ທະນາຄານອຸດສາຫະກຳ ແລະ ການຄ້າຈີນ ຈຳກັດ (ICBC) ໄດ້ມອບອຸປະກອນການແພດໃຫ້ລັດຖະບານລາວ ເພື່ອປ້ອງກັນພະຍາດ COVID-19 ປະກອບມີຜ້າອັດປາກອະນາໄມສຳລັບທາງການແພດ 150.000 ອັນ ແລະ ເຄື່ອງກວດຫາເຊື້ອໄວຣັສ 2 ເຄື່ອງ ລວມມູນຄ່າ 120.000 ໂດລາສະຫະລັດ ຫຼື ປະມານ 1,07 ຕື້ກວ່າກີບ ພິທີມອບ-ຮັບເຄື່ອງຈຳນວນດັ່ງກ່າວ ຈັດຂຶ້ນວັນທີ 8 ເມສາ 2020 ຢູ່ກະຊວງສາທາລະນະສຸກ ນະຄອນຫຼວງວຽງຈັນ ກ່າວມອບໂດຍທ່ານ ຊຸ່ນ ເຟິ່ງເລີຍ ຜູ້ອຳນວຍການທະນາຄານອຸດສາຫະກຳ ແລະ ການຄ້າຈີນ ຈຳກັດ ແລະ ກ່າວຮັບໂດຍທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ມີພາກສ່ວນທີ່ສອງຝ່າຍເຂົ້າຮ່ວມ.
ທ່ານ ຊຸ່ນ ເຟິ່ງເລີຍ ກ່າວວ່າ: ໃນວັນທີ 24 ມີນາ 2020 ສປປ ລາວ ໄດ້ປະກາດເປັນທາງການວ່າມີຜູ້ຕິດເຊື້ອ COVID-19 ຄົນທຳອິດ ພະນະທ່ານ ສີ ຈິ້ນ ຜິງ ເລຂາທິການໃຫຍ່ ສປ ຈີນ ໄດ້ມີຄວາມຫ່ວງໄຍເປັນຢ່າງຍິ່ງ ຕໍ່ກັບຄວາມຫຍຸ້ງຍາກໃນການຄວບຄຸມ ແລະ ປ້ອງກັນການລະບາດຂອງ COVID-19 ຢູ່ ສປປ ລາວ ທ່ານໄດ້ມີຄຳສັ່ງໃຫ້ຈັດຕັ້ງຄະນະຊ່ຽວຊານ ເພື່ອໄປເຮັດວຽກຊ່ວຍ ສປປ ລາວ ໃຫ້ໄວທີ່ສຸດ ພ້ອມທັງໄດ້ຊ່ວຍເຫຼືອອຸປະກອນການແພດ ໂດຍອີງຕາມສະພາບຈຳເປັນຕົວຈິງຂອງລາວ ຝ່າຍຈີນຈະສືບຕໍ່ໃຫ້ການສະໜັບສະໜັບໜູນ ແລະ ຊ່ວຍເຫຼືອຢ່າງຮອບດ້ານ.
ຫຼັງຈາກມີການປະກາດຂ່າວຢ່າງເປັນທາງການ ກ່ຽວກັບ COVID-19 ໃນລາວ ທະນາຄານ ICBC ສາຂານະຄອນຫຼວງວຽງຈັນ ກໍໄດ້ປະສານງານກັບກະຊວງສາທາລະນະສຸກທັນທີ ເພື່ອເກັບກຳສະພາບການການລະບາດໃນປັດຈຸບັນ ແລະ ຄວາມຕ້ອງການດ້ານອຸປະກອນການແພດ ແລະ ລາຍງານສຳນັກງານໃຫຍ່ຂອງທະນະຄານທັນທີ ໃນເວລາດຽວກັນນັ້ນ ການລະບາດຂອງພະຍາດ COVID-19 ກໍໄດ້ຂະຫຍາຍໄປທົ່ວໂລກ ທະນາຄານ ICBC ໄດ້ວາງແຜນຊ່ວຍເຫຼືອວຽກງານການຕ້ານ COVID-19 ຢູ່ຕ່າງປະເທດຢ່າງຕັ້ງໜ້າ ຫຼັງຈາກໄດ້ຮັບຮູ້ກ່ຽວກັບສະພາບການຢູ່ ສປປ ລາວ ກໍໄດ້ຈັດປະເທດລາວ ເຂົ້າໃນລາຍຊື່ເປົ້າໝາຍທີ່ຈະມອບເຄື່ອງຊ່ວຍເຫຼືອ ແລະ ຊ່ວຍຊອກຫາແຫຼ່ງຈຳໜ່າຍອຸປະກອນ ແລະ ເສັ້ນທາງການຂົນສົ່ງ.
