ທ່ານ ນາງ ປານີ ຢາທໍ່ຕູ້ ຮອງປະທານປະເທດ ໄດ້ເຄື່ອນໄຫວຢ້ຽມຢາມໃຫ້ກຳລັງໃຈແພດໝໍ ແລະ ຄົນເຈັບຢູ່ໂຮງໝໍພາກສະໜາມລ້ານຊ້າງ ບ້ານໂພນປ່າເປົ້າ ເມືອງສີສັດຕະນາກ ນະຄອນຫຼວງວຽງຈັນ (ເສັ້ນທາງຕັດໃໝ່ດອນກອຍຫາຊຽງດາ) ວັນທີ 5 ພຶດສະພາ 2021.
ທ່ານ ນາງ ບົວວອນ ສຸກລາແສງ ຫົວໜ້າຫ້ອງວ່າການນະຄອນຫຼວງວຽງຈັນ ຫົວໜ້າຄະນະຮັບຜິດຊອບປະສານງານໂຮງໝໍພາກສະໜາມລ້ານຊ້າງ ໄດ້ລາຍງານສະພາບການກໍ່ສ້າງ ການຈັດຕັ້ງປະຕິບັດໜ້າທີ່ຂອງທີມງານແພດໝໍ ແລະ ວຽກງານປິ່ນອ້ອມອື່ນໆທີ່ອໍານວຍຄວາມສະດວກໃນການປິ່ນປົວຄົນເຈັບ ເຊິ່ງໂຮງໝໍດັ່ງກ່າວມີທັງໝົດ 300 ຕຽງ ປັດຈຸບັນມີຄົນເຈັບຕິດເຊື້ອພະຍາດໂຄວິດ-19 ກໍລະນີຂັ້ນເບົາບາງໄດ້ເຂົ້າມາປິ່ນປົວ 13 ຄົນ.
ໂອກາດນີ້ ທ່ານ ນາງ ປານີ ຢາທໍ່ຕູ້ ໄດ້ຕີລາຄາສູງຕໍ່ການກະກຽມພື້ນຖານໂຄງລ່າງຂອງທີມແພດໝໍ ແລະ ເຄື່ອງອຸປະກອນການແພດ ຕະຫຼອດຮອດຢາທີ່ນໍາໃຊ້ເຂົ້າໃນການປິ່ນປົວຕາມຄວາມສາມາດທີ່ມີ ໄດ້ຢ່າງທັນການ ພິເສດ ພະແນກສາທາລະນະສຸກ ແລະ ທຸກໜ່ວຍງານກ່ຽວຂ້ອງ ທີ່ໄດ້ສຸມທຸກກຳລັງຄົນ ຊັບສິນ ຄວາມຮູ້ຄວາມສາມາດ ນໍ້າໃຈເສຍສະຫຼະ ປະຕິບັດສະໜາມຮົບຕ້ານພະຍາດໂຄວິດ-19 ພ້ອມນັ້ນ ໄດ້ເນັ້ນໜັກໃຫ້ພະຍາຍາມສຶກສາອົບຮົມຄົນເຈັບ ປະຕິບັດລະບຽບການຂອງແພດໝໍວາງອອກຢ່າງເຂັ້ມງວດ ແລະ ເດັດຂາດ ນອກນີ້ ຍັງໄດ້ໂຟນີ່ໂອ້ລົມສະແດງຄວາມເປັນຫ່ວງເປັນໄຍຄົນເຈັບທີ່ປິ່ນປົວຢູ່ໂຮງໝໍແຫ່ງນີ້ ພ້ອມທັງເນັ້ນໜັກໃຫ້ມີຄວາມອຸ່ນອ່ຽນທຸ່ນທ່ຽງ ເຊື່ອໝັ້ນຕໍ່ການປະຕິບັດໜ້າທີ່ຂອງແພດໝໍ ໃຫ້ມີຄວາມຕັ້ງໃຈປະຕິບັດວິໄນຕາມການແນະນໍາຂອງແພດໝໍ ເພື່ອໃຫ້ມີສຸຂະພາບແຂງແຮງດີ ກັບຄືນຫາຄອບຄົວຢ່າງປອດໄພ.
# ຂ່າວ & ພາບ : ຂັນທະວີ ພິມມະສອນ