ໃນວັນທີ 10 ເມສາ 2020 ຢູ່ສູນກາງຊາວໜຸ່ມປະຊາຊົນປະຕິວັດລາວ ພາກສ່ວນຕ່າງໆໄດ້ມອບເຄື່ອງຊ່ວຍເຫຼືອປະເພດນ້ຳດື່ມ ຜ້າອັດປາກ ແລະ ນ້ຳຢາຂ້າເຊື້ອໃຫ້ແກ່ສູນກາງຊາວໜຸ່ມປະຊາຊົນ ປະຕິວັດລາວ ເພື່ອນຳໃຊ້ເຂົ້າໃນການປ້ອງກັນ ຄວບຄຸມ ແລະ ແກ້ໄຂພະຍາດອັກເສບປອດ COVID-19 ໃນນັ້ນປະກອບມີ:
ຄະນະບໍລິຫານງານຊາວໜຸ່ມກະຊວງການເງິນ ລວມມູນຄ່າ 14 ລ້ານກວ່າກີບ.
ຄະນະຊາວໜຸ່ມກະຊວງວິທະຍາສາດ ແລະ ເຕັກໂນໂລຊີ ມູນຄ່າ 2 ລ້ານກວ່າກີບ.
ບໍລິສັດ ເສັ້ນທາງລົດໄຟ-ລາວຈີນ ເລກທີ 12 ຈຳກັດ ມູນຄ່າ 6 ລ້ານກວ່າກີບ.
ບໍລິສັດ ບໍລິການກໍ່ສ້າງຂົວທາງ ອາຊຽນ ຈຳກັດ ມູນຄ່າ 1.000 ໂດລາສະຫະລັດ.
ເຊິ່ງຕາງໜ້າຮັບໂດຍທ່ານ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ.
ໃນໂອກາດນີ້ ທ່ານ ອາລຸນໄຊ ສູນນະລາດ ກໍໄດ້ສະແດງຄວາມຍ້ອງຍໍ ແລະ ຊົມເຊີຍເປັນຢ່າງສູງ ມາຍັງບັນດາອົງການຈັດຕັ້ງຊາວໜຸ່ມຂອງແຕ່ລະກະຊວງ ແລະ ບໍລິສັດ ທີ່ໄດ້ມີນ້ຳຈິດ ນ້ຳໃຈ ເຕົ້າໂຮມຄວາມສາມັກຄີຂອງບັນດາສະມາຊິກ ປະກອບສ່ວນວັດຖຸປັດໄຈດັ່ງກ່າວ ເພື່ອຊ່ວຍກັນຕ້ານການລະບາດຂອງເຊື້ອພະຍາດ COVID-19 ແລະ ທ່ານຍັງໄດ້ຢືນຢັນວ່າເຄື່ອງດັ່ງກ່າວນີ້ ຈະໄດ້ນຳໄປມອບໃຫ້ແກ່ປະຊາຊົນ ແລະ ເຈົ້າໜ້າໜ້າທີ່-ທີ່ພວມປະຕິບັດງານປ້ອງກັນ ຄວບຄຸມ ແລະ ແກ້ໄຂພະຍາດ COVID-19.