ແຕ່ທ້າຍເດືອນຕຸລາ ຫາຕົ້ນເດືອນພະຈິກປີ 2020 ໄດ້ມີຂ່າວກ່ຽວກັບຂະບວນການເຄື່ອນໄຫວດ້ານນິຕິກຳໃນປະເທດສະກອດແລນ ຂອງສະຫະລາຊະອານາຈັກອັງກິດ (UK) ເຊິ່ງຢູ່ບ້ານເຮົາເອີ້ນກັນວ່າປະເທດອັງກິດ ແລະ ໃນປະເທດນິວຊີແລນ ຫຼື ນູແວນເຊລັງ (ຕາມພາສາຝຣັ່ງ) ຊຶ່ງລາຍລະອຽດມີດັ່ງລຸ່ມນີ້:
ທີ່ ສະກອດແລນ-ສະຫະລາຊະອານາຈັກອັງກິດ (UK) ນັ້ນ ປະກອບດ້ວຍ 4 ປະເທດຄື: ອັງກິດ ເວວ ສະກອດແລນ ແລະ ອຽກລັງເໜືອໃນວັນທີ 8 ເດືອນພະຈິກ 2020 ຜ່ານມາ ໄດ້ມີຂ່າວວ່າທາງການຂອງສະກອດແລນໄດ້ອອກກົດໝາຍເປັນອັນສະເພາະຂອງຕົນ ທີ່ຫ້າມພໍ່ແມ່ໃຊ້ຄວາມຮຸນແຮງຕໍ່ລູກດ້ວຍການຕີ ບໍ່ວ່າຈະຕີເພື່ອສັ່ງສອນ ຫຼື ຕີເພື່ອໃຫ້ເຂັດຫຼາບຈາກການປະພຶດແນວບໍ່ຖືກຕ້ອງ ເປັນອັນວ່າສະກອດແລນໄດ້ກາຍເປັນປະເທດທຳອິດໃນສະຫະລາຊະອານາຈັກອັງກິດ ທີ່ມີກົດໝາຍຫ້າມພໍ່ແມ່ຜູ້ປົກ ຄອງຕີລູກເຕົ້າຂອງຕົນ ພາຍໃຕ້ກົດໝາຍດັ່ງກ່າວການລົງໂທດທາງຮ່າງກາຍທຸກຮູບແບບຕໍ່ເດັກ ໃນສະກອດແລນ ກາຍເປັນສິ່ງຜິດກົດໝາຍ ແລະ ເດັກນ້ອຍໃນປະເທດນີ້ ກໍໄດ້ຮັບການປົກປ້ອງດ້ວຍກົດໝາຍເຊັ່ນດຽວກັບຜູ້ໃຫຍ່ ໃນໄລຍະຜ່ານມາ ກົດໝາຍສະກອດແລນໄດ້ກຳນົດໃຫ້ພໍ່ແມ່ ກໍຄື ຜູ້ປົກຄອງສາມາດໃຊ້ຮູບການລົງໂທດຕໍ່ເດັກຕາມເຫັນສົມຄວນ ແຕ່ຫ້າມໃຊ້ຝາມືຕົບຕ່ອຍ ຫຍຸມ ຢິກ ບິດ ຕີ ຫຼື ຟາດດ້ວຍວັດຖຸທຸກຊະນິດ.
ກົດໝາຍສະບັບນີ້ ໄດ້ມີຜົນບັງຄັບໃຊ້ແລ້ວ ມາແຕ່ວັນທີ 7 ພະຈິກ 2020 ກົດໝາຍໄດ້ຮັບສຽງສະໜັບສະໜູນຈາກລັດຖະສະພາ ດ້ວຍຄະແນນສຽງ 84 ສຽງ ຕໍ່ 29 ສຽງ ກົດໝາຍຫ້າມຜູ້ເປັນພໍ່-ແມ່ ຫຼື ຜູ້ປົກຄອງໃຊ້ຄວາມຮຸນແຮງດ້ວຍການຕ່ອຍຕີ ຫຼື ທຳຮ້າຍຮ່າງກາຍນີ້ ຫຼາຍປະເທດໃນເອີຣົບ ໄດ້ປະກາດໃຊ້ມາແລ້ວ ສ່ວນຢູ່ໃນສະຫະພັນຣັດເຊຍນັ້ນ ຂໍ້ຫ້າມດັ່ງກ່າວໄດ້ກຳນົດໄວ້ໃນກົດໝາຍ ຕ້ານການໃຊ້ຄວາມຮຸນແຮງໃນຄອບຄົວ ແຕ່ທາງການຣັດເຊຍໄດ້ກຳນົດມາດຕະການຫ້າມໃຫ້ຢູ່ໃນລະດັບທີ່ເໝາະສົມກັບເງື່ອນໄຂ ເພື່ອບໍ່ໃຫ້ເດັກສວຍໂອກາດໃຊ້ສິດຂອງຕົນເອງເກີນຂອບເຂດ ຄືຢູ່ບາງປະເທດໃນເອີຣົບ ກົດໝາຍຣັດເຊຍນັ້ນ ໄດ້ກຳນົດໂທດໜັກພໍສົມຄວນ ຕໍ່ການໃຊ້ຄວາມຮຸນແຮງໃນຄອບຄົວດ້ວຍການທຳຮ້າຍຮ່າງກາຍ.
