ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມຄະນະ ເຄື່ອນໄຫວຢ້ຽມຢາມພື້ນຖານການຜະລິດ ຢູ່ແຂວງໄຊຍະບູລີ ວັນທີ 3 ມີນາ 2020 ໂດຍໄດ້ຮັບການຕ້ອນຮັບຈາກທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມດ້ວຍອຳນາດການປົກຄອງແຂວງ ແລະ ພາກສ່ວນກ່ຽວຂ້ອງ.
ໂອກາດນີ້ ກໍໄດ້ໄປໄປຢ້ຽມຢາມສະຫະກອນສົ່ງເສີມກະສິກຳຢູ່ເມືອງຫົງສາ ເຊິ່ງສະຫະກອນດັ່ງກ່າວ ສ້າງຕັ້ງຂຶ້ນວັນທີ 20 ກໍລະກົດ 2018 ມີສະມາຊິກ 137 ຄອບຄົວ ມີຄະນະກຳມະການບໍລິຫານ 7 ທ່ານຄະນະກວດກາ 3 ທ່ານ ເປັນຕົວແທນຂອງສະມາຊິກ (ຊາວບ້ານ) ເຊິ່ງໄດ້ຮັບການເລືອກຕັ້ງໃນກອງປະ ຊຸມໃຫຍ່ຂອງສະມາຊິກ ໂດຍບໍລິສັດໄຟຟ້າຫົງສາຈຳກັດ ເປັນຜູ້ຈັດຕັ້ງ ແລະ ສະໜັບສະໜູນ ກົມພັດທະ ນາຊົນນະບົດ ແລະ ສະຫະກອນ ກະຊວງກະສິກຳ ແລະ ປ່າໄມ້ ແລະ ໜ່ວຍງານຄຸ້ມຄອງການຍົກຍ້າຍຈັດສັນເປັນທີ່ປຶກສາ ສະຫະກອນສົ່ງເສີມກະສິກຳເມືອງຫົງສາ ເປັນສະຫະກອນຂະໜາດນ້ອຍ ການດຳເນີນທຸລະກິດຍັງບໍ່ກວ້າງຂວາງ ທຶນບໍ່ຫຼາຍ ການຜະລິດຂອງສະມາຊິກຍັງບໍ່ສາມາດຕອບສະໜອງຄວາມຕ້ອງການຂອງຕະຫຼາດ ແຕ່ສະຫະກອນກໍມີການເຕີບໃຫຍ່ຂະຫຍາຍຕົວຂຶ້ນເລື້ອຍໆ ດ້ວຍຮູບແບບທີ່ສະມາຊິກທຸກຄົນເປັນເຈົ້າຂອງສະຫະກອນ ມີການປະກອບຫຸ້ນໃນແຕ່ລະເດືອນ ມີການວາງແຜນການຜະລິດຮ່ວມກັນ ແຈ້ງຄວາມຕ້ອງການຂອງຕະຫຼາດ ແລະ ຄ້ຳປະກັນລາຄາຜົນຜະລິດ/ຜະລິດຕະພັນໃຫ້ສະມາຊິກທຸກເດືອນ ສະຫະກອນໄດ້ສະໜອງປັດໄຈການຜະລິດໃຫ້ສະມາຊິກ ສະມາຊິກເປັນຜູ້ຜະລິດ ແລະ ຂາຍຄືນໃຫ້ສະຫະກອນ ສະຫະກອນເປັນຜູ້ບໍລິຫານຈັດການດ້ານຄຸນນະພາບ ການປຸງແຕ່ງ ການຫຸ້ມຫໍ່ ແລະ ການຕະຫຼາດ ປັດຈຸບັນສະຫະກອນມີລູກຈ້າງ 4 ຄົນ ແລະ ມີພະນັກງານບໍລິສັດໄຟຟ້າຫົງສາຈຳກັດ 16 ຄົນ ເປັນຜູ້ອຳນວຍຄວາມສະດວກ.
