ເຮົາຄວນກວດສຸຂະພາບກັບແພດທີ່ໂຮງໝໍຢ່າງໜ້ອຍທຸກປີ ເພື່ອທີ່ຈະໄດ້ກວດກາສະພາບຮ່າງກາຍຂອງຕົວເອງ ຢູ່ສະເໝີວ່າ ຄວນດູແລ ໃຫ້ຄວາມສົນໃຈສ່ວນໃດເປັນພິເສດ ຫຼື ບໍ່ ແຕ່ນອກຈາກເຮົາຕ້ອງລໍຖ້າໃຫ້ແພດມາກວດຮ່າງກາຍຂອງເຮົາດ້ວຍອຸປະກອນທາງການແພດຕ່າງໆທຸກປີແລ້ວ ເຮົາຍັງສາມາດກວດຮ່າງກາຍຂອງເຮົາໄດ້ດ້ວຍຕົນເອງໂດຍບໍ່ຕ້ອງລໍຖ້າໃຫ້ຄົບ 1 ປີອີກດ້ວຍ ຫາກກວດຮ່າງກາຍຂອງຕົວເອງຕາມ 5 ຂໍ້ນີ້ ຮັບຣອງວ່າ ຮ່າງກາຍຂອງທ່ານຈະແຂງແຮງ ບໍ່ເປັນພະຍາດງ່າຍໆຢ່າງແນ່ນອນ.
5 ເຄັດລັບ “ກວດສຸຂະພາບ” ດ້ວຍຕົວເອງງ່າຍໆ ຫ່າງໄກພະຍາດ
ທຸກເວລາ ກວດສຸຂະພາບຂອງຕົວເອງທຸກເວລາ ທຸກນາທີ ດ້ວຍການຫຼີກລ່ຽງການດື່ມສິ່ງມຶນເມົາ ງົດສູບຢາ ທຸກສະຖານທີ່ທຸກເວລາ.
ທຸກວັນ ກວດສຸຂະພາບຂອງຕົວເອງທຸກວັນ ງ່າຍໆ ດ້ວຍການ “ນັບກ້າວ” ໃນ 1 ວັນຄວນຍ່າງບໍ່ຕ່ຳກວ່າ 7.500 ກ້າວ ສາມາດໃຊ້ແອັບພລິເຄຊັ່ນໃນສະມາດໂຟນຊ່ວຍນັບກ້າວໃຫ້ ຫຼືເລືອກໃຊ້ເປັນສະມາດວອຊ ຫຼື ໂມງອັດສະລິຍະທີ່ມີຟັງຊັ່ນຊ່ວຍນັບກ້າວໃຫ້ກໍໄດ້.
ທຸກອາທິດ ກວດສຸຂະພາບກັນທຸກອາທິດດ້ວຍການ “ຊັ່ງນ້ຳໜັກ” ໃນ 1 ອາທິດຄວນເລືອກວັນ ແລະ ເວລາທີ່ຈະຊັ່ງນ້ຳໜັກມາ 1 ວັນ ເຊັ່ນ ເຊົ້າວັນຈັນກ່ອນກິນອາຫານເຊົ້າ ແລ້ວຈົດ ບັນທຶກນ້ຳໜັກຂອງຕົວເອງເອົາໄວ້ທຸກອາທິດ ເພື່ອເບິ່ງການປ່ຽນແປງຂອງນ້ຳໜັກຢູ່ສະເໝີ.
ນ້ຳໜັກຂອງຄົນເຮົາສາມາດຂຶ້ນລົງໄດ້ 1-2 ກິໂລກຣາມ ລະຫວ່າງວັນ ແຕ່ຫາກທ່ານຊັ່ງນ້ຳໜັກວັນ ແລະ ເວລາເດີມທຸກອາທິດ ນ້ຳໜັກຂອງທ່ານຄວນຈະເທົ່າເດີມ ຫຼື ໃກ້ຄຽງນ້ຳໜັກເດີມບໍ່ສູງຕ່ຳບໍ່ເກີນ 1 ກິໂລກຣາມ ຫາກເພີ່ມຈາກເດີມມາທີ່ 1-2 ກິໂລກຣາມຕິດຕໍ່ກັນ 3-4 ອາທິດ ສະແດງວ່າທ່ານຕຸ້ຍຂຶ້ນ ຕ້ອງຫຼຸດນ້ຳໜັກໃຫ້ກັບໄປ ເທົ່າເດີມ.
ໃນກໍລະນີທີ່ທ່ານມີນ້ຳໜັກເກີນມາດຕະຖານຢູ່ແລ້ວ ຄວນຫຼຸດນ້ຳໜັກແລ້ວກວດນ້ຳໜັກຂອງຕົວເອງທຸກອາທິດ ເຊັ່ນກັນວ່າ ນ້ຳໜັກລົງແດ່ ຫຼື ບໍ່ ຫາກນ້ຳໜັກບໍ່ມີການປ່ຽນແປງເລີຍ ຫຼືນ້ຳໜັກຍັງເພີ່ມຂຶ້ນມາອີກຫຼັງພະຍາຍາມຫຼຸດນ້ຳໜັກມາ 3-4 ອາທິດ ສະແດງວ່າວິທີການຫຼຸດນ້ຳໜັກຂອງທ່ານບໍ່ໄດ້ຜົນ.
ທຸກເດືອນ ກວດສຸຂະພາບທຸກເດືອນດ້ວຍການ ກວດ “ຄວາມດັນເລືອດ” ຄວາມດັນເລືອດປົກກະຕິບໍ່ຄວນເກີນ 120/80 ຫາກກວດຄວາມດັນເລືອດໄດ້ຄ່າຫຼາຍກວ່ານີ້ ຄວນປຶກສາແພດເພື່ອດຳເນີນການປິ່ນປົວ.
ທຸກ 3 ເດືອນ ກວດສຸຂະພາບຂອງຕົວເອງທຸກປີ ດ້ວຍການ “ແທກຮອບແອວ” ທຸກໆ 3 ເດືອນ ຈົດບັນທຶກເອົາໄວ້ວ່າຮອບແອວຂະຫຍາຍໃຫຍ່ຂຶ້ນຫຼືບໍ່ ຕາມມາດຕະຖານແລ້ວ ຮອບແອວບໍ່ເກີນຈາກສ່ວນສູງຂອງຕົວເອງ ຫານດ້ວຍສອງ ເຊັ່ນ: ຫາກທ່ານສູງ 168 ຊັງຕິແມັດ ຮອບແອວຂອງທ່ານກໍບໍ່ຄວນເກີນ 84 ຊັງຕີແມັດ ເປັນຕົ້ນ.
ຫາກໝັ່ນກວດຮ່າງກາຍເປັນປະຈຳຕາມນີ້ແລ້ວ ຮັບຣອງວ່າສຸຂະພາບຮ່າງກາຍແຂງແຮງ ຈົນທ່ານໝໍທີ່ກວດຮ່າງກາຍປະຈຳປີຕ້ອງຊື່ນຊົມແນ່ນອນ.
ຊາວບ້ານ – ນຳສະເໜີ