ຫ້ອງການສຶກສາທິການ ແລະ ກີລາເມືອງ ນາຊາຍທອງ ຈັດພິທີສະຫຼຸບຜົນການສອບເສັງນັກຮຽນເກ່ງຂັ້ນເມືອງນາຊາຍທອງ ຂຶ້ນໃນວັນທີ 11 ມີນາ 2020 ທີ່ສະໂມສອນເມືອງນາຊາຍທອງ ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານນາງ ວຽງສົດ ວົງໄຊ ຫົວໜ້າຫ້ອງການສຶກສາທິການ ແລະ ກີລາເມືອງນາຊາຍທອງ ມີທ່ານນາງ ຊື່ນຈິດ ສີລິມະໂນທຳ ຮອງຫົວໜ້າພະແນກສຶກສາທິການ ແລະ ກີລາ ນະຄອນຫຼວງວຽງຈັນ ພ້ອມດ້ວຍພະນັກງານ ຄູ-ອາຈານ ນັກຮຽນ ແລະ ແຂກຖືກເຊີນກ່ຽວຂ້ອງເຂົ້າຮ່ວມ.
ທ່ານນາງ ພະໄທເພັດ ພົນລະພິດ ຮອງຫົວໜ້າຫ້ອງການສຶກສາທິການ ແລະ ກີລາເມືອງນາຊາຍທອງ ຂຶ້ນຜ່ານບົດສະຫຼຸບການສອບເສັງນັກຮຽນເກ່ງ ປ5 ມ4 ມ7 ຂອງເມືອງນາຊາຍທອງ ປະຈຳສົກຮຽນ 2019-2020 ວ່າ: ຜົນການແຂ່ງຂັນສອບເສັງນັກຮຽນເກ່ງຂັ້ນ ປ5 ວິຊາ ຄະນິດສາດ ນັກຮຽນເກ່ງເຂົ້າຮ່ວມການສອບເສັງທັງໝົດ 30 ຄົນ ຍິງ 15 ຄົນ ພາສາລາວ ນັກຮຽນເກ່ງເຂົ້າຮ່ວມການສອບເສັງທັງໝົດ 30 ຄົນ ຍິງ 24 ຄົນ ໂລກອ້ອມຕົວ ມີ 30 ຄົນ ຍິງ 23 ຄົນ ຂັ້ນ ມ4 ວິຊາ ຄະນິດສາດ ມີ 30 ຄົນ ຍິງ 17 ຄົນ ພາສາລາວ-ວັນນະຄະດີ ມີ 30 ຄົນ ຍິງ 21 ຄົນ ຟີຊິກສາດ ມີ 30 ຄົນ ຍິງ 23 ຄົນ ເຄມີສາດ ມີ 30 ຍິງ 23 ຄົນ ຂັ້ນ ມ7 ວິຊາຄະນິດສາດ ມີ 18 ຄົນ ຍິງ14 ຄົນ ພາສາລາວ-ວັນນະຄະດີ ມີ 18 ຄົນ ຍິງ 15 ຄົນ ຟີຊິກສາດ ມີ 18 ຄົນ ຍິງ 13 ຄົນ ເຄມີສາດ ມີ 18 ຄົນ ຍິງ 13 ຄົນ.
ໃນສົກຮຽນ 2019-2020 ເມືອງນາຊາຍທອງຄັດເລືອກນັກຮຽນເກ່ງໄດ້ລະດັບຂັ້ນເມືອງ ຂັ້ນ ປ5 ມ4 ແລະ ມ7 ໄດ້ 55 ຄົນ ຍິງ 41 ຄົນ ເປັນຕົວແທນນັກຮຽນເກ່ງທົ່ວເມືອງເຂົ້າຮ່ວມສອບເສັງຂັ້ນນະຄອນຫຼວງທີ່ຈະຈັດຂຶ້ນໃນຕໍ່ໜ້າ (27 ມີນາ 2020) ນີ້.