ວັນທີ 23 ເມສາ 2021 ຄະນະສະເພາະກິດເພື່ອປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ກະຊວງປ້ອງກັນຄວາມສະຫງົບ ໄດ້ລົງກວດກາສູນກັກກັດບໍລິເວນແກ່ຜູ້ທີ່ມີຄວາມສ່ຽງຈາກພະຍາດໂຄວິດ-19 ທີ່ສູນຝືກອົບຮົມວິຊາສະເພາະປ້ອງກັນທີ່ຕັ້ງ ກະຊວງ ປກສ (ດ່ານຊີ) ເພື່ອກະກຽມຄວາມພ້ອມໃຫ້ແກ່ກຳລັງປ້ອງກັນຄວາມສະຫງົບທີ່ມີຄວາມສ່ຽງຈາກການຕິດເຊື້ອພະຍາດໂວຄິດ-19.
ໃນການກວດກາສູນກັກກັນບໍລິເວນ ແກ່ຜູ້ທີ່ມີຄວາມສ່ຽງຈາກພະຍາດໂຄວິດ-19 ໃນຄັ້ງນີ້ ນຳພາໂດຍທ່ານພົຕ ປອ ທອງເຫຼັກ ມັງໜໍ່ເມກ ຮອງລັດຖະມົນຕີກະຊວງ ປກສ ພ້ອມດ້ວຍຄະນະ ສໍາລັບສູນກັກກັນບໍລິເວນດ່ານຊີ ປະກອບມີ 2 ອາຄານ ແລະ 1 ສະໂມສອນ ສາມາດຮອງຮັບໄດ້ຫຼາຍຮ້ອຍຄົນ ສ່ວນສະຖານທີ່ດັ່ງກ່າວ ແມ່ນມີຄວາມສະດວກສະບາຍ ມີນໍ້າ ມີໄຟຟ້າຄົບຊຸດ ໃນການອຳນວຍຄວາມສະດວກໃຫ້ແກ່ຜູ້ຖືກກັກກັດບໍລິເວນ.
ສູນດັ່ງກ່າວນີ້ ຄະນະສະເພາະກິດ ເພື່ອປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ກະຊວງປ້ອງກັນຄວາມສະຫງົບ ແມ່ນໄດ້ມີການກະກຽມຄວາມພ້ອມຂອງແຕ່ລະອະນຸກຳມະການ ໃນການປີ່ນປົວ ປະກອບມີ: ອະນຸກຳມະການປ້ອງກັນ ອະນຸກຳມະການປີ່ນປົວ ແລະອະນຸກຳມະການແຕ່ງຢູ່ຄົວກິນ ຖ້າຫາກພົບວ່າ ກຳລັງປ້ອງກັນຄວາມສະຫງົບອາດມີຄວາມສ່ຽງໃນຕິດເຊື້ອໂຄວິດ-19 ກໍຈະນໍາເຂົ້າມາກັກບໍລິເວນຢູ່ໃນສູນດັ່ງກ່າວ ເພື່ອຮັບປະກັນບໍ່ໃຫ້ກຳລັງປ້ອງກັນຄວາມສະຫງົບມີການແຜ່ເຊື້ອພະຍາດໂຄ ວິດ-19 ໄປສູ່ບຸກຄົນອື່ນ..
# ຂ່າວ & ພາບ: ໄຊບັນດິດ