ທີ່ນິວຊີແລນ: ໃນວັນທີ 17 ເດືອນຕຸລາ 2020 ຊຶ່ງເປັນມື້ເລືອກຕັ້ງທົ່ວປະເທດຂອງນິວຊີ
ແລນນັ້ນ ທາງການຂອງປະເທດນີ້ ໄດ້ເປີດໃຫ້ປະຊາຊົນລົງມະຕິກ່ຽວກັບ 2 ກົດໝາຍ ຄື: ກົດ
ໝາຍ “ກາຣຸນະຄາດ” ແລະ ກົດໝາຍການນຳໃຊ້ກັນຊາ ເພື່ອຄວາມຜ່ອນຄາຍ ຜົນປາກົດອອກມາວ່າກົດໝາຍກາຣຸນະຄາດ ໄດ້ຮັບສຽງສະໜັບສະໜູນ 65,2% ສ່ວນສຽງຄັດຄ້ານນັ້ນ ມີຢູ່
33,8% ສຳລັບຮ່າງກົດໝາຍການນຳໃຊ້ກັນຊາເພື່ອຄວາມຜ່ອນຄາຍນັ້ນ ໄດ້ຖືກຄັດຄ້ານດ້ວຍສຽງປະຊາມະຕິ 53,1% ລື່ນສຽງເຫັນດີທີ່ມີ 46,1% ເປັນອັນວ່າ ກົດໝາຍນີ້ໄດ້ຕົກໄປໂດຍອັດຕະໂນມັດ ໃນທີ່ຈິງແລ້ວ ຮ່າງກົດໝາຍ ກາຣຸນະຄາດ ນີ້ ທາງລັດຖະສະພານິວຊີແລນໄດ້ໃຫ້ຄວາມເຫັນດີ ແຕ່ປີ 2019 ພຸ້ນ ແຕ່ບໍ່ໄດ້ບັງຄັບໃຊ້ເທື່ອເພາະເຫັນວ່າເປັນບັນຫາອ່ອນໄຫວທີ່ ຈຳຕ້ອງໄດ້ຜ່ານການລົງປະຊາມະຕິ ຢັ່ງສຽງພົນລະເມືອງໃນທົ່ວປະເທດ ກົດໝາຍກາຣຸນະຄາດ ແມ່ນກົດໝາຍທີ່ອະນຸຍາດໃຫ້ແພດໝໍສາມາດປິດຊີວິດຂອງຄົນເຈັບໄດ້ ໂດຍການຂໍຮ້ອງຂອງຄົນເຈັບທີ່ໃກ້ຈະເສຍຊີວິດ ຄື ຍັງຈະມີຊີວິດສືບຕໍ່ໄດ້ບໍ່ເກີນ 6 ເດືອນ ເງື່ອນໄຂໃນການຊ່ວຍປິດຊີວິດນັ້ນ ຕ້ອງຜ່ານການຂໍຮ້ອງຂອງຄົນເຈັບເອງ ຍ້ອນບໍ່ຕ້ອງການທົນທຸກທໍລະມານຕໍ່ຄວາມເຈັບປວດອີກຕໍ່ໄປ.
ພາຍໃຕ້ກົດໝາຍດັ່ງກ່າວ ການຂໍຮ້ອງຂອງຄົນເຈັບຕ້ອງໄດ້ຮັບຄວາມເຫັນດີຂອງແພດ ທີ່ປິ່ນປົວຄົນເຈັບຜູ້ນັ້ນ ບວກກັບແພດອິດສະຫຼະອີກ 1 ຄົນ ຖ້າແພດທັງສອງຍັງບໍ່ສາມາດຈະຕັດສິນໃຈກໍຕ້ອງໄດ້ມີການປຶກສານຳຈິດຕະແພດຕື່ມອີກ.