ທ່ານນາງ ຈັນແດງ ແສງວໍລະວົງ ຮອງຜູ້ອຳນວຍການໂຮງຮຽນກຽດຕິສັກນາໆຊາດ ນະຄອນຫຼວງວຽງຈັນ ກ່າວວ່າ: ອີງຕາມຈົດໝາຍແຈ້ງການຂອງລັດຖະມົນຕີກະຊວງສຶກສາທິການ ແລະ ກີລາ ສະບັບເລກທີ 369/ສກກ ລົງວັນທີ 18 ມີນາ 2020 ເລື່ອງການໂຈະການຮຽນ-ການສອນຊົ່ວຄາວ ແຕ່ວັນທີ 19 ມີນາ 2020 ເຖິງວັນທີ 21 ເມສາ 2020.
ພາຍຫຼັງມີແຈ້ງການອອກມາ ທາງໂຮງຮຽນພວກເຮົາກໍເອົາໃຈໃສ່ຈັດຕັ້ງຜັນຂະຫຍາຍຢ່າງເຄັ່ງຄັດ ຈາກສະພາບເງື່ອນໄຂຂອງໂຮງຮຽນ ເຊິ່ງພວກເຮົາ ໃນໄລຍະການໂຈະການຮຽນ-ການສອນຊົ່ວຄາວນີ້ ທາງໂຮງຮຽນກຽດຕິສັກນານາຊາດ ໄດ້ສືບຕໍ່ດຳເນີນການຮຽນ-ການສອນໃຫ້ນັກຮຽນໄດ້ຮຽນຢູ່ບ້ານຜ່ານທາງ Whatsapp Messenger Thinkwave ແລະ Zoom ໂດຍປະຕິບັດດັ່ງນີ້:
ຊັ້ນອະນຸບານ ແລະ ຊັ້ນປະຖົມ ຄູໄດ້ມອບປຶ້ມບົດຮຽນ ບົດຄົ້ນຄວ້າ ບົດເຝິກຫັດ ແລະ ແບບສອບຖາມຕ່າງໆໃຫ້ນັກຮຽນເອົາກັບບ້ານ ຄູເອົາເບີໂທລະສັບຜູ້ປົກຄອງຕັ້ງກຸ່ມ Whatsapp ຫຼື ກຸ່ມ messenger ແລະ ອອກລະບຽບພ້ອມທັງສ້າງຄວາມເຂົ້າໃຈໃນການເຂົ້າໃຊ້ ຕອນເຊົ້າວັນຈັນ – ວັນສຸກ ຄູຈະໄດ້ແນະນຳການຮຽນ ການເຮັດກິດຈະກຳຕ່າງໆລົງກຸ່ມ ວ່າຮຽນບົດໃດ ໜ້າໃດ ຜູ້ປົກຄອງຕິດຕາມລູກຫຼານໃນການຮຽນ ແລະ ເຮັດບົດເຝິກຫັດ ພ້ອມທັງຖ່າຍຮູບ ແລະ ວິດີໂອລົງກຸ່ມ ສຳລັບຊັ້ນອະນຸບານ ສຳລັບຊັ້ນປະຖົມແມ່ນສົ່ງໃຫ້ຄູທາງ Whatsapp ສ່ວນຕົວ ຫຼື ຕາມທີ່ຄູກຳນົດ ຄູກວດໃຫ້ຄະແນນ ຍ້ອງຍໍ ໃຫ້ກຳລັງໃຈ ແລະ ອະທິບາຍຂໍ້ທີ່ນັກຮຽນເຮັດຜິດ.
ຊັ້ນມັດທະຍົມ: ນຳໃຊ້ຫຼັກສູດນາໆຊາດ ຄູທຸກຄົນຈະໃຊ້ລະບົບດຽວກັນໃນການດຳເນີນການຮຽນ-ການສອນ ຄື: ນັກຮຽນເອົາບົດຮຽນ ບົດຄົ້ນຄວ້າ ວຽກບ້ານ ສົ່ງວຽກບ້ານ ແລະ ເບິ່ງຄະແນນຂອງຕົນແຕ່ລະວິຊາຢູ່ Thinkwave ຄູດຳເນີນການຮຽນ-ການສອນ ຕາມຕາຕະລາງຮຽນປົກກະຕິແຕ່ລະວິຊາ ໃນແຕ່ລະວັນກັບນັກຮຽນ ໂດຍຜ່ານ Zoom ລະບົບນີ້ຄູ ແລະ ນັກຮຽນໄດ້ເຫັນໜ້າ-ໄດ້ຍິນສຽງ ແລະ ໄດ້ສົນທະນາກັນເປັນກຸ່ມ ຄູ ແລະ ນັກຮຽນ ສອບຖາມຂໍ້ມູນເພີ່ມເຕີມໄດ້ທາງ Whatsapp ສ່ວນຕົວ.
