ມື້ນີ້ຂໍຊວນທ່ານຜູ້ອ່ານໄປເບິ່ງບ້ານເຂົາເອົາບົດຮຽນກ່ຽວກັບເລື່ອງຜົວໆ ເມຍໆ ກໍຄື ເລື່ອງແຕ່ງດອງຢູ່ອິນເດຍ ແລະ ອົດສະຕຣາລີ ນັ້ນ ເຂົາມີບົດຮຽນເດັດໆແນວໃດແດ່.
ທີ່ ອິນເດຍ: ຂ່າວນີ້ອອກມາຈາກລັດອຸຕຼາ ປະເທດຂອງອິນເດຍ ໃນທ້າຍເດືອນພະຈິກປີກາຍ (2020) ລາຍລະອຽດມີຢູ່ວ່າທາງການຂອງລັດໄດ້ກຳນົດບົດລົງໂທດສຳລັບບຸກຄົນໃດກໍຕາມ ທີ່ໃຊ້ອຳນາດບັງຄັບ ຫຼື ໃຊ້ເລ່ຫຼ່ຽມຕົວະຍົວະຫຼອກລວງໃຫ້ຄົນອື່ນປ່ຽນສາສະໜາເພື່ອການແຕ່ງດອງ ບົດລົງໂທດດັ່ງກ່າວໄດ້ກຳນົດໄວ້ໃນກົດໝາຍຫ້າມບັງຄັບປ່ຽນສາສະໜາເພື່ອການແຕ່ງດອງ ຂ່າວບອກວ່າແຮງກົດດັນໃຫ້ມີກົດໝາຍສະບັບນີ້ນັ້ນມາຈາກກຸ່ມນັກເຄື່ອນໄຫວສາສະໜາຮິນດູ ທີ່ຕໍ່ຕ້ານການແຕ່ງດອງຂ້າມສາສະໜາ ຕົວຢ່າງການແຕ່ງດອງລະຫວ່າງຜູ້ຊາຍທີ່ນັບຖືສາສະໜາອິດສະລາມ ກັບແມ່ຍິງທີ່ເຊື່ອຖືສາສະໜາຮິນດູ ໂດຍຝ່າຍຊາຍມັກຈະບັງຄັບໃຫ້ຝ່າຍຍິງປ່ຽນໄປນັບຖືສາສະໜາອິດສະລາມ ກົດໝາຍສະບັບນີ້ບໍ່ໄດ້ຫ້າມຊາຍ-ຍິງ ຕ່າງສາສະໜາສ້າງຄອບຄົວຮ່ວມກັນມີແຕ່ຫ້າມບັງຄັບຝ່າຍໃດຝ່າຍໜຶ່ງປ່ຽນສາສະໜາເທົ່ານັ້ນເວົ້າໄດ້ວ່າ ອຸຕຼາປະເທດ ເປັນລັດທຳອິດຂອງອິນເດຍທີ່ມີກົດໝາຍລັກສະນະນີ້ທັ້ງໆທີ່ບໍ່ທັນມີການຢັ້ງຢືນຕົວເລກວ່າການແຕ່ງດອງຂ້າມສາສະໜານັ້ນມີຫຼາຍປານໃດຈຸດປະສົງຕົ້ນຕໍຂອງກົດໝາຍສະບັບນີ້ ແມ່ນເພື່ອຫຼຸດຜ່ອນການປ່ຽນສາສະໜາຢ່າງຜິດກົດໝາຍຊຶ່ງສົ່ງຜົນກະທົບຢ່າງຮ້າຍແຮງຕໍ່ຝ່າຍຍິງ ກົດໝາຍໄດ້ກຳນົດບົດລົງໂທດຕໍ່ຜູ້ຝ່າຝືນດ້ວຍໂທດຈຳຄຸກສູງສຸດ 5 ປີ ນອກຈາກນັ້ນກົດໝາຍຍັງໄດ້ລະບຸຢ່າງຈະແຈ້ງວ່າ ຊາຍ-ຍິງ ທີ່ນັບຖືສາສະໜາແຕກຕ່າງກັນຈະຕ້ອງແຈ້ງໃຫ້ສານບ່ອນພວກຕົນອາໄສຢູ່ຮັບຮູ້ລ່ວງໜ້າ ຢ່າງໜ້ອຍ 2 ເດືອນ ກ່ອນມີການແຕ່ງດອງ.
