ກອງປະຊຸມປຶກສາຫາລືການເມືອງ-ຄວາມໝັ້ນຄົງ ລາວ ແລະ ຍີ່ປຸ່ນ ຄັ້ງທີ 3 ລະດັບຫົວໜ້າ ຮອງຫົວໜ້າກົມ ລະຫວ່າງກະຊວງການຕ່າງປະເທດ ແລະ ກະຊວງປ້ອງກັນປະເທດລາວ ແລະ ຍີ່ປຸ່ນ ໄດ້ຈັດຂຶ້ນວັນທີ 4 ມີນາ 2020 ທີ່ສູນການຮ່ວມມືສາກົນ ແລະ ການເຝິກອົບຮົມ (ICTC) ຝ່າຍລາວແມ່ນ ທ່ານ ບຸນທະນົງສັກ ຈັນທະລາດ ຮັກສາການຫົວໜ້າກົມອາຊີ-ປາຊີຟິກ ແລະ ອາຟຣິກາ ກະຊວງການຕ່າງປະເທດ ເປັນຫົວໜ້າຄະນະ ແລະ ຝ່າຍຍີ່ປຸ່ນແມ່ນທ່ານ ISHIKAWA Hiroshi ຫົວໜ້າກົມອາຊີຕາເວັນອອກສຽງໃຕ້ ແລະ ຕາເວັນຕົກສຽງໃຕ້ ກະຊວງການຕ່າງປະເທດຍີ່ປຸ່ນ ເປັນຫົວໜ້າຄະນະ.
ກອງປະຊຸມຄັ້ງນີ້ໄດ້ຮ່ວມກັນປຶກສາຫາລືກ່ຽວກັບການພົວພັນຮ່ວມມືໃນດ້ານການເມືອງເສດຖະກິດ ວັດທະນະທຳ-ສັງຄົມ ດ້ານປ້ອງກັນຊາດ ແລະ ຄວາມໝັ້ນຄົງ ເຊິ່ງສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືລະຫວ່າງລາວ ແລະ ຍີ່ປຸ່ນ ທີ່ມີການຂະຫຍາຍຕົວຢ່າງຕໍ່ເນື່ອງພາຍຫຼັງທີ່ສອງປະເທດໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 5 ມີນາ 1955.
ກອງປະຊຸມໄດ້ປຶກສາຫາລືເພື່ອສະໜັບສະໜູນເຊິ່ງກັນ ແລະ ກັນໃນການຈັດບັນດາກິດຈະກຳສະ ເຫຼີມສະຫຼອງວັນການທູດລາວ-ຍີ່ປຸ່ນ ຄົບຮອບ 65 ປີ ແລະ 5 ປີ ການເປັນຄູ່ຮ່ວມຍຸດທະສາດລາວ-ຍີ່ປຸ່ນ ໃຫ້ປະສົບຜົນສຳເລັດຕາມຄາດໝາຍ ຊຸກຍູ້ໃຫ້ມີການແລກປ່ຽນການຢ້ຽມຢາມເຊິ່ງກັນ ແລະ ກັນຂອງການນຳຂັ້ນສູງ ສືບຕໍ່ພິຈາລະນາ ແລະ ຊຸກຍູ້ການເປີດຖ້ຽວບິນໂດຍກົງວຽງຈັນ-ຄຸມາໂມໂຕະ ພ້ອມນັ້ນ ກອງປະຊຸມຍັງໄດ້ປຶກສາຫາລືເພື່ອສືບຕໍ່ຮ່ວມມືກັນຢ່າງສະໜິດແໜ້ນໃນການຈັດຕັ້ງປະຕິບັດ ແລະ ຜັນຂະຫຍາຍບັນດາເອກະສານ ແລະ ຜົນການຕົກລົງກັນຂອງບັນດາການນຳລາວ ແລະ ຍີ່ປຸ່ນ ໃຫ້ໄດ້ຮັບໝາກຜົນຕາມຄາດໝາຍ ເປັນຕົ້ນ ບົດບັນທຶກຄວາມເຂົ້າໃຈລະຫວ່າງກະຊວງປ້ອງກັນປະເທດລາວ-ຍີ່ປຸ່ນ ທີ່ໄດ້ຮັບການລົງນາມໃນເດືອນຕຸລາ 2019 ທີ່ໂຕກຽວ ແລະ ອື່ນໆ ຕີລາຄາຄືນການຮ່ວມມືດ້ານຄວາມໝັ້ນຄົງໃນ 3 ປີຜ່ານມາ ເປັນຕົ້ນ ການຊ່ວຍເຫຼືອຂອງຍີ່ປຸ່ນໃນດ້ານມະນຸດສະທຳ ແລະ ການບັນເທົາທຸກໄພພິບັດ ການເກັບກູ້ລະເບີດບໍ່ທັນແຕກ ການພັດທະນາຊັບພະຍາກອນມະນຸດ ນອກນັ້ນ ກອງປະຊຸມຍັງໄດ້ປຶກສາຫາລືກັນ ກ່ຽວກັບການຮ່ວມມືໃນຂອບແມ່ນ້ຳຂອງ-ຍີ່ປຸ່ນ ແລະ ສະພາບການພົ້ນເດັ່ນໃນພາກພື້ນ ແລະ ສາກົນທີ່ສອງຝ່າຍມີຄວາມສົນໃຈຮ່ວມກັນ.