ບົດປະຈຳວັນນີ້ ຂໍນຳທ່ານຜູ້ອ່ານໄປຮູ້ຈັກກັບບັ້ນຮົບຕ້ານຜະລິດຕະພັນທີ່ເຮັດດ້ວຍຢາງ ຫຼື ປຼັສຕິກ ເພື່ອຖອດໄວ້ເປັນບົດຮຽນສຳລັບມາດຕະການຫຼຸດຜ່ອນການໃຊ້ຖົງຢາງຢູ່ລາວ ພວກເຮົາຫາກໍເລີ່ມຂຶ້ນຢ່າງຈິງຈັງຫວ່າງບໍ່ດົນມານີ້.
ທີ່ອັງກິດ: ບັ້ນຮົບຕ້ານການໃຊ້ຜະລິດຕະພັນທີ່ເຮັດດ້ວຍຢາງນັ້ນເລີ່ມຂຶ້ນຢ່າງເປັນຂະບວນ ຈາກການຈຳກັດການໃຊ້ຖົງຢາງຕາມຮ້ານສັບພະສິນຄ້າກ່ອນ ຄື: ໄດ້ມີການກຳນົດຫ້າມບັນດາຮ້ານຄ້າບໍລິການຖົງຢາງລ້າໆໃຫ້ລູກຄ້າ ໝາຍຄວາມວ່າ ຖ້າລູກຄ້າຕ້ອງການຖົງຢາງບັນຈຸເຄື່ອງທີ່ຊື້ກໍຕ້ອງໄດ້ຊື້ເອົາເອງ ດ້ວຍວິທີດັ່ງກ່າວບັນດາລູກຄ້າກໍເລີຍຈຳຕ້ອງມີຖົງຕົນເອງຕິດມືເວລາໄປຮ້ານຄ້າ ເພື່ອຈະບໍ່ໄດ້ຈົກເງິນຈ່າຍ ປາ ກົດວ່າມາດຕະການນີ້ ໄດ້ຜົນດີເຮັດໃຫ້ການໃຊ້ຖົງຢາງປະເພດໃຊ້ຄັ້ງດຽວແລ້ວຖິ້ມຫຼຸດລົງຫຼາຍ ບັດນີ້ພັດມີຂ່າວວ່າ ທາງການຂອງອັງກິດ ໄດ້ບັງ ຄັບໃຊ້ກົດໝາຍຫ້າມໃຊ້ທໍ່ດູດເຄື່ອງດື່ມ ແລະ ບ່ວງຢາງທີ່ໃຊ້ຄົນເຄື່ອງດື່ມ ນັບແຕ່ວັນທີ 1 ຕຸລາ 2020 ເປັນຕົ້ນມາ (ຂ່າວ AFP ແລະ ໜັງສືພິມ ຜູ້ແທນປະຊາຊົນສະບັບ 704) ຂ່າວບອກວ່າ ກົດໝາຍສະບັບນີ້ໄດ້ສົ່ງສັນຍານໃຫ້ຮູ້ວ່າ ລັດຖະບານອັງກິດໄດ້ເພີ່ມຄວາມເຂັ້ມງວດກວດຂັນ ກ່ຽວກັບການໃຊ້ຜະລິດຕະພັນປຼັສຕິກ ປະເພດໃຊ້ເທື່ອດຽວແລ້ວຖິ້ມ ຊຶ່ງເປັນອັນຕະລາຍສຳລັບສິ່ງແວດລ້ອມ ບ້ອຍວ່າກົດໝາຍສະບັບນີ້ຖືກປະກາດໃຊ້ ກຸ່ມອະນຸຮັກສິ່ງແວດລ້ອມຕ່າງກໍສະແດງຄວາມຍິນດີ ພ້ອມທັງຮຽກຮ້ອງໃຫ້ມີມາດຕະການຢຸດການຜະລິດເຄື່ອງໃຊ້ທີ່ເຮັດດ້ວຍຢາງອື່ນໆ ປະເພດໃຊ້ເທື່ອດຽວແລ້ວຖິ້ມ ຕາມສະຖິຕິຄົນອັງກິດໃຊ້ທໍ່ດູດປຼັສຕິກ 4,7 ພັນລ້ານທໍ່ ແລະ ບ່ວງຢາງຄົນເຄື່ອງດື່ມ 316 ລ້ານກ້ານຕໍ່ປີ ແນວໃດກໍດີ ກົດໝາຍໄດ້ມີຂໍ້ຍົກເວັ້ນສຳລັບການໃຊ້ຜະລິດຕະພັນເຮັດດ້ວຍຢາງທີ່ໃຊ້ພຽງຄັ້ງດຽວຕາມໂຮງໝໍ ແລະ ສຳລັບກຸ່ມຄົນເຈັບ ຄົນເສຍອົງຄະທີ່ຈຳເປັນຕ້ອງໄດ້ໃຊ້ທໍ່ດູດປຼັສຕິກ.
