ຊີວິດຂອງຄົນເຮົາ ມີຫຼາຍຄັ້ງທີ່ສາມາດພິກຊາຕາຟື້ນໂຕຂຶ້ນມາໄດ້ຈາກຄວາມຜິດຫວັງ ຫຼື ຈາກການດຳລົງຊີວິດທີ່ຜິດພາດ ເຊິ່ງຂຶ້ນກັບເຈົ້າຂອງຊີວິດທີ່ຈະແກ້ໄຂແນວຄິດ ແລະ ນິດໄສທີ່ຄົນອ້ອມຂ້າງບໍ່ມັກ ຫຼື ນິດໄສບາງຄົນກໍຕົກຢູ່ໃນລັກສະນະ ທ້ອງບໍ່ເຄີຍອີ່ມ ບາງຄົນເຄີຍຊິນກັບການຂໍ ຫຼື ແອບອ້າງນະໂຍບາຍ ເພື່ອຂໍເອົາຜົນປະໂຫຍດທີ່ເກີນລະບຽບຄວາມເໝາະສົມ ຖ້າທຽບໃສ່ອາຊີບພະນັກງານລັດຖະກອນ ກໍເວົ້າໄດ້ວ່າ ຂາດຈັນຍາບັນ ຂາດຈິດສຳນຶກແຫ່ງຄວາມລະອາຍແກ່ໃຈ.
ຄົນປະເພດທ້ອງບໍ່ເຄີຍອີ່ມ ຫຼື ຕັນຫາບໍ່ເຄີຍພໍ ເຮົາເຫັນແຈ້ງຈາກພຶດຕິກຳຂອງອີ່ຕາພາມເຖົ້າ ໃນນິທານເລື່ອງພະເຫວດສັນດອນ.. ທີ່ສະທ້ອນໃຫ້ສັງຄົມໄດ້ເຫັນແຈ້ງ ເພາະພາມເຖົ້າເປັນບຸກຄົນເຫັນແກ່ໄດ້ ແລະ ເປັນຄົນເຫັນແກ່ປາກທ້ອງ ນັກປາດປັນຍາຊົນ ເພິ່ນຈຶ່ງຍົກເອົາຊີວິດພາມເປັນຕົວຢ່າງ ເພື່ອເປັນແວ່ນແຍງໃຫ້ຄົນໃນສັງຄົມໄດ້ປຽບທຽບ ປີ 2020 ບາງຄົນກໍເອົາຊີວິດບໍ່ລອດຂ້າມປີ ແຕ່ຫຼາຍຄົນກໍມີຊີວິດຍືນຍາວ ຜ່ານພົ້ນອຸປະສັກ ຖືວ່າເປັນຄວາມໂຊກດີທີ່ມີບຸນປາລະມີຍູ້ໜູນ ແຕ່ກໍບໍ່ຄວນຫຼົງຕົວເອງ ເພື່ອຈະສ້າງຄວາມດີແກ່ໝູ່ເພື່ອນ ແລະ ສັງຄົມປະເທດຊາດກັນໄວ້ ຍາມຊາຕາຕົກ ພໍຈະໄດ້ເພິ່ງບຸນທີ່ຕົນເອງສ້າງໄວ້ ສ້າງຄວາມດີດ້ວຍການປ່ຽນນິດໄສເກົ່າທີ່ບໍ່ດີ ເຊັ່ນວ່າ: ນິດໄສເອົາປຽບຄົນອື່ນ ນິດໄສເຫັນແກ່ໄດ້ບໍ່ສົນໃຈລະບຽບວິໄນ ຫຼື ຈັນຍາບັນໃນອາຊີບ ເພາະທ່ານຜູ້ອ່ານອາດເຄີຍມີໝູ່ພວກຈົ່ມໃສ່ໃຫ້ຟັງວ່າ: ທ້າວນັ້ນທ້າວນີ້ ເຖິງຈະມີໜ້າທີ່ຕຳແໜ່ງສູງ ແຕ່ກໍແອບອ້າງເອົາໜ້າທີ່ສັ່ງໃຫ້ລູກນ້ອງໄປຂໍ ເພື່ອຫາປະໂຫຍດເຂົ້າຕົນເອງ.
ການສ້າງສັນສັງຄົມໃຫ້ປອດໃສເທື່ອລະກ້າວ ແນ່ນອນປາສະຈາກບໍ່ໄດ້ການປູກຝັງຈິດສຳນຶກຄ່ານິຍົມ ເຍົາວະຊົນໜຸ່ມນ້ອຍໃຫ້ຮູ້ຮັກໃນຄວາມຍຸຕິທຳ ແລະ ຊື່ກົງຕໍ່ອາຊີບ ຍົກຕົວຢ່າງ: ຖ້າເປັນຊາວພຸດ ກໍແມ່ນຫຼັກສິນ 5 ຂໍ້ ທີ່ຕ້ອງຮຽນຮູ້ບາງຂໍ້ ແລະ ຮູ້ຈັກປະພຶດເຄົາລົບຕໍ່ຊີວິດຂອງຄົນອື່ນ ເຊັ່ນ: ຂໍ້ທີໜຶ່ງບໍ່ໃຫ້ຂ້າສັດ (2) ບໍ່ໃຫ້ເປັນຄົນຂີ້ລັກ ໂລບລ້ຽວເອົາຊັບຂອງຄົນອື່ນ ຫຼື ສ່ວນລວມດ້ວຍອາການ ຫຼື ພຶດຕິກຳໃດກໍຕາມ ບາງຄົນອາດຈະຖືເບົາ ແລະ ບໍ່ເຂົ້າໃຈເລິກວ່າອາການຂີ້ລັກ ຫຼື ສ້າງຜົນປະໂຫຍດແກ່ຕົນນັ້ນ ມັນຜິດສິນທຳ ແລະ ຈັນຍາບັນ.
ສິນຂໍ້ 3 ຄື ກາເມ…ໄດ້ບອກເຈດຕະນາແຈ້ງວ່າ ຫ້າມບໍ່ໃຫ້ປະພຶດຜິດໃນການເສບກາມ ເຊັ່ນ: ການເປັນຊູ້ກັບລູກເມຍ ຫຼື ແຟນຄົນອື່ນ ເຊິ່ງຈະນຳພາຄວາມວຸ້ນວາຍແກ່ຊີວິດ ແລະ ສັງຄົມ ບາງກໍລະນີເຖິງຂັ້ນປະຮ້າງກັນ ເພາະລະເມີດສິນທຳ ແລະ ຮີດຄອງປະເພນີ ບາງກໍລະນີສູນເສຍອະນາຄົດ ເສຍຍົດຕຳແໜ່ງ ເພາະສິນຂໍ້ 3 ປີໃໝ່ແລ້ວ ເຮົາຄວນສ້າງຈິດສຳນຶກໃໝ່ !.
ໂດຍ: ດັ້ນກີບເມກ