ພົບກັນຕາມເຄີຍກັບ “ເບິ່ງບ້ານເຂົາເອົາບົດຮຽນ” ຄໍລຳທີ່ສັນຫາມາເລົ່າກ່ຽວກັບມາດຕະການທາງດ້ານກົດໝາຍ ລະບຽບການ ກໍຄື ນະໂຍບາຍຄຸ້ມຄອງລັດ ຄຸ້ມຄອງສັງຄົມໃນຕ່າງປະເທດ ເຊິ່ງມີທັງທີ່ເປັນບົດຮຽນທີ່ດີ ແລະ ບົດຮຽນທີ່ພວກເຮົາຄວນລະວັງບໍ່ໃຫ້ເກີດຂຶ້ນໃນສັງຄົມລາວພວກເຮົາ.
ສຳລັບວັນນີ້ຂໍສະເໜີກ່ຽວກັບມາດຕະການ ກໍຄື ນະໂຍບາຍທີ່ປະຕິບັດກັນຢູ່ປະເທດແອດສະປາຍ (ສະເປນ) ອິຕາລີ ແລະ ມຽນມາ ທີ່ພົວພັນກັບພະຍາດໂຄວິດ-19.
ທີ່ ແອດສະປາຍ: ໃນທ້າຍເດືອນກັນຍາ 2020 ລັດຖະບານສະຫະພາບແຮງງານ ແລະ ບັນດາຜູ້ນຳຂອງພາກທຸລະກິດ ແອດສະປາຍ ໄດ້ຮ່ວມກັນຮ່າງກົດໝາຍບັງຄັບໃຫ້ບັນດານາຍຈ້າງ ຕ້ອງຈ່າຍຄ່າໃຊ້ຈ່າຍຕ່າງໆສຳລັບລູກຈ້າງທີ່ເຮັດວຽກຢູ່ເຮືອນຂອງຕົນ ເນື່ອງຈາກການແຜ່ລະບາດຂອງພະຍາດໂຄວິດ-19 ກົດໝາຍສະບັບດັ່ງກ່າວ ແມ່ນບ່ອນອີງທີ່ເປັນພື້ນຖານສຳຄັນ ໃນການປົກປ້ອງສິດຂອງແຮງງານທີ່ເລືອກເຮັດວຽກຢູ່ເຮືອນ.
ກົດໝາຍໄດ້ກຳນົດລະອຽດວ່າ ນາຍຈ້າງຈະຕ້ອງຮັບຜິດຊອບຄ່າໃຊ້ຈ່າຍທັງໝົດທີ່ພົວພັນກັບການເຮັດວຽກຢູ່ເຮືອນຂອງລູກຈ້າງ ເຊັ່ນ: ຄ່າຄອມພິວເຕີ ເຄື່ອງມື-ອຸປະກອນທີ່ຈຳເປັນໃນການເຮັດວຽກ ນອກຈາກນັ້ນ ລູກຈ້າງຍັງມີສິດກຳນົດເວລາທີ່ສະດວກສຳລັບການເຮັດວຽກຂອງຕົນ ແນວໃດກໍດີ ລູກຈ້າງທີ່ມີເງື່ອນໄຂເຮັດວຽກຢູ່ເຮືອນ ຈະຕ້ອງແມ່ນຜູ້ທີ່ໃຊ້ເວລາເຮັດວຽກຢູ່ເຮືອນຢ່າງໜ້ອຍ 30% ຂອງເວລາເຮັດວຽກທັງໝົດ ສ່ວນນາຍຈ້າງນັ້ນກໍມີສິດຕິດຕາມ ກວດກາການເຮັດວຽກຂອງລູກຈ້າງທາງອອນລາຍ ແຕ່ຕ້ອງເຄົາລົບໃນສິດຂອງຄວາມເປັນສ່ວນຕົວຂອງລູກຈ້າງ ການເຮັດວຽກຢູ່ເຮືອນນັ້ນ ຕ້ອງມາຈາກການຍິນຍອມພ້ອມໃຈກັນຂອງທັງນາຍຈ້າງ ແລະ ລູກຈ້າງ ຂ່າວບອກວ່າ: ມາຮອດປັດຈຸບັນ ລູກຈ້າງໃນປະເທດແອດສະປາຍຫຼາຍລ້ານຄົນ ຍັງສືບຕໍ່ເຮັດວຽກຢູ່ເຮືອນ ເຖິງແມ່ນວ່າທາງລັດຖະບານໄດ້ຜ່ອນຜັນມາດຕະການຄວບຄຸມພະຍາດໂຄວິດ-19 ລົງແລ້ວກໍຕາມ.
