ພິທີມອບ-ຮັບໜ້າທີ່ ລະຫວ່າງທ່ານ ຄຳມະນິ ອິນທິລາດ ເລຂາຄະນະພັກ ລັດຖະມົນຕີກະຊວງພະລັງງານ ແລະ ບໍ່ແຮ່ (ຜູ້ເກົ່າ) ແລະ ທ່ານ ດາວວົງ ພອນແກ້ວ ເລຂາຄະນະພັກ ລັດຖະມົນຕີກະຊວງພະລັງງານ ແລະ ບໍ່ແຮ່ (ຜູ້ໃໝ່) ໄດ້ຈັດຂຶ້ນວັນທີ 2 ເມສາ 2021 ຢູ່ກະຊວງດັ່ງກ່າວ ໂດຍມີທ່ານ ສອນໄຊ ສີພັນດອນ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ແຂກຖືກເຊີນ ພ້ອມສະມາຊິກພັກ ແລະ ພະນັກງານເຂົ້າຮ່ວມ
ທ່ານນາງ ວົງຄຳ ສຸທໍາມະວົງ ຄະນະພັກ ຄະນະຈັດຕັ້ງສູນກາງພັກ ຫົວໜ້າກົມໂຄສະນາກໍ່ສ້າງພັກ ແລະ ພະນັກງານ ຂຶ້ນຜ່ານລັດຖະດຳລັດຂອງປະທານປະເທດ ເລກທີ 121/ປປທ ລົງວັນທີ 24 ມີນາ 2021 ວ່າດ້ວຍການອອກພັກການ-ຮັບອຸດໜູນບຳນານ ລັດຖະດຳລັດຂອງປະທານປະເທດເລກທີ 141/ປປທ ລົງວັນທີ 29 ມີນາ 2021 ວ່າດ້ວຍການແຕ່ງຕັ້ງລັດຖະມົນຕີ ກະຊວງພະລັງງານ ແລະ ບໍ່ແຮ່ ມະຕິຕົກລົງຂອງກົມການເມືອງສູນກາງພັກ ເລກທີ 23/ກມສພ ລົງວັນທີ 24/3/2021 ວ່າດ້ວຍ ການແຕ່ງຕັ້ງເລຂາຄະນະບໍລິຫານງານພັກ ກະຊວງພະລັງງານ ແລະ ບໍ່ແຮ່.
ທ່ານ ຄຳມະນິ ອິນທິລາດ ກ່າວວ່າ: ຜ່ານການດໍາລົງຕໍາແໜ່ງ ແລະ ເຮັດໜ້າທີ່ອັນມີກຽດ ໃນຖານະເລຂາຄະນະພັກ ລັດຖະມົນຕີກະຊວງພະລັງງານ ແລະ ບໍ່ແຮ່ ໃນຕະຫຼອດໄລຍະເວລາ 5 ປີ 10 ເດືອນທີ່ຜ່ານມາ ຂ້າພະເຈົ້າໄດ້ທຸ່ມເທສະຕິປັນຍາ ຄວາມຮູ້ຄວາມສາມາດ ພ້ອມກັບໝູ່ຄະນະນຳກະຊວງ ຈັດຕັ້ງປະຕິບັດໜ້າທີ່ດ້ວຍຄວາມຕັ້ງໜ້າ ແລະ ມີຜົນສຳເລັດທີ່ມີລັກສະນະໜັກແໜ້ນ ແລະ ພົ້ນເດັ່ນຫຼາຍປະການ ເຊິ່ງອັນທີ່ເປັນພື້ນຖານແມ່ນ: ໄດ້ເອົາໃຈໃສ່ຈັດຕັ້ງປະຕິບັດໜ້າທີ່ນໍາພາ ຄຸ້ມຄອງຂະແໜງ ການຂອງຕົນຖືກຕ້ອງ ແລະ ຄົບຖ້ວນຕາມພາລະບົດບາດ ໜ້າທີ່ ຂອບເຂດສິດ ແລະ ຄວາມຮັບຜິດຊອບຂອງລັດຖະມົນຕີ ໃນຖານະສະມາຊິກລັດຖະບານ ຕາມທີ່ໄດ້ກຳນົດໄວ້ຢູ່ໃນມາດຕາ 27 ແລະ ມາດຕາ 28 ຂອງກົດໝາຍວ່າດ້ວຍລັດຖະບານ ທັງສອດຄ່ອງກັບແນວທາງ ແຜນນະໂຍບາຍ ມະຕິ ຄໍາສັ່ງຂອງພັກ ລັດຖະທໍາມະນູນ ແລະ ກົດໝາຍອື່ນໆຂອງລັດ ທັດສະນະ ແລະ ການຊີ້ນໍາ ມອບໝາຍຂອງຂັ້ນເທິງ ທັງສອດຄ່ອງກັບສະພາບ ຈຸດພິເສດ ເງື່ອນໄຂ ແລະ ຄວາມສາມາດຕົວຈິງທາງດ້ານການຈັດຕັ້ງ ບຸຄະລາກອນ ພື້ນຖານວັດຖຸ-ເຕັກນິກ ແລະ ດ້ານອື່ນໆພາຍໃນຂະແໜງການທີ່ຕົນເອງຮັບຜິດຊອບ.
