ມີຫຼາຍຄົນມັກເວົ້າວ່າ ໄອຍະການສານ ຄວາມຈິງມັນເປັນ 2 ອົງການ ທີ່ເຮັດໜ້າທີ່ແຕກຕ່າງກັນໃນຂະບວນການດຳເນີນຄະດີອາຍາ ສະນັ້ນ ຈຶ່ງຍົກເອົາສິດ ແລະ ໜ້າທີ່ຂອງອົງການໄອຍະການນີ້ມາສະເໜີຕື່ມ ເພື່ອບໍ່ໃຫ້ເຂົ້າໃຈວ່າໄອຍະການກັບສານ ແມ່ນອົງການດຽວກັນຕາມຄວາມເຂົ້າໃຈນັ້ນ.
ໃນຖານະທີ່ເປັນໂຈດໃນຄະດີອາຍາ ໄອຍະການມີໜ້າທີ່ໃນການຄົ້ນຄວ້າ ແລະ ພິຈາລະນາສຳນວນຄະດີອາຍາທີ່ໄດ້ຮັບຈາກອົງການສືບສວນ-ສອບສວນ ຫາກມີພະຍານຫຼັກຖານພຽງພໍທີ່ໜ້າເຊື່ອຖືໄດ້ ໄອຍະການກໍຈະອອກຄຳສັ່ງຟ້ອງ ແລະ ນຳສະເໜີພະຍານຫຼັກຖານຕ່າງໆເພື່ອພິສູດຄວາມຈິງຂອງຜູ້ຕ້ອງຫາຕໍ່ສານ ເພື່ອໃຫ້ສານພິຈາລະນາຕັດສີນ ຫຼື ພິພາກສາລົງໂທດຜູ້ທີ່ໄດ້ກະທຳຜິດຢ່າງຍຸຕິທຳ ແລະ ພ້ອມດຽວກັນນັ້ນ ກໍຍັງປົກປ້ອງ ແລະ ຕິດຕາມກວດກາ ບໍ່ໃຫ້ມີການລົງໂທດຜູ້ບໍລິສຸດ ຫຼື ໃຫ້ຜູ້ກະທຳ ຜິດໄດ້ຮັບໂທດຢ່າງຍຸຕິທຳ ແລະ ໃນອີກຖານະໜຶ່ງໄອຍະການມີໜ້າທີ່ຕິດຕາມ ແລະ ກວດກາການປະຕິບັດກົດໝາຍໃນທົ່ວສັງຄົມ ຫາກເຫັນວ່າມີການລະເມີດກົດໝາຍ ໄອຍະການມີໜ້າທີ່ທັກທ້ວງ ຫຼື ຖ້າຫາກເຫັນວ່າມີການກະທຳຜິດກົດໝາຍອາຍາເກີດຂຶ້ນ ໄອຍະການມີໜ້າທີ່ອອກຄຳສັ່ງແລ້ວສົ່ງໃຫ້ພາກສ່ວນກ່ຽວຂ້ອງນຳເອົາໄປຈັດຕັ້ງປະຕິບັດທັນທີ ເນື່ອງຈາກກົດໝາຍຂອງ ສປປ ລາວ ໄດ້ມອບໝາຍໃຫ້ໄອຍະການເປັນຜູ້ມີສິດອຳນາດໃນການຄວບຄຸມ ແລະ ຕິດຕາມກວດກາການປະຕິບັດກົດໝາຍໃນທົ່ວສັງຄົມນັ້ນເອງ.
ນອກຈາກອົງການໄອຍະການປະຊາ ຊົນແລ້ວ ຍັງມີອົງການໄອຍະການທະຫານ ຊຶ່ງແມ່ນອົງການຈັດຕັ້ງໜຶ່ງໃນລະບົບອົງການໄອຍະການປະຊາຊົນແຫ່ງ ສປປ ລາວ ທີ່ສ້າງຕັ້ງຂຶ້ນໃນກອງທັບປະຊາຊົນລາວ ມີພາລະບົດບາດຕິດຕາມກວດກາ ການເຄົາລົບ ແລະ ປະຕິບັດກົດໝາຍຂອງນາຍ ພົນທະຫານ ກຳມະກອນ ພາລະກອນປ້ອງກັນຊາດ ແລະ ຂອງບຸກຄົນນອກກອງທັບ ທີ່ກະທຳຜິດໃນເຂດຍຸດທະສາດການທະຫານ ເຂດຕັ້ງທັບຂອງທະຫານ ແລະ ສັ່ງຟ້ອງຜູ້ຖືກຫາຂຶ້ນສານທະຫານຕາມກົດໝາຍກຳນົດໄວ້.
ໂດຍ: ໄມ້ງັດ