ໃນວັນທີ 14 ເມສາ 2020 ນີ້ ມີ 3 ບໍລິສັດໃຫຍ່ໃນນະຄອນຫຼວງວຽງຈັນ ໄດ້ໃຫ້ການສະໜັບສະໜູນເງິນສົດລວມມູນຄ່າ 75 ລ້ານກີບ ແກ່ນະຄອນຫຼວງວຽງຈັນ ເພື່ອປະກອບສ່ວນແກ່ການປ້ອງກັນ ແລະ ຕ້ານການແຜ່ລະບາດຂອງໄວຣັສໂຄວິດ-19 ເຊິ່ງປະກອບດ້ວຍທ່ານ ຄຳຫຼ້າ ນາກຄະວົງ ອຳນວຍການບໍລິສັດ ວຽງຈັນບໍລິຫານຈັດການຂີ້ເຫຍື້ອ ຈຳກັດ ຈຳນວນ 50.000.000 ກີບ ທ່ານ ພອນປະເສີດ ອິນທະສອນ ປະທານບໍລິສັດ 3SD ຈຳນວນ 20.000.000 ກີບ ແລະ ທ່ານ ບຸນທ່ຽງ ຣັດຕະນະວົງ ປະທານບໍລິສັດ ໄອຈ໊ອບ ອີກ 5.000.000 ກີບ ໂດຍຕາງໜ້າກ່າວຮັບ-ມອບຂອງທ່ານ ບຸນທອງ ພົມມະຈັນ ຄະນະປະຈຳພັກ ຫົວໜ້າຄະນະຈັດຕັ້ງນະຄອນຫຼວງວຽງຈັນ.
ໂອກາດນີ້ ທ່ານ ບຸນທອງ ພົມມະຈັນ ໄດ້ກ່າວສະແດງຄວາມຂອບໃຈຕໍ່ທັງ 3 ບໍລິສັດ ທີ່ໄດ້ປະກອບສ່ວນເງິນຕ້ານຕໍ່ການລະບາດໃນຄັ້ງນີ້ ມາມອບໃຫ້ນະຄອນຫຼວງ ເພື່ອຕ້ານການແຜ່ລະບາດຂອງພະຍາດ COVID-19.
ໃນໂອກາດດັ່ງກ່າວ ທ່ານ ພອນປະເສີດ ອິນທະສອນ ຍັງໄດ້ກ່າວວ່າ: ເພື່ອເຮັດໃຫ້ປະຊາຊົນຜູ້ຂາດເຂີນທີ່ອາໄສຢູ່ນະຄອນຫຼວງວຽງຈັນ ໄດ້ຮັບເຄື່ອງຊ່ວຍເຫຼືອຢ່າງທົ່ວເຖິງນັ້ນ ໃນຕອນບ່າຍມື້ນີ້ ທາງບໍລິສັດພວກເຮົາຈະໄດ້ລວມເອົາພະນັກງານຂອງຕົນຈຳນວນ 80 ກວ່າຄົນ ກັບມາເຮັດວຽກຄືນ ເນື່ອງຈາກໃຫ້ພັກວຽກຊົ່ວຄາວ ເພື່ອນຳເຄື່ອງບໍລິໂພກ ແລະ ອຸປະໂພກ ເປັນຕົ້ນ ເຂົ້າສານ ໝີ່ ໄຂ່ ປາກະປ໋ອງ ຜ້າອັດປາກ ແລະ ອື່ນໆ ລົງໄປແຈກຢາຍໃຫ້ປະຊາຊົນຢູ່ 9 ຕົວເມືອງ ນັບແຕ່ມື້ອື່ນເປັນຕົ້ນໄປ ສຳລັບການລົງໄປແຈກຢາກເຄື່ອງຊ່ວຍເຫຼືອນັ້ນ ແມ່ນຈະລົງໄປແຈກຢາຍຢູ່ແຕ່ລະເມືອງ ແລະ ຈະໃຫ້ອຳນາດການປົກຄອງບ້ານເກັບກຳລາຍຊື່ຜູ້ມາຮັບ ແລະ ຜູ້ແຈ້ງຈຸດປະສົງມື້ລົງແຈກຢາຍອີກດ້ວຍ.