ພິທີມອບຮັບໜ້າທີ່ລະຫວ່າງທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ຊຸດທີ VIII ແລະ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ຊຸດທີ IX ແລະ ລະຫວ່າງຄະນະປະຈຳສະພາແຫ່ງຊາດ ຊຸດທີ VIII ແລະ ຊຸດທີ IX ຈັດຂຶ້ນວັນທີ 2 ເມສາ 2021 ທີ່ໂຮງແຮມລາວພລາຊາ ນະຄອນຫຼວງວຽງຈັນ ມີປະທານ ຮອງປະທານສະພາແຫ່ງຊາດ ຄະນະປະຈຳສະພາແຫ່ງຊາດ ບັນດາຫົວໜ້າກຳມາທິການ ແລະ ເລຂາທິການສະພາແຫ່ງຊາດ ຊຸດທີ VIII ແລະ ຊຸດທີ IX ເຂົ້າຮ່ວມ.
ໂອກາດນີ້ ທ່ານນາງ ສີໃສ ລືເດດມູນສອນ ຕາງໜ້າຄະນະປະຈຳສະພາແຫ່ງຊາດ ຊຸດທີ VIII ໄດ້ຂຶ້ນຜ່ານບົດລາຍງານການເຄື່ອນໄຫວຂອງຄະນະປະຈຳສະພາແຫ່ງຊາດ ຊຸດທີ VIII ໂດຍສັງເຂບ ເຫັນວ່າຕະຫຼອດໄລຍະ 5 ປີຜ່ານມາ ຄະນະປະຈຳສະພາແຫ່ງຊາດ ຊຸດທີ VIII ໄດ້ປະຕິບັດໜ້າທີ່ຂອງຕົນມີຜົນສຳເລັດຫຼາຍດ້ານທີ່ພົ້ນເດັ່ນ ແລະ ຍັງມີບາງດ້ານຄົງຄ້າງຈຳນວນໜຶ່ງ ທີ່ຄະນະປະຈຳສະພາແຫ່ງຊາດ ຊຸດທີ IX ຕ້ອງໄດ້ສືບຕໍ່ປັບປຸງແກ້ໄຂ ເພື່ອເຮັດໃຫ້ວຽກງານມີຜົນສຳເລັດເປັນກ້າວໆ ເປັນຕົ້ນ ສືບຕໍ່ຊຸກຍູ້ລັດຖະບານປະຕິບັດກົດໝາຍທີ່ດິນ ເພື່ອເຮັດໃຫ້ການຈັດເກັບລາຍຮັບຈາກທີ່ດິນໃຫ້ໄດ້ຫຼາຍຂຶ້ນ ການຄຸ້ມຄອງທີ່ດິນ ການນະໂຍບາຍທີ່ດິນໃຫ້ພະນັກງານປະຕິວັດທີ່ມີຜົນງານ ດິນໂຄງການລົງທຶນຂອງຕ່າງປະເທດ ແລະ ອື່ນໆ ກວດກາບັນດາກົດໝາຍທີ່ໄດ້ປັບປຸງໄປແລ້ວນັ້ນ 50 ກວ່າສະບັບ ໃຫ້ສະພາເປັນຕົວຫຼັກໃນການຕິດຕາມກວດກາຜົນການກວດສອບບັນດາໂຄງການຕ່າງໆ ສືບຕໍ່ຊຸກຍູ້ ແລະ ຕິດຕາມໂຄງການກໍ່ສ້າງຫໍສະພາແຫ່ງຊາດຫຼັງໃໝ່ທີ່ຍັງບໍ່ທັນສຳເລັດ ໃຫ້ສຳເລັດເດືອນກໍລະກົດ 2021 ສືບຕໍ່ຊີ້ນຳສະພາທ້ອງຖິ່ນ ໂດຍຈັດເຝິກອົບຮົມແຕ່ລະດ້ານໃຫ້ເຂົາເຈົ້າ ເພື່ອຍົກສູງຂີດຄວາມສາມາດຂອງ ສສຂ ຊຸກຍູ້ໂຄງການກໍ່ສ້າງຕຶກສະພາທ້ອງຖິ່ນທີ່ຍັງບໍ່ທັນສຳເລັດ ພ້ອມນີ້ ເພື່ອເຮັດໃຫ້ວຽກງານສະພາໄປໄດ້ດີ ຕ້ອງເອົາໃຈໃສ່ປະສານກັບບັນດາກຳມາທິການ ເພາະທຸກວຽກງານໄດ້ພົວພັນກັບບັນດາກະຊວງ ອົງການທັງສູນກາງ ແລະ ທ້ອງຖິ່ນ.
ໂອກາດນີ້ ທ່ານ ໄຊສົມພອນ ພົມວິຫານ ຕາງໜ້າໃຫ້ຄະນະປະຈຳສະພາແຫ່ງຊາດ ຊຸດທີ IX ໄດ້ກ່າວຮັບເອົາການປະກອບຄຳຄິດຄຳເຫັນຂອງບັນດາຄະນະປະຈຳສະພາແຫ່ງຊາດ ຊຸດທີ VIII ເພື່ອນຳໄປຈັດຕັ້ງປະຕິບັດໃນຕໍ່ໜ້າໃຫ້ມີຜົນສຳເລັດເປັນກ້າວໆ.
# ຂ່າວ & ພາບ: ສົມສະຫວັນ