ປັດຈຸບັນ ຫຼາຍຄົນແມ່ນໄດ້ເອົາໃຈໃສ່ຕິດຕາມສະພາບການແຜ່ລະບາດຂອງພະບາດ COVID-19 ທີ່ກຳລັງແຜ່ລະບາດໄປໃນທົ່ວໂລກ ຕໍ່ກັບການຕິດຕາມຂໍ້ມູນຂ່າວສານດັ່ງກ່າວ ໄດ້ກໍ່ໃຫ້ບາງບຸກຄົນເກີດຄວາມຢ້ານກົວ ແລະ ວິຕົກກັງວົນ ຈຶ່ງໄດ້ສົ່ງຜົນກະທົບຕໍ່ສຸຂະພາບຈິດຂອງຫຼາຍຄົນ.
ທ່ານ ດຣ ບຸນໂຮມ ກັນທະວົງ ຊ່ຽວຊານຈິດຕະວິທະຍາການແພດ ຫົວໜ້າພະແນກສຸຂະພາບຈິດ ໂຮງໝໍມະໂຫສົດ ໄດ້ກ່າວວ່າ: ສຳລັບບຸກຄົນໃດຫາກເກີດຄວາມວິຕົກກັງວົນ ກໍຄືຄວາມຕຶງຄຽດຕໍ່ການລະບາດຂອງພະຍາດ COVID-19 ຫຼື ບັນຫາອື່ນໆ ເພື່ອຫຼຸດຜ່ອນຄວາມຕຶງຄຽດນັ້ນ ແມ່ນສາມາດປະຕິບັດຄື:
- ຫາທີ່ປຶກສາໂດຍບໍ່ເກັບບັນຫານັ້ນໄວ້ໜັກຈົນເກີນໄປ ຕ້ອງໄປປຶກສານຳຜູ້ເປັນພໍ່ ແມ່ ຜົວ ຫຼື ເມຍ ຄູ-ອາຈານ ແລະ ແພດໝໍ ຈະເປັນຜູ້ໃຫ້ຄວາມຮູ້ຄວາມກະຈ້າງແຈ້ງຕໍ່ພະຍາດນີ້.
- ຫຼີກລ່ຽງປະເຊີນກັບບັນຫາໃນໄລຍະໜຶ່ງ ແລ້ວຈຶ່ງກັບມາໃໝ່.
- ຫາວຽກເຮັດງານທຳພາຍໃນເຮືອນ ເຊິ່ງຈະຊ່ວຍໃຫ້ຫຼຸດຜ່ອນຄວາມຕຶງຄຽດ.
- ຕ້ອງຍອມແພ້ບາງໂອກາດ ແລະ ຍອມຮັບຄວາມເປັນຈິງ.
- ຫຼີກລ່ຽງທີ່ຈະຫວັງໃຫ້ໄດ້ໝົດທຸກຢ່າງ ເພາະສິ່ງນີ້ມີຄວາມສ່ຽງຕໍ່ການຜິດຫວັງ.
- ຢ່າຫວັງໃນຕົວຜູ້ອື່ນຫຼາຍຈົນເກີນໄປ.
- ຄ່ອຍໆເຮັດວຽກໄປແຕ່ລະຢ່າງ ກໍຄືບັນຫາທີ່ເກີດຂຶ້ນປັດຈຸບັນນີ້ ຈະເຮັດໃຫ້ເຊື້ອພະຍາດໂຄວິດ-19 ໝົດໄປໃນໄວໄວນີ້ກໍເປັນໄປໄດ້ຍາກ ເຊິ່ງປັດຈຸບັນທຸກພາກສ່ວນແມ່ນກຳລັງຮ່ວມແຮງຮ່ວມໃຈກັນຕອບຕ້ານກັບພະຍາດດັ່ງກ່າວບໍ່ໃຫ້ແຜ່ລະບາດເປັນວົງກວ້າງ.
- ພະຍາຍາມປັບປຸງທັດສະນະມະນຸດສຳພັນໃຫ້ດີຂຶ້ນແຕ່ລະວັນ ສິ່ງສຳຄັນແມ່ນບໍ່ໃຫ້ໝົກໝົ້ນຢູ່ນຳແຕ່ວຽກໜ້າດຽວ ກໍຈະເຮັດໃຫ້ຊີວິດປະຈຳວັນພວກເຮົາດີຂຶ້ນ ແລະ ຫຼຸດຜ່ອນຄວາມຕຶງຄຽດໄດ້.