ໂລກເບົາຫວານ ເກີດຈາກລະດັບນ້ຳຕານໃນ ເລືອດສູງກວ່າຄົນປົກກະຕິ ຕ້ອງຄວບຄຸມອາຫານ ແລະ ນ້ຳໜັກໃຫ້ຢູ່ໃນລະດັບທີ່ເໝາະສົມ ດັ່ງນັ້ນ ເລື່ອງການຮັບປະທານອາຫານຈຶ່ງເປັນເລື່ອງທີ່ສຳຄັນຫຼາຍທີ່ສຸດທີ່ຈະຊ່ວຍຫຼຸດການສ່ຽງເປັນໂລກເບົາຫວານ ຫຼື ຄົນທີ່ກຳລັງເປັນຢູ່ກໍຕາມ.
ປັດຈຸບັນ ມີຜູ້ປ່ວຍເປັນໂລກເບົາຫວານເປັນຈຳ ນວນຫຼວງຫຼາຍ ດັ່ງນັ້ນ ເຮົາຈຶ່ງນຳ 3 ອ ທີ່ຈະ ຊ່ວຍຫຼຸດຄວາມສ່ຽງເປັນໂລກເບົາຫວານມາແນະນຳໃຫ້ກັບທຸກຄົນຄື:
ອ. 1 ຄື ອາຫານທີ່ “ບໍ່ຄວນ” ຮັບປະທານ
1.1) ນ້ຳຕານທຸກຊະນິດ ເຊັ່ນ ນ້ຳຕານອ້ອຍ ນ້ຳຕານປີ໊ບ ຫຼື ເຄື່ອງດື່ມທີ່ມີນ້ຳຕານເປັນສ່ວນປະສົມຫຼາຍ ເຊັ່ນ: ນ້ຳເກ໊ກຮວຍ ຊາຂຽວ ນ້ຳອັດລົມ ກາເຟປຸງສຳເລັດ ຊາໄຂ່ມຸກ ແລະ ຂະໜົມຫວານຕ່າງໆ ເຄັກ ຄຸກກີ ໂດນັດ ເປັນຕົ້ນ.
1.2) ຜະລິດຕະພັນນົມ ໄດ້ແກ່ ນົມປຸງແຕ່ງລົດຫວານ ນົມສົ້ມປຸງແຕ່ງລົດຊາດ ນົມຂຸ້ນຫວານ ບາງຄົນມັກກິນໂຣຕີໃສ່ນົມຂຸ້ນຫຼາຍໆ ຫຼືພວກທີ່ມັກກິນປາທ່ອງໂກ໋ຈິ້ມນົມຂຸ້ນ ແບບນີ້ຕົວດີເລີຍ ຊຶ່ງຈະເປັນຕົວນຳໂລກເບົາຫວານມາໃຫ້ໄດ້ ດັ່ງນັ້ນ ຄວນຈະຫຼີກລ່ຽງການກິນຂອງກິນລັກສະນະນີ້.
1.3) ໝາກໄມ້ກວນ ໝາກໄມ້ແຊ່ອີ່ມ ໝາກໄມ້ເຊື່ອມ ໝາກໄມ້ຕາກແຫ້ງ ເຊັ່ນ ກ້ວຍຕາກ ໝາກອະງຸ່ນແຫ້ງ ລວມເຖິງໝາກໄມ້ເຊື່ອມບັນຈຸໃນ ກະປ໋ອງ ເປັນຕົ້ນ ຊຶ່ງໝາກໄມ້ທີ່ບອກມາທັງໝົດນີ້ ຕ່າງກໍມີນ້ຳຕານຢູ່ໃນຕົວຢູ່ແລ້ວ ຫາກເຮົາໄປເຮັດໃຫ້ມັນຫວານຂຶ້ນ ແຊບຂຶ້ນ ຊຶ່ງແນ່ນອນວ່າມັນຄົງຈະບໍ່ມີປະໂຫຍດຫຼາຍຂຶ້ນ ແຖມອາດຈະເຮັດໃຫ້ປະໂຫຍດຫຼຸດໜ້ອຍລົງ ດັ່ງນັ້ນ ຄວນກິນໃຫ້ໜ້ອຍ ພຽງແຕ່ພໍຫາຍຢາກກໍພໍ.
