ສານປະຊາຊົນ ແມ່ນອົງການຕຸລາການ ທີ່ເຮັດໜ້າທີ່ພິຈາລະນາຕັດສິນຄະດີ ຢູ່ ສປປ ລາວ ມີແຕ່ສານເທົ່ານັ້ນ ຈຶ່ງມີສິດອຳນາດພິຈາລະນາຕັດສິນຄະດີ ບົນພື້ນຖານຫຼັກຖານ ການເຄົາລົບ ແລະ ປະຕິບັດກົດໝາຍຢ່າງເຂັ້ມງວດ.
ສານປະຊາຊົນ ແມ່ນໜຶ່ງໃນອົງການຂະບວນການຍຸຕິທຳທາງອາຍາ ເປັນອົງການທີ່ມີພາລະບົດບາດ ໜ້າທີ່ສຳຄັນທີ່ສຸດ ແລະ ມີຄວາມເປັນອິດສະຫຼະ ໂດຍປາສະຈາກການແຊກແຊງຈາກພາຍນອກ ສານມີໜ້າທີ່ໃນການນຳເອົາມາດຕາຂອງກົດໝາຍມາຈັດຕັ້ງປະຕິບັດ ຫຼື ວາງຜູ້ກະທຳຜິດໃຫ້ມີຄວາມເໝາະສົມ ແລະ ຖືກຕ້ອງກັບຄວາມເປັນຈິງທີ່ປາກົດຕາມຫຼັກຖານພະ ຍານໃນແຕ່ລະຄະດີ ດ້ວຍຄວາມເປັນກາງ ບໍລິສຸດ ແລະ ຍຸຕິທຳ ສານ ແມ່ນເປັນທີ່ເພິ່ງສຸດທ້າຍຂອງປະຊາຊົນໃນຂະບວນການຍຸຕິທຳ.
ພົນລະເມືອງລາວທຸກຄົນ ມີຄວາມສະເໝີພາບຕໍ່ໜ້າກົດໝາຍ ແລະ ສານ ໂດຍບໍ່ຈຳແນກເພດ ເຊື້ອຊາດ ຊົນເຜົ່າ ຖານະທາງດ້ານເສດຖະກິດ ແລະ ສັງຄົມ ພາສາ ລະດັບການສຶກສາ ອາຊີບ ຄວາມເຊື່ອຖື ພູມລຳເນົາ ແລະ ອື່ນໆ ພົນລະເມືອງລາວ ມີສິດຮ້ອງຟ້ອງຕໍ່ສານ ກ່ຽວກັບຂໍ້ຂັດແຍ່ງທາງແພ່ງ ແລະ ມີສິດຮ້ອງຟ້ອງຕໍ່ອົງການສືບສວນ-ສອບສວນ ຫຼື ອົງການໄອຍະການປະຊາຊົນ ເມື່ອມີການລະເມີດທາງອາຍາ ຄົນຕ່າງປະເທດ ຊາວຕ່າງດ້າວ ແລະ ຜູ້ບໍ່ມີສັນຊາດ ທີ່ຢູ່ໃນດິນແດນ ແຫ່ງ ສປປ ລາວ ມີສິດເທົ່າທຽມກັນກັບພົນລະເມືອງລາວ ຖ້າກົດໝາຍຫາກບໍ່ໄດ້ກຳນົດໄວ້ຢ່າງອື່ນ.
ນອກຈາກສານປະຊາຊົນແລ້ວ ກໍຍັງມີສານທະຫານຂັ້ນສູງ ຊຶ່ງແມ່ນອົງການພິພາກສາສູງສຸດຂອງກອງທັບປະຊາຊົນລາວ ມີພາລະບົດບາດໃນການພິພາກສາຄະດີອາຍາເປັນຂັ້ນອຸທອນ ຄຸ້ມຄອງທາງດ້ານການຈັດຕັ້ງ ບໍລິຫານ ກວດກາທາງດ້ານວິຊາສະເພາະ ຊີ້ນຳການເຄື່ອນໄຫວ ການປະຕິບັດໜ້າທີ່ຂອງສານທະຫານພາກ ຕາມທີ່ໄດ້ກຳນົດໄວ້ໃນກົດໝາຍ.
ສຳລັບໂຄງປະກອບ ທາງດ້ານບຸຄະລາກອນຂອງສານທະຫານ ກໍເຊັ່ນກັນກັບໂຄງປະກອບບຸຄະລາກອນ ຂອງສານປະຊາຊົນ ຊຶ່ງປະກອບດ້ວຍ ປະທານ ຮອງປະທານ ຜູ້ພິພາກສາ ຜູ້ຊ່ວຍຜູ້ພິພາກສາ ຈ່າສານ ພະນັກງານວິຊາການ ແລະ ພະນັກງານບໍລິຫານຈຳນວນໜຶ່ງ.
ໂດຍ: ໄມ້ງັດ