ວັນທີ 30 ພຶດສະພາ 2021 ທີ່ໂຮງຮຽນປະຖົມສົມບູນບ້ານຕາດທອງ ຄະນະສະເພາະກິດໂຄວິດ-19 ນະຄອນຫຼວງວຽງຈັນ (ນວ) ຮ່ວມກັບສະມາຄົມໂຮງແຮມ ຄະນະອິ່ມບຸນເມດຕາທຳ ແລະ ທ່ານ ນາງ ອໍລະໄທ ສັນຕິຄົງຄາ ປະທານບໍລິສັດ ກຣິດຕະພົງ ກຣຸບ ຈໍາກັດ ສະມາຊິກສະພາປະຊາຊົນ ຊຸດທີ 2 ເມືອງໄຊທານີ ແລະ ບໍລິສັດ ຄົມປັນຍາ ໄດ້ນໍາເອົາເຄື່ອງບໍລິໂພກ ບັນເທົາທຸກ ຊ່ວຍເຫຼືອປະຊາຊົນ ບ້ານຕາດທອງ ເມືອງສີໂຄດຕະບອງ ນວ ທີ່ມີຄວາມຫຍຸ້ງຍາກໃນການດຳລົງຊີວິດ ແລະ ໄດ້ຮັບຜົນກະທົບຈາກການແຜ່ລະບາດເຊື້ອພະຍາດໂຄວິດ-19 ໂດຍການນໍາພາຂອງທ່ານ ພູວົງ ວົງຄໍາຊາວ ຮອງເຈົ້າຄອງ ນວ ຫົວໜ້າຄະນະສະເພາະກິດໂຄສິດ-19 ນວ ມີທ່ານ ທະວີໄຊ ເໝົາຊົມພູ ເຈົ້າເມືອງສີໂຄດຕະບອງ ພ້ອມດ້ວຍພະແນກການ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ບຸນມີ ຍົດລືໄຊ ນາຍ ບ້ານຕາດທອງໃຫ້ຮູ້ວ່າ: ບ້ານມີພົນລະເມືອງທັງໝົດ 5.468 ຄົນ ຍິງ 2.306 ຄົນ ມີ 918 ຄອບຄົວ 936 ຫຼັງຄາເຮືອນ ເຊິ່ງຜູ້ທີ່ມີຄວາມຫຍຸ້ງຍາກ ແລະ ໄດ້ຮັບຜົນກະທົບຈາກການແຜ່ລະບາດເຊື້ອພະຍາດໂຄວິດ-19 ຈໍານວນ 50 ຄອບຄົວ ແລະ ບ້ານດັ່ງກ່າວມີຜູ້ຕິດເຊື້ອພະຍາດໂຄວິດ-19 ຈໍານວນ 10 ຄົນ ໃນນີ້ປິ່ນປົວຫາຍດີ 8 ຄົນ ແລະ ກຳລັງປິ່ນປົວ 2 ຄົນ.