ທ່ານ ສອນໄຊ ສີພັນດອນໃຫ້ກຽດໂອ້ລົມວ່າ: ໃນເງື່ອນໄຂຂອງການພັດທະນາ ແລະ ການເລັ່ງທວງຂອງສະພາບການໃໝ່ນີ້ ໃຫ້ສະຫາຍເລຂາຄະນະບໍລິງານງານພັກ ລັດຖະມົນຕີກະຊວງພະລັງງານ ແລະ ບໍ່ແຮ່ ຜູ້ໃໝ່ ແລະ ບັນດາສະຫາຍໃນຄະນະ ໃຫ້ສືບຕໍ່ກຳແໜ້ນສະພາບການຂອງໂລກ ພາກພື້ນ ກຳໃຫ້ລະອຽດ ຊັດເຈນ ລວມທັງສະພາບພາຍໃນປະເທດ ໂດຍສະເພາະແມ່ນຢູ່ກະຊວງພະລັງງານ ແລະ ບໍ່ແຮ່ ເພີ່ມທະວີເອົາໃຈໃສ່ວຽກງານການເມືອງແນວຄິດໃຫ້ແຂງແຮງ ຄະນະພັກທຸກຂັ້ນ ຖືເປັນຄວາມຮັບຜິດຊອບຂອງຕົນ ໃຫ້ຮີບຮ້ອນກຳນົດທິດທາງແຜນການ-ການນຳພາຂອງອົງຄະນະພັກຕົນ ສົມທົບແໜ້ນກັບເນື້ອໃນມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ໂດຍຫັນເປັນແຜນລະອຽດຂອງ ຄະແໜງການ ແລ້ວນຳໄປຈັດຕັ້ງເຊື່ອມຊຶມ ແລະ ຄົ້ນຄວ້າຜັນຂະຫຍາຍໃຫ້ແກ່ສະມາຊິກພັກ ພະນັກງານ-ລັດຖະກອນໃນ ທົ່ວຂະແໜງການຂອງຕົນ ໄດ້ຮັບຮູ້ ເຊື່ອມຊຶມໃຫ້ເລິກເຊິ່ງ ທົ່ວເຖິງ ເອົາໃຈໃສ່ວຽກງານການສ້າງ ແລະ ປັບປຸງການຈັດຕັ້ງພັກໃຫ້ເຕີບໃຫຍ່ເຂັ້ມແຂງທາງດ້ານການເມືອງ ແລະ ໜັກແໜ້ນທາງດ້ານການຈັດຕັ້ງ ຕ້ອງເອົາໃຈໃສ່ປັບປຸງຊຸກຍູ້ອົງການຈັດຕັ້ງມະຫາ ຊົນໃຫ້ໜັກແໜ້ນເຂັ້ມແຂງ ນຳພາການພັດທະນາຂະແໜງການ ວຽກງານພະລັງງານ ແລະ ບໍ່ແຮ່ ໂດຍສົ່ງເສີມການນຳໃຊ້ແຮ່ທາດ ນໍ້າ ແລະ ຊັບພະຍາກອນດ້ານອື່ນໆ ໄປພ້ອມໆກັບການປົກປັກຮັກສາຕາມທິດຮັບປະກັນປະສິດທິພາບທີ່ຍາວນານ ຢືນຍົງ ແລະ ມີໝາກຜົນໃນລະດັບສູງ ຜົນກະທົບໜ້ອຍຕໍ່ສິ່ງແວດລ້ອມ ແລະ ສັງຄົມ ເຮັດໃຫ້ພົນລະເມືອງລາວມີສ່ວນຮ່ວມ ເພື່ອດຳລົງຊີວິດ ສ້າງທີ່ຢູ່ອາໄສ ແລະ ການຜະລິດຕາມກົດໝາຍ ປະກອບສ່ວນໃນການສ້າງບາດກ້າວບຸກທະລຸດ້ານການແກ້ໄຂຄວາມທຸກຍາກຂອງປະຊາຊົນ ນຳເອົາປະເທດຊາດເຮົາອອກຈາກຄວາມດ້ອຍພັດທະນາ ສ້າງຄວາມກຽມພ້ອມໃນການຮັບມືກັບການປ່ຽນແປງດິນຟ້າອາກາດ ແລະ ໄພພິບັດທາງທຳມະຊາດທີ່ຈະເກີດຂຶ້ນ.
# ຂ່າວ & ພາບ: ສີພອນ