ການພັດທະນາຫຼັກສູດຂັ້ນ ປ 3 ແມ່ນສ່ວນໜຶ່ງໃນການພັດທະນາຫຼັກສູດຂັ້ນປະຖົມແຫ່ງຊາດ ໄດ້ຮັບການຊີ້ນຳຂອງກະຊວງສຶກສາທິການ ແລະ ກີລາ ໂດຍການສະໜັບສະໜູນທຶນຈາກລັດຖະບານອົດສະຕຣາລີ ແລະ ສະຫະພາບເອີຣົບ ໃນຫຼັກສູດສະບັບປັບປຸງໃໝ່ນີ້ ແມ່ນເນັ້ນໜັກໃສ່ການພັດທະນາທັກສະການຄິດວິເຄາະຢ່າງມີເຫດມີຜົນ ເຊິ່ງເປັນທັກສະທີ່ຈຳເປັນຫຼາຍໃນຍຸກນີ້ ພ້ອມກັນນີ້ ຍັງເປັນການກະຕຸກຍຸກຊູ້ໃຫ້ນັກຮຽນຢາກມີສ່ວນຮ່ວມຢ່າງແຂ່ງຂັນ ເຂົ້າໃນການເຮັດກິດຈະກຳໃນຫົວຂໍ້ຕ່າງໆ ຮຽນຮູ້ເຮັດວຽກຮ່ວມກັນເພື່ອແລກປ່ຽນຄວາມຄິດເຫັນ ການສົນທະນາກ່ຽວກັບຫົວຂໍ້ການຮຽນ ຮຽນວິເຄາະບັນຫາ ແລະ ຊອກຫາແນວທາງແກ້ໄຂ ຫຼັກສູດນີ້ແມ່ນນັກຂຽນຫຼັກສູດຊັ້ນປະຖົມ ຈາກສະຖາບັນຄົ້ນຄວ້າວິທະຍາສາດການສຶກສາ ກະຊວງສຶກສາທິການ ແລະ ກີລາ.
ຈາກການຄົ້ນຄວ້າ ສະແດງໃຫ້ຮູ້ວ່າ ການເຝິກໂຍຄະຈະຊ່ວຍໃຫ້ນັກຮຽນຊັ້ນປະຖົມສຶກສາເສີມສ້າງສະມາທິ ພັດທະນາຄວາມຈື່ຈຳ ຊ່ວຍເພີ່ມຄວາມໝັ້ນໃຈ ສົ່ງຜົນດີຕໍ່ການຮຽນ ແລະ ພຶດຕິກຳໃນຫ້ອງຮຽນ ນອກນີ້ ການຫຼິ້ນໂຍຄະຍັງຊ່ວຍໃຫ້ມີຮ່າງກາຍແຂງແຮງ ສ້າງຄວາມສົມດຸນ ຊ່ວຍໃນເລື່ອງຄວາມຢືດຫົດຂອງຮ່າງກາຍ ນັກກິລາອາຊີບໃນທົ່ວໂລກ ເຝິກຝົນໂຍຄະເພື່ອຊ່ວຍພັດທະນາສະມາທິ ແລະ ຫຼີກລ່ຽງອາການບາດເຈັບຂອງກ້າມເນື້ອເວລາເຮັດກິດຈະກຳກາງແຈ້ງ ໃຊ້ສຳລັບກຽມພ້ອມຮ່າງກາຍ ແລະ ຢືດກ້າມເນື້ອຫຼັງຈາກການແຂ່ງຂັນກກີລາ ຫຼັກສູດການຮຽນໂຍຄະສຳລັບນັກຮຽນຂັ້ນ ປ 3 ນີ້ ຊ່ວຍເສີມສ້າງການເຄື່ອນໄຫວແບບພື້ນຖານໃຫ້ຄ່ອງແຄ້ວ ແລະ ວ່ອງໄວຂຶ້ນ.
ຫຼັກສູດຊັ້ນປະຖົມສຶກສາສະບັບປັບປຸງໃໝ່ ໄດ້ນຳເອົາໂຍຄະ ເຂົ້າສອນໃນວິຊາພະລະສຶກສາ ຂັ້ນ ປ 3 ໂດຍຈະເລີ່ມນຳໃຊ້ພ້ອມກັນທົ່ວປະເທດໃນປີ 2021 ເຊິ່ງການສອນໂຍຄະແມ່ນມີຄຸນປະໂຫຍດຫຼາຍດ້ານ ຊ່ວຍເສີມສ້າງພັດທະນາການຂອງເດັກນ້ອຍ ຊ່ວຍພັດທະນາກາຍະພາບ ແລະ ສົ່ງຜົນດີຕໍ່ການຮຽນ.