ທີ່ອົດສະຕຣາລີ: ຂ່າວຕ່າງປະເທດໃນເດືອນຕຸລາ 2020 ໃຫ້ຮູ້ວ່າ: ທາງການອົດສະຕຣາລີ ໄດ້ມີແຜນອອກກົດໝາຍສະບັບໃໝ່ທີ່ກຳນົດໃຫ້ພົນລະເມືອງຕ່າງປະເທດ ທີ່ແຕ່ງດອງກັບຄົນອົດສະຕຣາລີ ແລະ ຜູ້ໄດ້ສິດອາໄສຢູ່ຢ່າງຖາວອນໃນອົດສະຕຣາລີ ຕ້ອງໄດ້ຜ່ານການສອບເສັງຄວາມຮູ້ພາສາອັງກິດໃນລະດັບທີ່ທາງການໄດ້ກຳນົດໄວ້ຄາດວ່າຖ້າກົດໝາຍສະບັບນີ້ໄດ້ຮັບອະນຸມັດຈາກລັດຖະສະພາ ກໍຈະມີຜົນບັງຄັບໃຊ້ໃນລະຫວ່າງທ້າຍປີ 2021 ນີ້ເອງແຜນການສ້າງກົດໝາຍສະບັບນີ້ມີຂຶ້ນພາຍຫຼັງທາງການອົດສະຕຣາລີ ໄດ້ເຮັດການສຳຫຼວດກ່ຽວກັບຄົນຕ່າງປະເທດທີ່ແຕ່ງດອງກັບຄົນອົດສະຕຣາລີ ຄົນຕ່າງປະເທດທີ່ໄດ້ສິດຢູ່ອາໄສແບບຖາວອນໃນອົດສະຕຣາລີ ກໍຄື ຜູ້ທີ່ມີການພົວພັນແບບຜົວ-ເມຍ ກັບຄົນອົດສະຕຣາລີ ຊຶ່ງຜົນອອກມາປາກົດວ່າປະມານ 13% ຂອງຄົນຕ່າງປະເທດເຫຼົ່ານັ້ນ ມີລະດັບພາສາອັງກິດຕ່ຳຫຼາຍ ຫຼື ບໍ່ຮູ້ພາສາອັງກິດເລີຍສ່ວນຜູ້ທີ່ມີທັກສະພາສາອັງກິດໃນລະດັບດີນັ້ນມີຈຳນວນ 62% ທີ່ທາງການອົດສະຕຣາລີເປັນຫ່ວງຫຼາຍນັ້ນກໍຄື ໃນ 10 ປີຜ່ານມາ ຈຳນວນຄົນຕ່າງປະເທດໃນ 3 ປະເພດທີ່ກ່າວມາຂ້າງເທິງນັ້ນໄດ້ເພີ່ມຂຶ້ນປະມານ 1 ລ້ານຄົນ ຈຸດປະສົງຕົ້ນຕໍຂອງກົດໝາຍແມ່ນເພື່ອໃຫ້ຄູ່ສົມລົດຂອງຄົນອົດສະຕຣາລີມີຄວາມຮູ້ພາສາອັງກິດໃນລະດັບມາດຕະຖານເພື່ອສະດວກໃນການປະກອບອາຊີບ ການຕິດຕໍ່ພົວພັນໃນສັງຄົມການຂໍຮ້ອງຄວາມຊ່ວຍເຫຼືອ ເມື່ອມີບັນຫາໃນຄອບຄົວ ກໍຄືໃນສັງຄົມນັ້ນເອງ.