ຫາກເພື່ອນຜູ້ອ່ານຕິດຕາມຂ່າວສານບ້ານເມືອງ ກໍຄື ທົ່ວໂລກແລ້ວຈະຮູ້ວ່າ ຂ່າວເດັ່ນ ແລະ ເປັນຕາຢ້ານກວ່າໝູ່ ຄົງໜີບໍ່ພົ້ນຂ່າວການແຜ່ລະບາດຂອງພະຍາດອັກເສບປອດ ຈາກເຊື້ອຈຸລະໂຣກສາຍພັນໃໝ່ ຫຼື ໄວຣັສໂຄວິດ-19 (Covid-19).
Covid-19 ເປັນພະຍາດທີ່ອັນຕະລາຍ ແລະ ສາມາດຕິດແປດໄດ້ງ່າຍທີ່ສຸດ ເພາະໄລຍະບົ່ມເຊື້ອ ແມ່ນຍາວນານ ແລະ ຈາກຄົນໜຶ່ງສາມາດແຜ່ກະຈາຍສູ່ຫຼາຍໆຄົນ ມາເຖິງປັດຈຸບັນນີ້ ມີທັງໝົດ 71 ປະເທດ ຢືນຢັນວ່າມີການຕິດເຊື້ອພະຍາດດັ່ງກ່າວ ແລະ ທີ່ສຳຄັນບໍ່ມີຢາປິ່ນປົວພະຍາດດັ່ງກ່າວເທື່ອ ສະນັ້ນ ການປ້ອງກັນຕົນເອງແມ່ນສຳຄັນທີ່ສຸດ.
ເມື່ອວັນທີ 04 ມີນາ 2020 ແລ້ວນີ້ ຜູ້ຂຽນມີໂອກາດເຂົ້າຮັບຟັງການປາຖະກະຖາກ່ຽວກັບການປ້ອງກັນ ສະກັດກັ້ນ ການລະບາດຂອງພະຍາດອັກເສບປອດ ຈາກເຊື້ອຈຸລະໂຣກສາຍພັນໃໝ່ (Covid-19) ຢູ່ຄະນະໂຄສະນາອົບຮົມສູນກາງພັກ ໂດຍການປາຖະກະຖາຂອງທ່ານຮອງສາດສະດາຈານ ດຣ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ສະນັ້ນ ຈຶ່ງຢາກມາບອກເລົ່າຕໍ່ ໂດຍສະເພາະ ຫາງສຽງສັງຄົມທີ່ລະແວງສົງໄສວ່າ ຢູ່ປະເທດເຮົາ ເປັນຫຍັງຈຶ່ງບໍ່ມີກໍລະນີຜູ້ຕິດເຊື້ອ Covid-19.
ການກວດວິເຄາະທຸກກໍລະນີສົງໄສ ແມ່ນມີສູນວິເຄາະ ແລະ ລະບາດວິທະຍາ ເຊິ່ງແມ່ນຫ້ອງວິເຄາະຫຼັກໃນການກວດຢັ້ງຢືນ Covid-19 ເຊິ່ງເປັນຫ້ອງວິເຄາະທີ່ຮັບຮອງຈາກອົງການອະນາໄມໂລກ ແລະ ໄດ້ຮັບການກວດສອບຄຸນນະພາບຈາກພາຍນອກ (EQA) ໃນການກວດ MERS CORONA ນອກນັ້ນຍັງມີຫ້ອງວິເຄາະປັດສະເຕີລາວ ແລະ ຫ້ອງວິເຄາະ LOMWRU Covid-19 ທີ່ໂຮງໝໍມະໂຫສົດ ທີ່ຮ່ວມກັນຢັ້ງຢືນພະຍາດດັ່ງກ່າວ ພ້ອມທັງມີຊ່ຽວຊານອົງການອະນາໄມໂລກ ຕິດຕາມການກວດຢ່າງໃກ້ຊິດ ຜ່ານມາເພື່ອຮັບປະກັນຄຸນນະພາບຂອງການກວດຢັ້ງຢືນທາງຫ້ອງວິເຄາະ ກໍໄດ້ສົ່ງຜົນຕົວຢ່າງທີ່ກວດໃຫ້ຜົນລົບ 20 ຕົວຢ່າງ ໄປກວດຢັ້ງຢືນຄຸນນະພາບທີ່ຫ້ອງວິເຄາະ ອ້າງອີງຂອງອົງການອະນາໄມໂລກ ທີ່ປະເທດອົດສະຕຣາລີ ເຊິ່ງຜົນກວດແມ່ນໃຫ້ຜົນລົບຄືກັບຜົນກວດຂອງເຮົາທັງໝົດ ມາຮອດປັດຈຸບັນໄດ້ກວດຕົວຢ່າງທັງໝົດ 47 ຕົວຢ່າງ ທັງໝົດແມ່ນໃຫ້ຜົນລົບ (-) ບໍ່ພົບເຊື້ອ Covid-19.
ຄືເວົ້າໃນເບື້ອງຕົ້ນວ່າ ພະຍາດອັນນີ້ ການປ້ອງກັນຕົນເອງແມ່ນສຳຄັນທີ່ສຸດ ເຊິ່ງຕົ້ນຕໍແມ່ນສັງເກດອາການ ດັ່ງນີ້:
– ໄຂ້ ຂີ້ມູກຍ້ອຍ ໄອ ແລະ ເຈັບຄໍ ບາງຄັ້ງຖ້າອາການໜັກຂຶ້ນ ອາດເຮັດໃຫ້ຫາຍໃຈຍາກ ຫຼື ເກີດພະຍາດອັກເສບປອດ ອາການຈະສະແດງພາຍໃນ 14 ວັນ ພາຍຫຼັງຈາກທີ່ໄດ້ສຳຜັດກັບເຊື້ອພະຍາດ.
ການປ້ອງກັນຕົນເອງ: ໝັ່ນລ້າງມືດ້ວຍສະບູ ແລະ ນ້ຳ ຫຼື ໃຊ້ເຈວລ້າງມືທີ່ມີສ່ວນປະສົມຂອງເຫຼົ້າ ຫຼີກລ່ຽງການສຳຜັດຕາ ດັງ ແລະ ປາກ ຖ້າບໍ່ໄດ້ລ້າງມື ຫຼີກລ່ຽງການສຳຜັດໃກ້ຊິດກັບຄົນທີ່ມີອາການໄຂ້ ແລະ ໄອ ເມື່ອເວລາໄອ ຫຼື ຈາມ ຕ້ອງປິດປາກ ແລະ ດັງດ້ວຍຂໍ້ສອກ ຫຼື ໃຊ້ເຈ້ຍອະນາໄມ ເຈ້ຍອະນາໄມທີ່ໃຊ້ແລ້ວໃຫ້ຖິ້ມໃສ່ຖັງຂີ້ເຫຍື້ອທີ່ມີຝາປິດ.
ທ່ານສາມາດສອບຖາມຂໍ້ມູນເພີ່ມເຕີມ ໂດຍການໂທສາຍດ່ວນ 166 ບໍ່ເສຍຄ່າໂທໄດ້ຕະຫຼອດ 24 ຊົ່ວໂມງ.
ສະເໜີບອກເລົ່າ
ໂດຍ: ແນວລາວ