ທະນາຄານ ICBC ໄດ້ປຸກລະດົມສາຂາທົ່ວ ສປ ຈີນ ເພື່ອຊ່ວຍຊອກຫາແຫຼ່ງຈຳໜ່າຍອຸປະກອນ ແຕ່ລະສາຂາກໍໄດ້ຕອບສະໜອງຢ່າງຕັ້ງໜ້າ ພາຍໃນ 1 ມື້ ສາຂາຈ່ຽງຊີກໍສາມາດຈັດຊື້ຜ້າອັດປາກອະນາໄມສຳລັບທາງການແພດໄດ້ 150.000 ອັນ ພາຍໃຕ້ການປະສານງານຊ່ວຍເຫຼືອຈາກສຳນັກງານໃຫຍ່ ທະນາຄານ ICBC ສາຂານະຄອນຫຼວງວຽງຈັນ ແລະ ສາຂາຈ່ຽງຊີ ສາມາດປະສານງານກັນໄດ້ຢ່າງວ່ອງໄວ ເຮັດໃຫ້ການຈັດຊື້ ແລະ ການຂົນສົ່ງຜ່ານໄປໄດ້ຢ່າງລຸລ່ວງ.
ໃນການປະສານງານກັບກະຊວງສາທາລະນະສຸກຂອງທະນາຄານພວກເຮົາ ຍັງໄດ້ຮັບຮູ້ຕື່ມອີກວ່າ ໃນປັດຈຸບັນ ເຄື່ອງກວດຫາເຊື້ອໄວຣັສຢູ່ ສປປ ລາວ ຍັງຂາດແຄນ ເຮັດໃຫ້ການກວດຫາເຊື້ອຍັງມີຄວາມຫຍຸ້ງຍາກຫຼາຍ ທະນາຄານ ICBC ສຳນັກງານໃຫຍ່ ກໍໄດ້ປະສານງານຜ່ານ 2 ສາຂາພາຍໃນ ແລະ ຕ່າງປະເທດອີກຄັ້ງໜຶ່ງ ກໍຄືສາຂານະຄອນຫຼວງວຽງຈັນ ແລະ ສາຂາຫູໜານ ໂດຍໄດ້ພົວພັນຫາຫົວໜ່ວຍຜະລິດອຸປະກອນຢູ່ແຂວງຫູໜານທັນທີ ຜ່ານການແລກປ່ຽນຂໍ້ມູນຫຼາຍຄັ້ງ ລະຫວ່າງຜູ້ຜະລິດ ແລະ ກະຊວງສາທາລະນະສຸກລາວ ສຸດທ້າຍກໍສະຫຼຸບໄດ້ຂະໜາດຂອງເຄື່ອງມື ຂອບເຂດການນຳໃຊ້ ແລະ ຂໍ້ມູນອື່ນໆ ໃຊ້ເວລາທັງໝົດພຽງໜຶ່ງອາທິດ ກໍສາມາດສຳເລັດຂັ້ນຕອນການຈັດຊື້ ແລະ ຂົນສົ່ງອອກຈາກສາງຊາ.
ທະນາຄານ ICBC ໄດ້ປະຕິບັດພັນທະຕໍ່ສັງຄົມຢ່າງຕັ້ງໜ້າ ການຮ່ວມມືກັບສັງຄົມລາວຕ້ານ COVID-19 ແມ່ນການສະແດງອອກທີ່ເປັນຮູບປະທຳຂອງຄູ່ຮ່ວມຊະຕາກຳ ຄືດັ່ງກັບຄຳເວົ້າຂອງທ່ານ ຈຽງຈ້າຍຕົ່ງ ເອກອັກຄະລັດຖະທູດ ສປ ຈີນ ປະຈຳ ສປປ ລາວ ທີ່ວ່າ: ພະຍາດເຖິງຈະຮ້າຍແຮງປານໃດ ແຕ່ຄວາມຮັກແພງຈະເອົາຊະນະໄດ້ ການທີ່ມີພູຜາສາຍນ້ຳຕິດຈອດກັນ ຕ່າງຊ່ວຍຊູ້ຍູ້ໜູນ ເປັນພຶດຕິກຳຕົວຈິງທີ່ສ່ອງແສງໃຫ້ເຫັນເຖິງຄູ່ຮ່ວມຊະຕາກຳລາວ-ຈີນຢ່າງແທ້ຈິງ ລາວ-ຈີນຈະມີອະນາຄົດທີ່ສົດໃສກວ່າເກົ່າ.