ຖືວ່າເປັນຂ່າວດີອີກມື້ໜຶ່ງ ທີ່ທີມງານແພດໝໍກວດບໍ່ພົບຜູ້ຕິດເຊື້ອ COVID-19 ຢູ່ ສປປ ລາວ ຈາກການຖະແຫຼງຂ່າວຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂຣກສາຍພັນໃໝ່ COVID-19 ໃນວັນທີ 15 ເມສາ 2020 ແມ່ນບໍ່ມີຜູ້ເຊື້ອ COVID-19 ຍັງຄົງຕົວເລກຜູ້ຕິດເຊື້ອຢູ່ທີ່ 19 ລາຍ ໃນນີ້ແມ່ນໄດ້ຮັບການປິ່ນປົວດີແລ້ວ 1 ລາຍ ເພດຍິງ.
ທ່ານ ຮສ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈຳການຄະນະສະເພາະກິດ ກ່າວວ່າ: ໃນວັນທີ 14 ເມສາ 2020 ໄດ້ເກັບຕົວຢ່າງມາກວດທັງໝົດ 30 ຄົນ ໃນນັ້ນ ມີຜູ້ສຳຜັດໃກ້ຊິດກັບຜູ້ຕິດເຊື້ອ 01 ຄົນ ກໍລະນີມີອາການສົງໄສ 29 ຄົນ (ໃນນີ້ ມີແຮງງານລາວທີ່ກັບມາແຕ່ໄທ 03 ຄົນ) ໃນຈຳນວນ 30 ຄົນທີ່ມາກວດນັ້ນ ມີນະຄອນຫຼວງວຽງຈັນ 21 ຄົນ ແລະ ຕ່າງແຂວງ 09 ຄົນ ໃນນີ້ ແຂວງຫຼວງພະບາງ 06 ຄົນ ແລະ ແຂວງຄຳມ່ວນ 03 ຄົນ ຜົນກວດທັງໝົດ 30 ກໍລະນີ ແມ່ນບໍ່ພົບເຊື້ອ.
ນັບແຕ່ເດືອນມັງກອນ ຮອດວັນທີ 14 ເມສາ 2020 ໄດ້ເກັບຕົວຢ່າງມາກວດທັງໝົດ 1.265 ຄົນ ກວດພົບເຊື້ອທັງໝົດ 19 ຄົນ ແລະ ທັງໝົດ 19 ຄົນ ແມ່ນນອນປິ່ນປົວ-ຕິດຕາມຢູ່ໂຮງໝໍ ເຊິ່ງ 3 ມື້ແລ້ວທີ່ບໍ່ມີຜູ້ຕິດເຊື້ອເພີ່ມ.
ສຳລັບຈຳນວນຜູ້ສຳຜັດໃກ້ຊິດທັງໝົດທີ່ໄດ້ຕິດຕາມແຕ່ວັນທີ 23 ມີນາ-14 ເມສາ 2020 ມີທັງໝົດ 488 ຄົນ ໝົດກຳນົດຕິດຕາມທັງໝົດ 417 ຄົນ ຍັງສືບຕໍ່ຕິດຕາມທັງໝົດ 71 ຄົນ ໃນນີ້ ນະຄອນຫຼວງວຽງຈັນ 32 ຄົນ ແຂວງໄຊສົມບູນ 38 ຄົນ ແລະ ແຂວງວຽງຈັນ 01 ຄົນ. ມາຮອດວັນທີ 15 ເມສາ 2020 ທົ່ວປະເທດຍັງມີ 1.929 ສູນ ມີຜູ້ຈຳກັດບໍລິເວນຢູ່ສູນ 29.161 ຄົນ ຈຳກັດບໍລິເວນຢູ່ເຮືອນ 22.850 ຄົນ ເກັບຕົວຢ່າງມາກວດວິເຄາະຫາເຊື້ອ ມີທັງໝົດ 115 ຄົນ ທັງໝົດບໍ່ພົບເຊື້ອ.
ໃນການຕິດຕາມປີ່ນປົວຄົນເຈັບຢູ່ໂຮງໝໍ 19 ຄົນນັ້ນ ຈຳນວນ 3 ຄົນ ຢູ່ໂຮງໝໍແຂວງຫຼວງພະບາງ ເຫັນວ່າມີອາການຄົງຕົວຂັ້ນເບົາບາງ ຍັງຕິດຕາມການກວດຫາເຊື້ອເພື່ອຢັ້ງຢືນ ຈຳນວນ 16 ຄົນ ຢູ່ໂຮງໝໍມິດຕະພາບທັງໝົດ ເຫັນວ່າມີອາການເບົາບາງ ໃນນີ້ 01 ຄົນໄດ້ອອກໂຮງໝໍວານນີ້ ແລະ ໄປຕິດຕາມຕົນເອງຢູ່ເຮືອນ 14 ວັນ.
ທ່ານ ຮສ ດຣ ພູທອນ ເມືອງປາກ ກ່າວອີກວ່າ: ຄະນະສະເພາະກິດ ແມ່ນມີຄວາມເປັນຫ່ວງເປັນໄຍຕໍ່ສຸຂະພາບຂອງປະຊາຊົນເປັນທີ່ສຸດ ແລະ ໄດ້ປະຊຸມປືກສາຫາລື ຕີລາຄາຄືນຜົນການຈັດຕັ້ງປະຕິບັດຄຳສັ່ງເລກທີ 06 ຂອງທ່ານນາຍົກລັດຖະມົນຕີ ເຊີ່ງເຫັນວ່າ: ບັນດາກະຊວງ ອົງການຈັດຕັ້ງຂັ້ນສູນກາງ ອົງການປົກຄອງທ້ອງຖີ່ນ ໄດ້ຜັນຂະຫຍາຍຄຳສັ່ງຢ່າງລະອຽດ ມີການໂຄສະນາເຜີຍແຜ່ ແລະ ຊີ້ນຳການຈັດຕັ້ງປະຕິບັດໄດ້ດີສົມຄວນ ແລະ ເຊົ້າມື້ນີ້ ກໍໄດ້ລາຍງານຕໍ່ກອງປະຊຸມຂອງທ່ານນາຍົກ/ທ່ານຮອງນາຍົກ ເພື່ອພິຈາລະນາຜ່ອນຜັນວາງມາດຕະການ ແລະ ສືບຕໍ່ປະຕິບັດຄຳສັ່ງເລກທີ 06 ຕໍ່ໄປອີກໄລຍະໜື່ງ ສະນັ້ນ ຈຶ່ງຮຽກຮ້ອງໃຫ້ພໍ່ແມ່ປະຊາຊົນບັນດາເຜົ່າ ຈົ່ງສືບຕໍ່ຮ່ວມມືເປັນເຈົ້າການຮ່ວມກັນ ປະຕິບັດບັນດາຂໍ້ແນະນຳຕ່າງໆຢ່າງເຂັ້ມງວດ ເພື່ອໃຫ້ສະພາບການລະບາດຂອງພະຍາດໂຄວິດຜ່ອນຄາຍລົງ ຈຶ່ງຈະສາມາດກັບມາດຳລົງຊີວິດຕາມປົກກະຕິ.