ຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂການແຜ່ລະບາດເຊື້ອພະຍາດໂຄວິດ-19 ນະຄອນຫຼວງວຽງຈັນ ສົມທົບກັບສະມາຄົມໂຮງແຮມ ແລະ ຄະນະອິ່ມບຸນເມດຕາທຳ ນໍາເອົາຊຸດເຄື່ອງບໍລິໂພກບັນເທົາທຸກ ແລະ ອຸປະກອນການແພດທີ່ຈໍາເປັນ ໃຫ້ອົງການປົກຄອງເມືອງປາກງື່ມ ວັນທີ 1 ມິຖຸນາ 2021 ທີ່ອົງການປົກຄອງເມືອງດັ່ງກ່າວ ຕາງໜ້າມອບໂດຍທ່ານ ພູວົງ ວົງຄໍາຊາວ ຮອງເຈົ້າຄອງ ຫົວໜ້າຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ແລະ ຕາງໜ້າຮັບຂອງທ່ານ ຄໍາໝູນ ຕຽງທະລາດ ເຈົ້າເມືອງປາກງື່ມ ພ້ອມຄະນະ.
ເຄື່ອງບັນເທົາທຸກທີ່ມອບຄັ້ງນີ້ ມີຈໍານວນ 180 ຊຸດ ນອກນີ້ຍັງມີນໍ້າດື່ມ 20 ແພັກ ເຈວລ້າງມື 3 ແກັດ ນໍ້າຢາລ້າງຫ້ອງນໍ້າ 1 ແກັດ ສະບູແຫຼວ 2 ແກັດ ຜ້າອັດປາກ-ອັດດັງ 1.0000 ແຜ່ນ ແລະ ມຸ້ງ 10 ດາງ ເຊິ່ງເຄື່ອງດັ່ງກ່າວນີ້ ແມ່ນມອບໃຫ້ອົງການປົກຄອງເມືອງນໍາໄປແຈກຢາຍຕໍ່ໃຫ້ກັບປະຊາຊົນທີ່ມີຄວາມຫຍຸ້ງຍາກໃນການດໍາລົງຊີວິດ ແລະ ໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19.
ໂອກາດນີ້ ທ່ານເຈົ້າເມືອງປາກງື່ມໄດ້ສະແດງຄວາມຂອບໃຈຕໍ່ຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂການແຜ່ລະບາດເຊື້ອພະຍາດໂຄວິດ-19 ແລະ ຜູ້ໃຈບຸນທີ່ໄດ້ປະກອບສ່ວນຊ່ວຍເຫຼືອ ແລະ ຈະນໍາເອົາເຄື່ອງດັ່ງກ່າວໄປແຈກຢາຍໃຫ້ກັບປະຊາຊົນທີ່ໄດ້ຮັບຜົນກະທົບໃນຄັ້ງນີ້ ໂດຍສະເພາະ ປະຊາຊົນທີ່ຫຍຸ້ງຍາກຂາດເຂີນໃນບ້ານເປົ້າໝາຍຄື: ໂນນຊາຍ ໂນນແຍງ ປາກກວາງ ໜອງດົງ ຝາງແດງ ນາທາມ ແລະ ບ້ານປາກງື່ມ.
ນອກນີ້ ທ່ານ ຮອງເຈົ້າຄອງ ນວ ຍັງໄດ້ຮ່ວມຂະບວນການປູກຕົ້ນໄມ້ໃຫ້ໝາກ ປະເພດໝາກມ່ວງ ຈໍານວນ 20 ຕົ້ນ ຢູ່ໂຮງໝໍເມືອງປາກງື່ມ ເພື່ອເປັນການສ້າງຂະບວນການສະເຫຼີມສະຫຼອງວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ແລະ ວັນເດັກນ້ອຍສາກົນ ໂດຍມີແພດໝໍເຂົ້າຮ່ວມ.
ພາຍຫຼັງສໍາເລັດປູກຕົ້ນໄມ້ແລ້ວ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍເຈົ້າເມືອງປາກງື່ມ ແລະ ພາກສ່ວນກ່ຽວຂ້ອງ ໄດ້ສືບຕໍ່ລົງກວດກາເບິ່ງຈຸດເຊື່ອມຕໍ່ລະຫວ່າງເຂດແດນບ້ານ ສົມສະຫວາດ ບ້ານເວີນກະເບົາ ເມືອງປາກງື່ມ ແລະ ບ້ານນາໄຊ ເມືອງທ່າພະບາດ ແຂວງ ບໍລິຄໍາໄຊ ຕື່ມອີກ.
# ຂ່າວ & ພາບ: ຂັນທະວີ