ທີ່ບໍ່ຄຳ-ທອງເຊໂປນ ວຽກງານເກັບກູ້ລະເບີດທີ່ບໍ່ທັນແຕກ (UXO) ເປັນວຽກງານໜຶ່ງທີ່ສຳຄັນ ໃນວົງຈອນການຂຸດຄົ້ນ-ປຸງແຕ່ງ-ຜະລິດບໍ່ແຮ່ ສປປ ລາວ ເປັນປະເທດທີ່ຖືກຖິ້ມລະເບີດຕໍ່ຕົວຄົນທີ່ໜັກໜ່ວງທີ່ສຸດໃນໂລກ ແລະ ບໍ່ຄຳ-ທອງເຊໂປນ ກໍຕັ້ງຢູ່ບ່ອນທີ່ຖືກຖິ້ມລະເບີດລົງໃສ່ຫຼາຍທີ່ສຸດໃນປະເທດ.
ບໍລິສັດລ້ານຊ້າງ ມິເນໂຣນສ໌ ລິມິເຕັດ (ລຊມລ) ບໍ່ຄຳ-ທອງເຊໂປນ ແລະ ກະຊວງປ້ອງກັນປະເທດ ລົງນາມບົດບັນທຶກຄວາມເຂົ້າໃຈກ່ຽວກັບການຮ່ວມມືສະໜັບສະໜູນການເກັບກູ້ລະເບີດທີ່ບໍ່ທັນແຕກຕົກຄ້າງຢູ່ເຂດບໍ່-ຄຳທອງເຊໂປນ ແລະ ຍົກລະດັບຄວາມສາມາດດ້ານວິຊາການກວດກູ້ຂອງກະຊວງປ້ອງກັນປະເທດ ຂຶ້ນວັນທີ 26 ກຸມພາ 2021 ຢູ່ນະຄອນຫຼວງວຽງຈັນ ເຊິ່ງລົງນາມໂດຍທ່ານ ພັ.ອ ວຽງໄຊ ໄຊສະໝອນ ຫົວໜ້າກົມຊ່າງແສງ ກົມໃຫຍ່ເສນາທິການກະຊວງປ້ອງກັນປະເທດ ແລະ ທ່ານ ຊົງລິນ ຊາງ ຜູ້ຈັດການພະແນກບໍລິການເຕັກນິກບໍ່ແຮ່ ບໍລິສັດ ລຊມລ ໂດຍມີທ່ານ ພັ.ທ ປາດຖະໜາ ບຸດຕິຈັກ ຮອງຫົວໜ້າຫ້ອງການກົມໃຫຍ່ເສນາທິການ ກະຊວງປ້ອງກັນປະເທດ ທ່ານ ສະໝານ ອະເນກາ ຜູ້ອຳນວຍການໃຫຍ່ ລຊມລ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ພັ.ອ ວຽງໄຊ ໄຊສະໝອນ ກ່າວວ່າ: ການຮ່ວມມືນີ້ ສະໜັບສະໜູນໃຫ້ວຽກງານເກັບກູ້ລະເບີດບໍ່ທັນແຕກດຳເດີນໄປຢ່າງປອດໄພ ຖືກຕ້ອງຕາມມາດຕະຖານແຫ່ງຊາດຂອງຄະນະກຳມະການແຫ່ງຊາດ ພວກເຮົາຈະສານຕໍ່ການຮ່ວມມືກັບ ລຊມລ ທີ່ມີມາເປັນທົດສະວັດ ເພື່ອບັນລຸພາກປະຕິບັດທີ່ດີທີ່ສຸດ ໃນການເກັບກູ້ ແລະ ການທຳລາຍລະເບີດທີ່ບໍ່ທັນແຕກທີ່ຕົກຄ້າງ.