ທີ່ ອິຕາລີ: ໃນຊຸມເດືອນເບື້ອງຕົ້ນຂອງການແຜ່ລະບາດຂອງພະຍາດໂຄວິດ-19 ນັ້ນ ປະເທດອິຕາລີເປັນໜຶ່ງໃນປະເທດທີ່ປະສົບເຄາະຮ້າຍຢ່າງໜັກໜ່ວງ ຈາກການແຜ່ລາມຢ່າງໄວວາຂອງພະຍາດດັ່ງກ່າວ ດັ່ງນັ້ນ ມາດຕະການບັງຄັບໃຫ້ທຸກຄົນໃສ່ຜ້າອັດປາກ ອັດດັງ ຈຶ່ງມີລັກສະນະເດັດຂາດ ເພື່ອປ້ອງກັນບໍ່ໃຫ້ມີສະພາບລະເຫຼີງ ຫຼື ຂາດສະຕິ.
ໃນວັນທີ 8 ຕຸລາປີຜ່ານມາ ທ່ານນາຍົກລັດຖະມົນຕີອິຕາລີ ໄດ້ປະກາດກ່ຽວກັບມາດຕະການນີ້ຢ່າງເຄັ່ງຂຶມວ່າ “ການໃຊ້ຜ້າອັດປາກ ອັດດັງ ແມ່ນສິ່ງທີ່ຕ້ອງເຮັດ” ໂດຍມີບົດລົງໂທດຕໍ່ຜູ້ລະເມີດດ້ວຍການປັບໃໝສູງສຸດເປັນເງິນ 1 ພັນເອີໂຣ ຫຼື ປະມານ 10 ລ້ານກີບ ມາດຕະການບັງຄັບໃຊ້ຜ້າອັດປາກ ອັດດັງ ແບບເຄັ່ງຄັດດ້ວຍການປັບໃໝນີ້ ຈະດຳເນີນໄປຈົນຮອດວັນທີ 31 ມັງກອນ 2021 ພຸ້ນ.
ທີ່ ມຽນມາ: ການແຜ່ລະບາດຂອງພະຍາດໂຄວິດ-19 ຢູ່ມຽນມາມີທ່າອ່ຽງຮຸນແຮງຂຶ້ນ ສົມທຽບກັບສະພາບການແຜ່ລະບາດຢູ່ບັນດາປະເທດໃນອາຊຽນ ແນວໃດກໍດີ ທາງການຂອງປະເທດ ກໍເຄີຍໄດ້ປະຕິບັດນະໂຍບາຍຜ່ອນຜັນເປັນພິເສດ ໃນການຄຸ້ມຄອງໄລຍະຫ່າງທາງສັງຄົມ ສະເພາະໃນວັນທີ 8 ເດືອນພະຈິກ ປີ 2020 ເຊິ່ງເປັນວັນເລືອກຕັ້ງລະດັບຊາດ ທັງນີ້ ກໍເພື່ອໃຫ້ປະຊາຊົນສາມາດຮ່ວມກຸ່ມກັນໄດ້ຫຼາຍກວ່າ 30 ຄົນ ແລະ ສາມາດອອກຈາກເຮືອນໄດ້ສະດວກຂຶ້ນ ເພື່ອໄປໃຊ້ສິດລົງຄະແນນສຽງເລືອກຕັ້ງ ສຳລັບຜູ້ອາຍຸສູງແຕ່ 60 ປີຂຶ້ນໄປ ເຊິ່ງເປັນໄວທີ່ສ່ຽງສູງຕໍ່ການຕິດພະຍາດໂຄວິດ-19 ນັ້ນ ໄດ້ຮັບສິດພິເສດໃນການໄປໃຊ້ສິດເລືອກຕັ້ງກ່ອນໜ້າ ຄືໃນວັນທີ 29 ເດືອນຕຸລາ 2020.