ອົງການອະວະກາດສະຫະລັດອາເມຣິກາ ຫຼື ນາຊ່າ (NASA) ສົ່ງຍານພາຫະນະສຳຫຼວດພື້ນຜິວດາວອັງຄານ Perseverance ໄປກັບລູກສອນໄຟ Atlas 5 ທີ່ພຸ່ງທະຍານອອກຈາກແທ່ນສົ່ງລູກສອນໄຟທີ່ Cape Canaveral ໃນລັດຟລໍຣິດາ ເມື່ອມໍ່ໆມານີ້ ໃນພາລະກິດຫຼ້າສຸດ ເພື່ອຄົ້ນຫາຮ່ອງຮອຍຂອງສິ່ງທີ່ມີຊີວິດເທິງດາວອັງຄານ ເຊິ່ງໃຊ້ງົບປະມານ ປະມານ 2,4 ຕື້ໂດລາ.
ນາຊ່າ ຄາດວ່າຍານສຳຫຼວດຈະເດີນທາງໄປເຖິງດາວອັງຄານ ໃນເດືອນກຸມພາປີໜ້າ ໂດຍຈະສົ່ງຍານພາຫະນະ 6 ລໍ້ຂະໜາດເທົ່າລົດໃຫຍ່ ຄວບຄຸມດ້ວຍລະບົບອັດຕະໂນມັດ ໄປລົງເທິງພື້ນຜິວດາວອັງຄານ ເພື່ອເລີ່ມພາລະກິດຄັ້ງໃໝ່.
ໂດຍໃນຄັ້ງນີ້ ຍານພາຫະນະ Perseverance ຈະຖືກສົ່ງລົງໄປຍັງບໍລິເວນປ່ອງພູເຂົາໄຟຄວາມເລິກ 250 ແມັດ ທີ່ເອີ້ນວ່າ Jezero ເຊິ່ງເຄີຍເປັນທະເລສາບມາກ່ອນ ເມື່ອ 3.500 ລ້ານປີທີ່ຜ່ານມາ ໂດຍນັກວິທະຍາສາດເຊື່ອວ່າ ບໍລິສັດດັ່ງກ່າວອາດມີຮ່ອງຮອຍທີ່ສະແດງເຖິງການດຳລົງຢູ່ ຂອງສິ່ງມີຊີວິດປະເພດຈຸລິນຊີເທິງດາວອັງຄານ ເມື່ອຫຼາຍລ້ານປີກ່ອນ.
ລົດສຳຫຼວດ Perseverance ຍັງຈະທົດສອບອຸປະກອນຕ່າງໆ ສຳລັບການສົ່ງມະນຸດໄປຍັງດາວອັງຄານໃນອະນາຄົດ ລວມທັງຍັງໄດ້ຮັບການຕິດຕັ້ງເຮລິຄອບເຕີຄວບຄຸມຕົນເອງຂະໜາດນ້ອຍ ທີ່ມີຊື່ວ່າ Ingenuity ເພື່ອໃຊ້ຖ່າຍພາບມຸມສູງຂອງພື້ນຜິວດາວອັງຄານ ສົ່ງກັບມາຍັງໂລກໄດ້ດ້ວຍ.
ການເດີນທາງໄປຍັງດາວອັງຄານຄັ້ງນີ້ ຖືເປັນຄັ້ງທີ 9 ຂອງນາຊ່າ ໂດຍເມື່ອຕົ້ນເດືອນກໍລະກົດທີ່ຜ່ານມາ ສະຫະລັດອາຫຼັບ ເອມິເຣດ ແລະ ຈີນ ກໍໄດ້ສົ່ງຍານສຳຫຼວດໄປຍັງດາວອັງຄານເຊັ່ນກັນ.
ອົງການນາຊ່າ ເລີ່ມສົ່ງຍານພາຫະນະສຳຫຼວດພື້ນຜິວດາວອັງຄານຄັນທຳອິດ ຄື Sojourner ໄປດາວອັງຄານເປັນຜົນສຳເລັດ ເມື່ອປີ 1997 ກ່ອນທີ່ຈະສົ່ງຍານພາຫະນະລັກສະນະຄ້າຍຄືກັນໄປອີກ 5 ຄັນ ໄດ້ແກ່ Spirit Opportunity Pathfinder Phoenix ແລະ InSight.
ສະຫະລັດອາເມຣິກາ ວາງແຜນໄວ້ວ່າຈະສົ່ງມະນຸດໄປຍັງດາວອັງຄານໃນອີກ ປະມານ 10 ກວ່າປີຂ້າງໜ້າ ໂດຍຈະເລີ່ມຈາກການສົ່ງມະນຸດຂຶ້ນໄປທົດລອງໃຊ້ຊີວິດເທິງດວງຈັນໃນໄລຍະເວລາໜຶ່ງ ກ່ອນທີ່ຈະກ້າວໄປເປັນການສົ່ງມະນຸດໄປຍັງດາວອັງຄານຕໍ່ໄປ.