ເພື່ອປະຕິບັດຕາມຄຳສັ່ງຂອງທ່ານນາຍົກລັດຖະມົນຕີ ສະບັບເລກທີ 06/ນຍ ວ່າດ້ວຍການເພີ່ມທະວີມາດຕະການສະກັດກັ້ນ ການລະບາດ ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ COVID-19 ທາງອຳນາດການປົກຄອງເມືອງສີໂຄດຕະບອງ ຈຶ່ງໄດ້ແຕ່ງຄະນະຮັບຜິດຊອບສະກັດກັ້ນ ແລະ ປ້ອງກັນພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ COVID-19 ຂັ້ນເມືອງ ລວມທັງໝົດ 7 ທ່ານ ເພື່ອຊີ້ນຳວຽກງານດັ່ງກ່າວນີ້.
ທ່ານ ບຸນເຖິງ ວັນນາມະຫາໄຊ ປະທານກຳມະບານເມືອງສີໂຄດຕະບອງ ຄະນະກຳມະການສະເພາະກິດ ຕ້ານ ແລະ ສະກັດກັ້ນພະຍາດ COVID-19 ກຸ່ມບ້ານສີໄຄ ເມືອງສີໂຄດຕະບອງ ໃຫ້ສຳພາດໃນວັນທີ 04 ເມສາ 2020 ວ່າ: ພາຍຫຼັງທີ່ມີຄຳສັ່ງຂອງທ່ານນາຍົກລັດຖະມົນຕີ ເລກທີ 06/ນຍ ອອກມາ ອຳນາດການປົກຄອງເມືອງສີໂຄດຕະບອງ ກໍໄດ້ແຕ່ງຕັ້ງຄະນະຮັບຜິດຊອບວຽກງານນີ້ຂຶ້ນ ເພື່ອຈັດຕັ້ງໂຄສະນາ ເຜີຍແຜ່ການແຜ່ລະບາດ ແລະ ຜົນຮ້າຍຂອງພະຍາດ COVID-19 ໃຫ້ແກ່ປະຊາຊົນ ພະນັກງານ ທະຫານ ຕຳຫຼວດ ລວມທັງຊາວຕ່າງປະເທດ ທີ່ເຄື່ອນໄຫວຢູ່ເມືອງສີໂຄດຕະບອງ ໄດ້ຮັບຮູ້ ເຂົ້າໃຈ ແລະ ຮ່ວມມືໃນການປ້ອງກັນຕົນເອງ.
ພ້ອມດຽວກັນນີ້ ຍັງໄດ້ຮ່ວມກັບກອງຮ້ອຍຕຳຫຼວດຈະລາຈອນເມືອງ ສາທາລະນະສຸກເມືອງ ອຳນາດການປົກຄອງບ້ານ ປກສ ເມືອງ ແລະ ປກສ ກຸ່ມ ຕັ້ງຈຸດກວດກາການເຂົ້າ-ອອກເມືອງສີໂຄດຕະບອງ ຊົ່ວຄາວ ທັງໝົດ 7 ຈຸດ ເຊິ່ງໄດ້ເລີ່ມຈັດຕັ້ງປະຕິບັດມາແຕ່ວັນທີ 03 ເມສາ 2020 ຄື: ຢູ່ກຸ່ມບ້ານໃໝ່ ກຸ່ມເກົ້າລ້ຽວ ກຸ່ມສີໄຄ ກຸ່ມໜອງໜ້ຽວ ກຸ່ມໜອງບຶກ ກຸ່ມໜອງດ້ວງ ແລະ ກຸ່ມສີຖານ ເພື່ອເຜີຍແຜ່ແນະນຳການແຜ່ລະບາດ ແລະ ຜົນຮ້າຍຂອງພະຍາດ COVID-19 ໃຫ້ບັນດາຜູ້ທີ່ໃຊ້ລົດໃຊ້ຖະໜົນໄດ້ຮັບຮູ້ ແລະ ເຂົ້າໃຈກ່ຽວກັບຜົນຮ້າຍຂອງພະຍາດດັ່ງກ່າວນີ້ ຖ້າບໍ່ມີຄວາມຈຳເປັນ ແມ່ນຫ້າມອອກຈາກເຮືອນເປັນເດັດຂາດ ຖ້າຍັງພົບເຫັນອີກ ຈະມີການກ່າວເຕືອນ ຫຼື ເຮັດບົດບັນທຶກ ຖ້າຍັງດື້ດ້ານຝ່າຝືນ ກໍຈະນຳໂຕໄປດຳເນີນຄະດີຕາມລະບຽບກົດໝາຍ ທັງນີ້ກໍເພື່ອເປັນຫຼຸດຜ່ອນການແຜ່ລະບາດຂອງເຊື້ອ COVID-19 ນີ້.