄອງ ສຳລັບຜູ້ທີ່ມີເນື້ອທີ່ດິນແຄມທາງ ກໍສາມາດປູກໄດ້ຕາມເງື່ອນໄຂ ສຳລັບປີຜ່ານມາ ເມືອງຫາດຊາຍຟອງຜະລິດເບ້ຍໄມ້ໄດ້ 32 ພັນກວ່າເບ້ຍ ພາກລັດຜະລິດໄດ້ 8000 ເບ້ຍ ເອກະຊົນຜະລິດໄດ້ 24 ພັນກວ່າເບ້ຍ ຊະນິດໄມ້ມີ ໄມ້ອຸດສາຫະກຳ ແລະ ໄມ້ປະດັບ ແຜນປູກ 7 ເຮັກຕາ ໃນນັ້ນແມ່ນໄດ້ປູກຢູ່ເສັ້ນທາງ 450 ປີ ຈຳນວນ 220 ຕົ້ນ ເປັນຕົ້ນໄມ້ປະດັບ.