ຈາກນັ້ນ ທ່ານນາຍົກລັດຖະມົນຕີ ພ້ອມຄະນະ ກໍໄດ້ໄປຢ້ຽມຢາມໂຮງໄຟຟ້າພະລັງງານຄວາມຮ້ອນຫົງສາ ທີ່ມີມູນຄ່າການລົງທຶນ 3.710 ລ້ານໂດລາສະຫະລັດ ອາຍຸສຳປະທານ 25 ປີ (2016-2041) ໃນເນື້ອທີ່ 76,2 ກິໂລຕາແມັດ ມີກຳລັງການຕິດຕັ້ງ 3 ໜ່ວຍ x 626 ເມກາວັດ ກຳລັງການຜະລິດລວມ 1.878 ເມກາວັດ ຈຳໜ່າຍໄຟຟ້າໃຫ້ລັດວິສາຫະກິດໄຟຟ້າລາວ 100 ເມກາວັດ ແລະ ການໄຟຟ້າຝ່າຍຜະລິດແຫ່ງປະເທດໄທ 1.473 ເມກາວັດ ນອກນີ້ ຍັງໄດ້ໄປຢ້ຽມຢາມ ແລະ ຊຸກຍູ້ພື້ນຖານການຜະລິດຢູ່ເມືອງໄຊຍະບູລີ ໂດຍສະເພາະການຜະລິດເຂົ້າສະອາດເປັນສິນຄ້າຢູ່ບ້ານນາລາ ເຊິ່ງບ້ານດັ່ງກ່າວມີພົນ ລະເມືອງ 744 ຄົນ 142 ຄອບຄົວ ແບ່ງເປັນ 14 ໜ່ວຍ ປະຊາຊົນສ່ວຍຫຼາຍປະກອບອາຊີບຊາວກະສິກອນ ກວມ 60,56% ໃນນີ້ ການປູກເຂົ້າ ແລະ ປູກພືດເປັນສິນຄ້າເປັນຕົ້ນຕໍ ປັດຈຸບັນກຳລັງສຸມໃສ່ການປູກເຂົ້ານາແຊງ ເຊິ່ງສາມາດຈັດຕັ້ງປະຕິບັດໄດ້ 62,3 ເຮັກຕາ ລື່ນແຜນການ 7,3 ເຮັກຕາ ໂດຍແບ່ງອອກເປັນ 3 ກຸ່ມ ຄື: ກຸ່ມຜະລິດແນວພັນເຂົ້າ ມີ 21 ຄອບຄົວ ເນື້ອທີ່ 19,45 ເຮັກຕາ ເປັນການຜະລິດແນວພັນເຂົ້າລະດູທຳອິດຂອງກຸ່ມ ມີຊື່ວ່າເຂົ້າຖິ່ນແກ້ວ 17 ຮຸ່ນ 3 ກຸ່ມຜະລິດເຂົ້າສະອາດເພື່ອເປັນສິນຄ້າ ມີ 47 ຄອບຄົວ ເນື້ອທີ່ 38,47 ເຮັກຕາ ແລະ ກຸ່ມທີ່ປູກເຂົ້າທົ່ວໄປ ທີ່ບໍ່ໄດ້ຮ່ວມໂຄງການ ມີ 39 ຄອບຄົວ ເນື້ອທີ່ 4,38 ເຮັກຕາ.
ໂອກາດນີ້ ທ່ານນາຍົກລັດຖະມົນຕີ ກໍໄດ້ມອບທຶນສົມທົບຊ່ອຍຊື້ອຸປະກອນການຜະລິດເຄື່ອງຄັດເມັດພັນເຂົ້າໃຫ້ປະຊາຊົນພາຍໃນບ້ານ ຈາກນັ້ນ ກໍໄດ້ໄປຢ້ຽມຢາມໂຄງການປູກໝາກຖົ່ວເຫຼືອງ ຢູ່ເມືອງພຽງ ເນື້ອທີ່ 489 ເຮັກຕາ ເປັນການລົງທຶນຂອງນັກທຸລະກິດຈີນ ໃນຮູບແບບເຊົ່າດິນຈາກປະຊາຊົນ ແລະ ນຳໃຊ້ແຮງງານລາວ 800-1.000 ຄົນ ທັງປູກ ແລະ ເກັບກ່ຽວ ບໍລິສັດຈີນເປັນຜູ້ສະໜອງທຶນ ແລະ ເຕັກ ນິກໃນການປູກ ເຮັດໃຫ້ປະຊາຊົນມີລາຍໄດ້ສະເລ່ຍ 150.000 ກີບຕໍ່ຄົນຕໍ່ວັນ.