ວັນທີ 5 ພຶດສະພາ 2021 ທີ່ສຳນັກງານນາຍົກລັດຖະມົນຕີ ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໄດ້ຈັດກອງປະຊຸມເພື່ອປຶກສາຫາລື ຜັນຂະຫຍາຍຈິດໃຈກອງປະຊຸມນາຍົກ-ຮອງນາຍົກລັດຖະມົນຕີ ຄັ້ງວັນທີ 04 ພຶດສະພາ 2021 ກ່ຽວກັບວຽກງານສະກັດກັ້ນ ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ແລະ ກຳນົດແຜນວຽກຈຸດສຸມຂອງຄະນະສະເພາະກິດ ແຕ່ວັນທີ 06-20 ພຶດສະພາ 2021 ຊຶ່ງເປັນໄລຍະສືບຕໍ່ຈັດຕັ້ງປະຕິບັດຄຳສັ່ງສະບັບເລກທີ 15/ນຍ ໂດຍການເປັນປະທານຂອງທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ຫົວໜ້າຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ມີບັນດາທ່ານໃນຄະນະສະເພາະກິດ ແລະ ກອງເລຂາຄະນະສະເພາະກິດເຂົ້າຮ່ວມຢ່າງພ້ອມພຽງ.
ກອງປະຊຸມ ໄດ້ຮັບຟັງການລາຍງານສະພາບການຈັດຕັ້ງປະຕິບັດມາດຕະການປ້ອງກັນ ຄວບຄຸມ ສະກັດກັ້ນ ການແຜ່ລະບາດຂອງພະຍາດໂຄວິດ-19 ແລະ ການຈັດຕັ້ງປະຕິບັດຄຳສັ່ງ ເລກເລກທີ 15/ນຍ ລົງວັນທີ 21 ເມສາ 2021 ຈາກທ່ານ ຮສ.ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຫົວໜ້າກອງເລຂາຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂການແຜ່ລະບາດ ຂອງພະຍາດໂຄວິດ-19 ຊຶ່ງເນື້ອໃນ ໄດ້ຕີລາຄາຜົນສຳເລັດ ຂໍ້ຄົງຄ້າງ ແລະ ສິ່ງທ້າທາຍ ລວມທັງການກຳນົດທິດທາງແຜນ ກໍຄືມາດ ຕະການຕ່າງໆໃນຕໍ່ໜ້າ ເພື່ອຜັນ ຂະຫຍາຍຜົນກອງປະຊຸມນາຍົກ-ຮອງນາຍົກລັດຖະມົນຕີ ແລະ ແຜນວຽກຈຸດສຸມ ໃນໄລຍະວັນທີ 06-20 ພຶດສະພາ 2021. ຫຼັງຈາກນັ້ນ ບັນດາທ່ານໃນຄະນະສະເພາະກິດ ໄດ້ປະກອບຄຳຄິດເຫັນຕໍ່ເນື້ອໃນການລາຍງານດັ່ງກ່າວ ໂດຍສະເພາະ ຕໍ່ວຽກຈຸດສຸມໃນຕໍ່ໜ້າ ແລະ ວຽກງານທີ່ກ່ຽວຂ້ອງກັບໜ້າທີ່ ແລະ ຄວາມຮັບຜິດຊອບຂອງຂະແໜງການຕົນ.
ໃນຕອນທ້າຍ ທ່ານປະທານກອງປະຊຸມ ໄດ້ມີທິດຊີ້ນຳຄະນະສະເພາະກິດ ແລະ ກອງເລຂາສະເພາະກິດ ຮີບຮ້ອນນໍາເອົາແຜນຈຸດສຸມທີ່ໄດ້ເອກະພາບກັນໃນຄັ້ງນີ້ ຜັນຂະຫຍາຍເປັນແຜນວຽກ ແລະ ແບ່ງຄວາມ ຮັບຜິດຊອບລະອຽດ ເພື່ອຈັດຕັ້ງປະຕິບັດໃຫ້ສຳເລັດຕາມແຜນ ໂດຍສະເພາະ ວຽກງາ ຮີບດ່ວນໃນໄລຍະວັນທີ 06-20 ພຶດສະພາ 2021 ໃຫ້ມີການປະສານສົມທົບກັນພາຍໃນຢ່າງກົມກຽວ ເພື່ອຮັບປະກັນໃຫ້ການປະຕິບັດວຽກງານມີຄວາມໂລ່ງລ່ຽນ ຕິດຕາມສັງລວມເອົາຄຳຄິດເຫັນ ຄຳສະເໜີ ຫຼືຄວາມເປັນຫ່ວງເປັນໄຍຂອງປະຊາຊົນ ກໍຄືທຸກພາກສ່ວນໃນສັງຄົມ ເພື່ອສົ່ງໃຫ້ພາກສ່ວນກ່ຽວຂ້ອງ ມາຮ່ວມຊີ້ແຈງອະທິບາຍ ໃນການຖະແຫຼງຂ່າວປະຈຳວັນຂອງຄະນະສະເພາະກິດ ໃຫ້ທຸກພາກສ່ວນສືບຕໍ່ຈັດຕັ້ງປະຕິບັດມາດຕະການຕ່າງໆທີ່ໄດ້ອອກໄປແລ້ວຢ່າງເຂັ້ມງວດ.
# ຂ່າວ & ພາບ : ໄຊບັນດິດ