ນັບແຕ່ການຮ່ວມມືໄດ້ເລີ່ມຕົ້ນຂຶ້ນ ທົດສະວັດຜ່ານມາ ລຊມລ ກະຊວງປ້ອງກັນປະເທດ ຄະນະກຳມະການຄຸ້ມຄອງແຫ່ງຊາດ ແລະ UXO Lao ໄດ້ເຮັດວຽກງານຮ່ວມກັນເພື່ອປັບປຸງມາດຕະຖານການເກັບກູ້ລະເບີດທີ່ບໍ່ທັນແຕກ ປີ 2015 ລຊມລ ແລະ ຄະນະກຳມະການຄຸ້ມຄອງແຫ່ງຊາດ ໄດ້ຮ່ວມກັນສ້າງຫຼັກສູດເຝິກອົບຮົມກ່ຽວກັບການທຳລາຍລະເບີດທີ່ບໍ່ທັນແຕກ ເພື່ອສ້າງຄວາມສາມາດໃຫ້ນັກວິຊາການລາວໄດ້ຮັບຄຸນວຸດທິສູງທີ່ສຸດ ເປັນທີ່ຍອມຮັບໃນລະດັບສາກົນ ນັບແຕ່ປີ 1996 ເປັນຕົ້ນມາ ລຊມລ ໄດ້ລົງທຶນຫຼາຍກວ່າ 51 ລ້ານໂດລາສະຫະລັດ ເກັບກູ້ລະເບີດທີ່ຍັງບໍ່ທັນແຕກກວມເນື້ອທີ່ 5.700 ເຮັກຕາ ແລະ ທຳລາຍລະເບີດທີ່ບໍ່ທັນແຕກ 58.500 ລູກ ລຊມລ ແລະ ຄະນະກຳມະການຄຸ້ມຄອງແຫ່ງຊາດ ສືບຕໍ່ລົງທຶນໃສ່ເຕັກໂນໂລຊີທັນສະໄໝ ເພື່ອປັບປຸງປະສິດທິຜົນການລະບຸ ແລະ ກວດຄົ້ນ UXO ເປັນຕົ້ນ ລະບົບການກວດຫາລູກລະເບີດທີ່ບໍ່ທັນແຕກໃນລະດັບເລິກ “Ultra-TEM II” ສາມາດຈັບສັນຍານລູກລະເບີດບໍ່ທັນແຕກລະດັບເລິກເຖິງ 3,5 ແມັດ ລຊມລ ໄດ້ສືບຕໍ່ປັບປຸງວິທີການກວດຄົ້ນລະເບີດແບບ Fixed Loop Electromagnetic (FLEM) ແລະ ເມື່ອບໍ່ດົນມານີ້ ໄດ້ລົງທຶນໃສ່ອຸປະກອນກວດຄົ້ນແບບໃຊ້ມືຈັບ ດ້ວຍການຊື້ອຸປະກອນກວດຄົ້ນ Vallon VMX-10.
ທ່ານ ສະໝານ ອະເນກາ ກ່າວວ່າ: ພວກເຮົາສືບຕໍ່ຫຼຸດຜ່ອນອຸປະສັກທີ່ມີຜົນກະທົບຖ່ວງດຶງການພັດທະນາຂອງ ສປປ ລາວ ພວກເຮົາສູ້ຊົນເຮັດໃຫ້ຊຸມຊົນປອດໄພ ດ້ວຍການຍົກລະດັບຄວາມສາມາດ ດ້ວຍການລົງທຶນໃນອຸປະກອນ ແລະ ເຜີຍແຜ່ຄວາມຮູ້ກ່ຽວກັບລະເບີດທີ່ບໍ່ທັນແຕກແກ່ຄູ່ຮ່ວມງານ ແລະ ຊຸມຊົນ ລຊມລ ສະແດງຄວາມຮູ້ບຸນຄຸນຢ່າງຍິ່ງ ສຳລັບການຮ່ວມມືຢ່າງຕໍ່ເນື່ອງກັບກະຊວງປ້ອງກັນປະເທດ ຄະນະກຳມະການຄຸ້ມຄອງແຫ່ງຊາດ ແລະ UXO Lao ໃນກິດຈະກຳທີ່ອັນຕະລາຍນີ້.
# ຂ່າວ & ພາບ : ສະບາໄພ