ພາຍຫຼັງທີ່ໄດ້ເກີດການແຜ່ລະບາດຂອງພະຍາດໂຄວິດ-19 ຮອບທີ 2 ໃນ ສປປ ລາວ ເຮັດໃຫ້ທຸກພາກສ່ວນຕ້ອງໄດ້ສຸມໃສ່ໃນການປ້ອງກັນ ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ເນື່ອງຈາກໃນເດືອນເມສາ 2021 ມີຜູ້ຕິດເຊື້ອເພີ່ມຂື້ນເປັນຈໍານວນຫຼາຍ ເຮັດໃຫ້ໂຮງໝໍ ແລະ ສະຖານທີ່ຮອງຮັບທີ່ທາງລັດຖະບານຈັດໄວ້ແມ່ນຍັງບໍ່ພຽງພໍ ດັ່ງນັ້ນ ຈຶ່ງໄດ້ມີການສ້າງໂຮງໝໍພາກສະໜາມຂື້ນ ມີບັນດາພາກສ່ວນທຸລະກິດ ຜູ້ປະກອບການທີ່ມີເງື່ອນໄຂ ກໍໄດ້ມີການປະກອບສ່ວນຊ່ວຍພັກ-ລັດຖະບານ ໂດຍສະເພາະແມ່ນການສ້າງໂຮງໝໍພາກສະໜາມລ້ານຊ້າງ ເພື່ອຮອງຮັບຄົນເຈັບທີ່ຕິດເຊື້ອພະຍາດໂຄວິດ-19 ແມ່ນການສະໜັບສະໜູນຈາກ ກຸ່ມບໍລິສັດ AIF ບໍລິສັດ ທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ (ກຸ່ມບໍລິສັດ IHC) ບໍລິສັດ ອິນທຣາ ຄໍປໍເຣຊັນ ຈຳກັດຜູ້ດຽວ ແລະ ສວນຊາ 36 ເຊິ່ງໄດ້ເລີ່ມກໍ່ສ້າງ ໃນວັນທີ 27 ເມສາ 2021 ມາຮອດວັນທີ 3 ພຶດສະພາ 2021 ແມ່ນໄດ້ສໍາເລັດ ລວມມູນຄ່າການກໍ່ສ້າງ 1.200.000 ໂດລາສະຫະລັດ ພ້ອມທັງມີພິທີມອບ-ຮັບ ແລະ ເປີດນໍາໃຊ້ຢ່າງເປັນທາງການ ໃນວັນທີ 3 ພຶດສະພາ 2021 ທີ່ຜ່ານມາ.
ທ່ານ ປີຊາໄຊ ແກ້ວໄຊຍະຈັກ ປະທານບໍລິສັດທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ (ກຸ່ມບໍລິສັດ IHC) ໄດ້ກ່າວວ່າ: ຍ້ອນເຫັນໄດ້ຄວາມຈໍາເປັນຂອງສະພາບການໃນປັດຈຸບັນ ດັ່ງນັ້ນ ບໍລິສັດຈຶ່ງໄດ້ປະກອບສ່ວນເຂົ້າໃນການສ້າງໂຮງໝໍພາກສະໜາມລ້ານຊ້າງຂື້ນ ເພື່ອຮອງຮັບຄົນເຈັບທີ່ຕິດເຊື້ອຈາກພະຍາດໂຄວິດ-19 ເຂົ້າມາປິ່ນປົວ ແລະ ກັກຕົວຢູ່ສະຖານທີ່ດັ່ງກ່າວ ໂດຍຫັນເອົາສະຖານທີ່ຫຼິ້ນກິລາມາເປັນໂຮງໝໍພາກສະໜາມ ແບ່ງອອກເປັນ 2 ເຂດ ຄື: ເຂດ A ແລະ ເຂດ B ມີທັງໝົດ 306 ຕຽງ ມີຫ້ອງສຸກເສີນເບື້ອງຕົ້ນຂະໜາດ 5 ຕຽງນອນ ແລະ ຄາດວ່າຈະໄດ້ມີການຕິດຕັ້ງຕຽງເພີ່ມອີກຢູ່ເທິງຊັ້ນສອງຂອງອາຄານ ເຊິ່ງຈະສາມາດຮອງຮັບໄດ້ເຖິງ 450 ຕຽງ ສໍາລັບການກໍ່ສ້າງໂຮງໝໍພາກສະໜາມ ແມ່ນໃຊ້ເວລາພຽງ 7 ວັນເທົ່ານັ້ນ ເພື່ອໃຫ້ທັນກັບຄວາມຮຽກຮ້ອງຕ້ອງການໃນສະພາບການປັດຈຸບັນ ພ້ອມກັບສິ່ງອໍານວຍຄວາມສະດວກໃຫ້ແກ່ຄົນເຈັບທີ່ເຂົ້າມາປິ່ນປົວ ເປັນຕົ້ນ ຫ້ອງນໍ້າ ຈັກຊັກເຄື່ອງ ແລະ ອື່ນໆ ເພື່ອອໍານວຍຄວາມສະດວກໃຫ້ແກ່ຜູ້ທີ່ຕິດເຊື້ອທີ່ເຂົ້າມາກັກຕົວ ນອກນັ້ນ ບໍລິສັດທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ (ກຸ່ມບໍລິສັດ IHC) ຍັງໄດ້ມີການປະກອບສ່ວນຊຸກຍູ້ຊ່ວຍເຫຼືອໃຫ້ບັນດາແຂວງ ເພື່ອຕອບຕ້ານກັບພະຍາດໂຄວິດ-19 ໃຫ້ໝົດໄປຈາກສັງຄົມໂດຍໄວ.
# ຂ່າວ & ພາບ : ຂັນທະວີ ພິມມະສອນ