ທີ່ເຢຍລະມັນ: ນັບແຕ່ວັນທີ 3 ເດືອນກໍລະກົດ ປີ 2021 ເປັນຕົ້ນໄປ ກົດໝາຍຫ້າມຈຳໜ່າຍຜະ ລິດຕະພັນປຼັສຕິກທີ່ໃຊ້ພຽງຄັ້ງດຽວ ຈະເລີ່ມມີຜົນບັງຄັບໃຊ້ທົ່ວປະເທດເຢຍລະມັນ ທັງນີ້ ກໍເພື່ອໃຫ້ເປັນໄປຕາມຂໍ້ບັງຄັບທີ່ທາງສະຫະພາບເອີຣົບ (ອີຢູ່-EU) ໄດ້ວາງອອກ ແລະ ເພື່ອອະນຸຮັກສິ່ງແວດລ້ອມຢູ່ພາຍໃນປະເທດເຢຍລະມັນເອງ ພາຍໃຕ້ກົດໝາຍດັ່ງກ່າວ ຜະລິດຕະພັນຢາງທີ່ໃຊ້ໄດ້ພຽງຄັ້ງດຽວຈະກາຍເປັນສິ່ງຕ້ອງຫ້າມ ຊຶ່ງຈະບໍ່ມີການວາງຂາຍຢູ່ພາຍໃນປະເທດອີກຕໍ່ໄປ ຜະລິດຕະພັນຢາງທີ່ຕ້ອງຫ້າມ ລວມມີ ຖ້ວຍ-ຈານຢາງ ສຳລັບບັນຈຸອາຫານ ບ່ວງ ສ້ອມ ໄມ້ທູ່ຢາງ ທໍ່ດູດເຄື່ອງດື່ມ ກັບໂຟມ ກ່ອງຢາງໃສ ແລະ ຈອກປຼັສຕິກ ຈຸດປະສົງຕົ້ນຕໍໃນການປະກາດໃຊ້ກົດໝາຍສະບັບນີ້ ແມ່ນເພື່ອຫຼຸດຜ່ອນປະລິມານຂີ້ເຫຍື້ອປຼັສຕິກທີ່ຖິ້ມລົງທະເລ ຊຶ່ງຄາດກັນວ່າ ກົດໝາຍຈະຊ່ວຍຫຼຸດຜ່ອນຈຳນວນຂີ້ເຫຍື້ອດັ່ງກ່າວ ໄດ້ເຖິງ 70% ໃນລາຍລະອຽດກ່ຽວກັບການປະຕິບັດກົດໝາຍດັ່ງກ່າວຍັງຈະມີການບັນຍັດມາດຕະການເພີ່ມ ເຊັ່ນ: ການກຳນົດໃຫ້ມີການພິມຄຳເຕືອນຕິດໃສ່ ຜະລິດຕະພັນທີ່ເຮັດດ້ວຍຢາງ (ປະເພດບໍ່ໃຊ້ຄັ້ງດຽວ) ເພື່ອໃຫ້ຜູ້ໃຊ້ຮູ້ໄດ້ເຖິງຜົນເສຍຫາຍຂອງຜະລິດຕະພັນດັ່ງກ່າວຕໍ່ສິ່ງແວດລ້ອມ ຮູ້ກ່ຽວກັບວິທີຖິ້ມຜະລິດຕະພັນຢາງປອດໄພ.