ກົມເສດຖະກິດ ກະຊວງການຕ່າງປະເທດ ຈັດກອງປະຊຸມເຜີຍແຜ່ໂຄງການເຝີກອົບຮົມສໍາລັບພະນັກງານໜຸ່ມ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຫົວຂໍ້: ການຮ່ວມມືພາກພື້ນ ແລະ ສາກົນ ” ພາຍໃຕ້ການສະໜັບສະໜູນຈາກກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ຂຶ້ນວັນທີ 19 ມີນາ 2021 ຢູ່ແຂວງຫຼວງພະບາງ ໂດຍເປັນປະທານຂອງທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ທ່ານນາງ ສິລິພອນ ສຸພັນທອງ ຮອງເຈົ້າແຂວງຫຼວງພະບາງ ມີຜູ້ຕາງໜ້າຈາກສູນກາງ ແລະ ຂະແໜງການທີ່ກ່ຽວຂ້ອງຈາກ 7 ແຂວງເຂົ້າຮ່ວມ
ກອງປະຊຸມຄັ້ງນີ້ ເປັນກິດຈະກໍາໜຶ່ງທີ່ ສປປ ລາວ ປະກອບສ່ວນເຂົ້າໃນການສະເຫຼີມສະຫຼອງວັນສ້າງຕັ້ງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄົບຮອບ 5 ປີ (23 ມີນາ 2016-23 ມີນາ 2021) ແລະ ງານສັບປະດາແມ່ນໍ້າຂອງ-ແມ່ນໍ້າລ້ານຊ້າງ ປະຈໍາປີ 2021 ຈຸດປະສົງເພື່ອແນໃສ່ເພີ່ມທະວີຄວາມເຂົ້າໃຈ ແລະ ການຮ່ວມມືໃນຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ກໍຄືຂອບການຮ່ວມມືພາກພື້ນ ແລະ ອTນຸພາກພື້ນແມ່ນໍ້າຂອງ ໂດຍໝູນໃຊ້ທ່າແຮງຂອງການຮ່ວມມືດັ່ງກ່າວ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ໂດຍສະເພາະຢູ່ບັນດາແຂວງພາກເໜືອທີ່ມີຊາຍແດນຕິດຈອດກັບ ສປ ຈີນ.
ກອງປະຊຸມ ຜູ້ເຂົ້າຮ່ວມໄດ້ຮັບຟັງໝາກຜົນການຮ່ວມມືພາຍໃຕ້ຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ເຊິ່ງເປັນນະໂຍບາຍ ແລະ ຍຸດທະສາດສໍາຄັນໜຶ່ງທີ່ ສປ ຈີນ ກໍາລັງຈັດຕັ້ງປະຕິບັດຢູ່ໃນຫຼາຍພາກພື້ນ ໃນນັ້ນ ລວມມີພາກພື້ນອະນຸແມ່ນໍ້າຂອງ ໂດຍຜ່ານການຮ່ວມມືທັງຮູບແບບສອງຝ່າຍ ແລະ ຫຼາຍຝ່າຍໃນພາກພື້ນ ແລະ ສາກົນ. ຄຽງຄູ່ກັນນີ້ ຜູ້ເຂົ້າຮ່ວມໄດ້ແລກປ່ຽນຄວາມຄິດເຫັນກ່ຽວກັບການຮ່ວມມືແມ່ນ້ຳຂອງກັບຄູ່ຮ່ວມພັດທະນາ ໂດຍລົງເລິກຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ລວມທັງຂັ້ນຕອນການສະເໜີໂຄງການ ພາຍໃຕ້ກອງທຶນພິເສດແມ່ນ້ຳຂອງ-ແມ່ນ້ຳລ້ານຊ້າງ
ໃນຕອນທ້າຍ ກອງປະຊຸມໄດ້ຮັບຟັງການພັດທະນາເສດຖະກິດ-ສັງຄົມ ຂອງບັນດາແຂວງພາກເໜືອ ທີ່ໄດ້ຍົກໃຫ້ເຫັນເຖິງກາລະໂອກາດ ແລະ ສິ່ງທ້າທາຍໃນການຮ່ວມມືກັບສາກົນ ໂດຍສະເພາະກັບ ສປ ຈີນ ສຸມໃສ່ແລກປ່ຽນຄຳຄິດຄຳເຫັນເພື່ອຊອກຫາໂອກາດໃນການໝູນໃຊ້ທ່າແຮງການຮ່ວມມືພາກພື້ນ ແລະ ສາກົນຂອງ ສປປ ລາວ ເຂົ້າໃນການພັດທະນາເສດຖະກິດ-ສັງຄົມແຫ່ງຊາດ ກໍຄືຂອງທ້ອງຖິ່ນໃຫ້ມີປະສິດທິຜົນຍິ່ງຂຶ້ນ.
# ຂ່າວ & ພາບ: ລັດເວລາ