ເມືອງໄຊເສດຖາ ນະຄອນຫຼວງວຽງຈັນ ເອົາໃຈໃສ່ເພີ່ມທະວີມາດຕະການສະກັດກັ້ນ ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 ອີງຕາມຄໍາສັ່ງຂອງນາຍົກລັດຖະມົນຕີ ສະບັບເລກທີ 15/ນຍ ລົງວັນທີ 21 ເມສາ 2021 ແລະ ຄໍາແນະນໍາຂອງທ່ານເຈົ້າຄອງນະຄອນຫຼວງວຽງຈັນ ສະບັບເລກທີ 006/ຈນວ ລົງວັນທີ 22 ເມສາ 2021 ວ່າດ້ວຍການແຕ່ງຕັ້ງປະຕິບັດຄໍາສັ່ງວ່າດ້ວຍການເພີ່ມທະວີມາດຕະການສະກັດກັ້ນ ຄວບຄຸມ ແລະ ກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ-19.
ທ່ານ ຈິດຕະພອນ ອັກຄະວົງ ຄະນະພັກເມືອງ ຫົວໜ້າຄະນະຈັດຕັ້ງເມືອງ ຄະນະສະເພາະກິດຕ້ານພະຍາດໂຄວິດ-19 ຂັ້ນເມືອງ ແຈ້ງໃຫ້ຊາບວ່າ: ຜ່ານການຈັດຕັ້ງປະຕິບັດວຽກງານຜ່ານມາ ທາງຄະນະພວກເຮົາໄດ້ເອົາໃຕໃສ່ໃນການປຸກລະດົມຊຸກຍູ້ໃຫ້ບັນດາບ້ານທົ່ວເມືອງ ເອົາໃຈໃສ່ປະກາດບັນດາແຈ້ງການຂອງຂັ້ນເທິງ ໂດຍການຈັດຕັ້ງປະຕິບັດມາດຕະການການສະກັດກັ້ນພະຍາດໂຄວິດ-19 ປະຕິບັດວຽກງານປ້ອງກັນເວນຍາມ ໂດຍສະເພາະຢູ່ສູນຈໍາກັດບໍລິເວນ ໂຮງຮຽນມິດຕະພາບ ມສ ລາວ-ຫວຽດ ລົງຊຸກຍູ້ພະນັກງານແພດໄປສັກຢາວັກຊິນປ້ອງກັນພະຍາດໂຄວິດ-19 ຢູ່ໂຮງຮຽນມັດທະຍົມຕົ້ນທາດຫຼວງ ໄດ້ເກັບຕົວຢ່າງເພື່ອກວດຫາເຊື່ອໂຄວິດ-19 ຢູ່ສູນໂຮງຮຽນ ມສ ລາວ-ຫວຽດ ໄດ້ທັງໝົດ 118 ຕົວຢ່າງ ໄດ້ລົງໂຄສະນາບັນດາແຈ້ງການຕ່າງໆຢູ່ຕາມເສັ້ນທາງຈຸດຊູມຊົນຕ່າງໆ.
ຜ່ານການຈັດຕັ້ງປະຕິບັດຈຸດກວດກາຕ່າງໆ ເຫັນວ່າ: ການໄປມາຂອງປະຊາຊົນແມ່ນຍັງມີການເຄື່ອນໄຫວເດີນທາງໄປມາຢ່າງຫຼວງຫຼາຍ ແຕ່ພວກເຮົາກໍໄດ້ແນະນໍາກ່າວເຕືອນໃຫ້ຢຸດການເດີນທາງຖ້າບໍ່ມີຄວາມຈໍາເປັນ ມີພາຫານະທີ່ໄດ້ກວດກາທັງໝົດ 1.499 ຄັນ ລົດໃຫຍ່ 989 ຄັນ ລົດຈັກ 510 ຄັນ ໄດ້ສຶກສາອົບຮົມຜູ້ຂັບຂີ່ທັງໝົດ 1.499 ຄົນ ຍິງ 111 ຄົນ ໄປຕະຫຼາດ 3.443 ຄົນ ຍິງ 58 ຄົນ ໄປໂຮງໝໍ 51 ຄົນ ຍິງ 25 ຄົນ ໄປວຽກອື່ນໆ 940 ຄົນ ປກສ ເມືອງໄຊເສດຖາພວກເຮົາໄດ້ຈັດກໍາລັງລົງຕາມເສັ້ນທາງເພື່ອກ່າວເຕືອນຜູ້ໃຊ້ຖະໜົນມີຈໍານວນ 7 ຈຸດ ຄື: ຈຸດກວດກາເສັ້ນທາງວົງວຽນວິທະຍຸ ເສັ້ນທາງໜອງບອນ ເສັ້ນທາງສາມແຍກນາໄຊ ເສັ້ນທາງສາມແຍກຊຽງດາ ເສັ້ນທາງໜອງໜ່ຽງ ເສັ້ນທາງນາຄວາຍ-ທາງ 450 ປີ ເສັ້ນທາງບ້ານໂຊກນ້ອຍ-ທາງ450 ປີ ແລະ ຈຸດກວດກາຄົນເຂົ້າ-ອອກບ້ານ ມີ 48 ບ້ານ ນອກນັ້ນ ພວກເຮົາຍັງໄດ້ແບ່ງກໍາລັງໄປປ້ອງກັນປະຈໍາຢູ່ຈຸດກວດເກັບຕົວຢ່າງຂອງພະຍາດໂຄວິດ-19 ຢູ່ໂຮງຮຽນ ມສ ລາວ-ຫວຽດ ບ້ານໂພນພະເນົາ ແລະ ແບ່ງພະນັກງານ ປກສ ເຂົ້າຮ່ວມປະຈໍາການນໍາໜ່ວຍສະເພາະກິດຂັ້ນເມືອງ ຢູ່ປົກຄອງເມືອງ.
ເພື່ອສືບຕໍ່ໃນການຈັດຕັ້ງປະຕິບັດມາດຕະການດັ່ງກ່າວແຕ່ນີ້ຫາວັນທີ 20 ພືດສະພາ 2021 ທາງຄະນະສະເພາະກິດພວກເຮົາໄດ້ສືບຕໍ່ໃຫ້ອໍານາດການປົກຄອງ 48 ບ້ານ ພາຍໃນເມືອງ ເອົາໃຈໃສ່ໃນການຕັ້ງດ່ານຈຸດກວດກາເຂົ້າ-ອອກ ຂອງປະຊາຊົນພາຍໃນບ້ານຂອງຕົນຢ່າງເຂັ້ມງວດ ລົງກວດກາບັນດາຮ້ານອາຫານ ຮ້ານບັນເທິງ ຮ້ານກິນດື່ມ ຮ້ານເກມ ຮ້ານນວດ ພາຍໃນເມືອງສືບຕໍ່ການປິດກິດຈະການຊົ່ວຄາວ ລົງກວດກາໂຮງຈັກໂຮງງານງານ ຖ້າພົບເຫັນມີການເຄື່ອນໄຫວດໍາເນີນທຸລະກິດທີ່ຂັດຕໍ່ຄໍາສັ່ງ ເລກທີ 15/ນຍ ແລະ ຄຳສັ່ງແນະນຳຂອງທ່ານເຈົ້າຄອງ ນວ ຖ້າພົບເຫັນການລະເມີນ ຈະໄດ້ມີການຕັກເຕືອນ ພ້ອມປັບໃໝ ປະຕິບັດຕາມລະບຽບກົດໝາຍຢ່າງເຂັ້ມງວດ.
# ຂ່າວ & ພາບ : ບຸນມີ ສີວິໄລ