ພົບກັນວັນນີ້ມີເລື່ອງກ່ຽວກັບການສົ່ງເສີມບົດບາດ ຍິງ-ຊາຍ ທີ່ຫວຽດນາມ ຕໍ່ໃສ່ເລື່ອງຂັ້ນຕອນການປະຕິບັດກົດໝາຍແຮງງານສະບັບໃໝ່ຂອງ ສ ເກົາຫຼີ.
ທີ່ ຫວຽດນາມ: ໃນປີ 2006 ສະພາແຫ່ງຊາດຫວຽດນາມ ໄດ້ລົງມະຕິຮັບຮອງເອົາກົດໝາຍວ່າດ້ວຍຄວາມສະເໝີພາບ ລະຫວ່າງ ຍິງ-ຊາຍ ເຊິ່ງມີຜົນບັງຄັບໃຊ້ໃນປີ 2007 ເປັນຕົ້ນມາ ພາຍໃຕ້ກົດໝາຍດັ່ງກ່າວ ບົດບາດ ຍິງ-ຊາຍ ໃນຫວຽດນາມ ໄດ້ຮັບການພັດທະນາໃຫ້ດີຂຶ້ນແບບກະໂດດຂັ້ນຕາມລຳດັດ ທາງດ້ານການເມືອງ ສັງຄົມ ແລະ ເສດ ຖະກິດ ເຊິ່ງມີຕົວຢ່າງດັ່ງຕໍ່ໄປນີ້: ຈຳນວນສະມາຊິກສະພາແຫ່ງຊາດ ເຊິ່ງເປັນເພດຍິງນັ້ນໄດ້ບັນລຸ 27,1% ສູງກວ່າຕົວເລກສະເລ່ຍລະດັບໂລກ ເຊິ່ງຢູ່ໃນອັດຕາ 23,4% ແລະ ສູງກວ່າຕົວເລກສະເລ່ຍ ສສຊ ເພດຍິງໃນອາຊີ ເຊິ່ງຢູ່ໃນຕົວເລກ 18,6% ນັ້ນຄືຖານະບົດບາດທາງດ້ານການເມືອງ ສ່ວນທາງເບື້ອງເສດຖະກິດນັ້ນ ຈຳນວນເພດຍິງທີ່ຄອງຕຳແໜ່ງການນຳໃນບັນດາບໍລິສັດກໍໄດ້ເພີ່ມຈາກ 4% ໃນປີ 2009 ມາເປັນ 27,8% ໃນປີ 2017 ເຊິ່ງເປັນຕົວເລກສູງສຸດໃນເຂດອາຊີຕາເວັນອອກສຽງໃຕ້ (ອາຊຽນ) ທາງດ້ານວິທະຍາສາດນັ້ນແມ່ຍິງຫວຽດນາມ ກໍມີຜົນສຳເລັດຢ່າງໃຫຍ່ຫຼວງ ຕົວຢ່າງນ້ອຍໆໜຶ່ງກໍຄື ທ່ານນາງ ຫງວຽນ ທິຮຽບ (Nguyen Thi Hiep) ປອ ໃນຂົງເຂດວຽກຄົ້ນຄວ້າກ່ຽວກັບຊີວະວິທະຍາການແພດ ປະຈຳມະຫາວິທະຍາໄລສາກົນ ນະຄອນໂຮ່ຈີມິງ ໄດ້ຖືກຄັດເລືອກໃຫ້ເປັນ 1 ໃນຈຳນວນນັກວິທະຍາສາດດີເດັ່ນ 100 ຄົນຂອງທະວີບອາຊີ ປະຈຳປີ 2019 ນອກຈາກນັ້ນ ທາງການຫວຽດນາມ ຍັງໄດ້ສ້າງຕັ້ງລາງວັນໂກວາເລັບສະກາຢາ (Kovalevskaya) ເພື່ອມອບໃຫ້ນັກວິທະຍາສາດຍິງຫວຽດນາມທີ່ດີເດັ່ນປະຈຳທຸກໆປີ ໂກວາເລັບສະກາຢາ ແມ່ນຊື່ນັກຄະນິດສາດຍິງທີ່ດີເດັ່ນລະດັບໂລກຂອງຣັດເຊຍ ເວົ້າໄດ້ວ່າ ກົດໝາຍວ່າດ້ວຍຄວາມສະເໝີພາບໃນບົດບາດຍິງ-ຊາຍ ທີ່ມີຜົນສັກສິດເປັນເວລາເກືອບ 14 ປີຜ່ານມານັ້ນໄດ້ກາຍເປັນໄມ້ງັດທີ່ສຳຄັນໃນການຍົກສູງບົດບາດຂອງແມ່ຍິງຫວຽດນາມທາງດ້ານການເມືອງ ສັງຄົມ ແລະ ເສດຖະກິດ.
ທີ່ ສ ເກົາຫຼີ: ເລີ່ມແຕ່ວັນທີ 1 ກໍລະກົດ ປີ 2018 ເປັນຕົ້ນມາ ກົດໝາຍວ່າດ້ວຍແຮງງານສະບັບໃໝ່ຂອງປະເທດນີ້ ໄດ້ມີຜົນໃນທາງປະຕິບັດຢ່າງເປັນທາງການ ໂດຍໄດ້ປັບຫຼຸດຊົ່ວໂມງເຮັດວຽກຂອງພະນັກງານລົງຕາມລາຍລະອຽດດັ່ງນີ້: ເຈົ້າຂອງກິດຈະການຂະໜາດໃຫຍ່ ເຊິ່ງມີພະນັກງານຈຳນວນແຕ່ 300 ຄົນຂຶ້ນໄປ ຕ້ອງປັບຫຼຸດຊົ່ວໂມງເຮັດວຽກ ຈາກ 68 ຊົ່ວໂມງຕໍ່ອາທິດ ມາເປັນ 52 ຊົ່ວໂມງ ໃນ 52 ຊົ່ວໂມງນີ້ ຍັງໄດ້ແຍກລະອຽດຕື່ມຄື: 40 ຊົ່ວໂມງເຮັດວຽກຕາມປົກກະຕິ (ແຕ່ວັນຈັນຫາວັນສຸກ) ແລະ ອີກ 12 ຊົ່ວໂມງ ສຳລັບການອອກແຮງງານໃນວັນເສົາ ແລະ ອາທິດ ກົດໝາຍສະບັບນີ້ມີໄລຍະປະຕິບັດຕ່າງກັນ ຄື ນັບແຕ່ວັນທີ 1 ກໍລະກົດເປັນຕົ້ນມາ ແມ່ນສຳລັບຂະແໜງປະກອບການຂະໜາດໃຫຍ່ທີ່ມີພະນັກງານແຕ່ 300 ຄົນຂຶ້ນໄປ ສຳລັບຢູ່ຂະແໜງປະກອບການຂະໜາດກາງ (ມີພະນັກງານແຕ່ 50-299 ຄົນ) ເລີ່ມປະຕິບັດກົດໝາຍນີ້ແຕ່ວັນທີ 1 ມັງກອນ ປີ 2020 ເປັນຕົ້ນມາ ສ່ວນຂະແໜງປະກອບການຂະໜາດນ້ອຍ (ມີພະນັກງານແຕ່ 5-49 ຄົນ) ນັ້ນ ມີກຳນົດປະຕິບັດກົດໝາຍສະບັບນີ້ແຕ່ວັນທີ 1 ກໍລະກົດ ປີ 2021 ເປັນຕົ້ນໄປ.