ສະເພາະຫຼັກສູດລາວ ຄູ-ອາຈານແຕ່ລະວິຊາ ເອົາບົດຄົ້ນຄວ້າໃຫ້ນັກຮຽນເມືອຄົ້ນຄວ້າ ຕອບ ແລ້ວສົ່ງໃຫ້ຄູທາງ Whatsapp ສ່ວນຕົວ ໃນແຕ່ລະອາທິດ.
ພິເສດ ຫ້ອງການຂອງໂຮງຮຽນ ເປີດວັນຈັນ ເຖິງ ວັນສຸກ ແຕ່ເວລາ 8:00 – 11:30 ໂມງ ຄູອາຈານປ່ຽນຜຽນກັນມາປະຈຳການເພື່ອໃຫ້ຂໍ້ມູນ ແລະ ຊ່ວຍເຫຼືອນ້ອງນັກຮຽນທີ່ມີບັນຫາໃນການເຂົ້າເຖິງລະບົບການຮຽນການສອນ.
ທ່ານຮອງຜູ້ອຳນວຍການກ່າວຕື່ມອີກວ່າ: ສະເພາະການຈັດຕັ້ງການຮຽນ-ການສອນຂອງໂຮງຮຽນພວກເຮົາ ຕໍ່ກັບການສອນອອນລາຍນີ້ ຂໍ້ສະດວກ ເນື່ອງຈາກມີເງື່ອນໄຂສະດວກທາງດ້ານບຸກຄະລາກອນ ອຸປະກອນການຮຽນ-ການສອນ ທີ່ທັນສະໄໝ ທີ່ສຳຄັນເປັນການຮຽນທີ່ທັນສະໄໝ ນັກຮຽນຕ້ອງເປັນເຈົ້າການດ້ວຍຕົນເອງ ບັງຄັບຕົນເອງ ສ່ວນຂໍ້ຫຍຸ້ງຍາກແມ່ນການຕິດຕາມການຮຽນ ບໍ່ສາມາດດູແລຮອບດ້ານຄືກັບການມາຮຽນຢູ່ໂຮງຮຽນ ອີກທັງການເຄື່ອນໄຫວກິດຈະກຳເສີມສ້າງທັກສະທີ່ເຮັດວຽກເປັນກຸ່ມ ບໍ່ສາມາດດຳເນີນການໄດ້ ໂດຍສະເພາະການເຄື່ອນໄຫວນອກຫຼັກສູດ ແລະ ໃນຫຼັກສູດຈຳນວນໜຶ່ງ ແຕ່ເຖິງຢ່າງໃດ ແມ່ນຈະໄດ້ປະຕິບັດໄປຕາມການແນະນຳຂອງຂັ້ນເທິງ ຈົນກວ່າຈະມີຄຳສັ່ງໃໝ່ສຳລັບການຮຽນ-ການສອນທາງອອນລາຍ ທາງໂຮງຮຽນພວກເຮົາມີຄວາມສະດວກ ແລະ ຄວາມພ້ອມ ແລະ ໂອກາດນີ້ ກໍຕ້ອງຂໍຄວາມຮ່ວມມຶນຳຜູ້ປົກຄອງ ໃນການຕິດຕາມແນະນຳລູກຫຼານຕົນເອງຊ່ວຍທາງໂຮງຮຽນຕື່ມ ເພື່ອເຮັດໃຫ້ການຈັດຕັ້ງການຮຽນ-ການສອນຄັ້ງນີ້ ບັນລຸໄດ້ຕາມຈຸດປະສົງລະດັບຄາດໝາຍ.