1.4) ອາຫານທີ່ປຸງດ້ວຍໄຂມັນອີ່ມຕົວ ເຊັ່ນ ໄຂມັນສັດ ໄສ້ກອກ ໝູສາມຊັ້ນ ແກງກະທິ ເນີຍ ຄຣີມ ເປັນຕົ້ນ.
ອາຫານທັງໝົດທີ່ໄດ້ກ່າວມາ ທຸກຢ່າງລ້ວນມີນ້ຳຕານເປັນສ່ວນປະກອບ ຊຶ່ງບໍ່ເໝາະກັບຜູ້ປ່ວຍທີ່ເປັນໂລກເບົາຫວານ ຄວນຫຼີກລ່ຽງ !
ອ. 2 ຄື ອາຫານທີ່ຮັບປະທານໄດ້ “ບໍ່ຈຳກັດປະລິມານ”.
ອາຫານທີ່ກິນໄດ້ຢ່າງບໍ່ຈຳກັດປະລິມານ ກໍຄື ຜັກກ້ານ ຜັກໃບ ຜັກໃບຂຽວທຸກຊະນິດ ເຊັ່ນ ຜັກກາດກວາງຕຸ້ງ ໝາກບວບ ໝາກເຂືອ ໝາກໂຕ່ນ ໝາກແຕງ ໝາກນ້ຳ ໝາກຖົ່ວງອກ ເປັນຕົ້ນ ຈະຮັບປະທານໃນຮູບແບບຜັກສົດກໍໄດ້ ແຕ່ຕ້ອງລ້າງໃຫ້ສະອາດກ່ອນ ຫຼືຈະນຳໄປຕົ້ມກໍໄດ້ ແຕ່ບໍ່ແນະນຳໃຫ້ກິນໃນລັກສະນະຂອງນ້ຳຜັກປັ່ນ ໂດຍສະເພາະ ນ້ຳຜັກປັ່ນແຍກກາກ ເພາະຈະເຮັດໃຫ້ເຮົາໄດ້ຮັບໄຍອາຫານທີ່ບໍ່ຫຼາຍເທົ່າທີ່ຄວນ.
ຄວນຮັບປະທານທຸກວັນ ທຸກຄາບ ແລະ ກິນໃຫ້ຫຼາກຫຼາຍຊະນິດໃນໜຶ່ງວັນ ອາຫານເຫຼົ່ານີ້ ເປັນອາຫານທີ່ມີແຄລໍຣີ່ຕ່ຳ ແຕ່ມີໄຍອາຫານສູງ ເຮັດໃຫ້ການດູດຊຶມຊັບນ້ຳຕານຊ້າລົງ ອີກທັງ ໄຍອາຫານຍັງຊ່ວຍດູດຊຶມຊັບນ້ຳຕານບໍ່ໃຫ້ເຂົ້າສູ່ກະແສເລືອດໄວເກີນໄປ ເຮັດໃຫ້ຮ່າງກາຍສາມາດດຶງນ້ຳຕານໄປໃຊ້ໄດ້ຢ່າງພໍດີ.
ທັ້ງນີ້ ອົງການອະນາໄມໂລກໄດ້ກຳນົດເຮົາບໍລິໂພກຜັກ ແລະ ໝາກໄມ້ຢ່າງໜ້ອຍ 400 ກຣາມຕໍ່ວັນ ຫຼືທຽບເທົ່າປະລິມານ 4-6 ຈອງ ຫາກເປັນຜັກຕົ້ມຈະຕ້ອງກິນເພີ່ມອີກ 2 ເທົ່າ ແລະ ທາງ ສຳນັກງານກອງທຶນສະໜັບສະໜູນການສ້າງ ເສີ່ມສຸຂະພາບ ໄດ້ເປີດເຜີຍຜົນທາງວິໄຈແລ້ວວ່າ ການກິນຜັກ ແລະ ໝາກໄມ້ຢ່າງໜ້ອຍວັນລະ 400 ກຣາມ ສາມາດຫຼຸດຄວາມສ່ຽງຕໍ່ການເປັນໂລກຫົວໃຈ 33% ແລະ ໂລກມະເຮັງໄດ້ 50% ເມື່ອທຽບກັບຄົນທີ່ກິນຜັກ ແລະ ໝາກໄມ້ຕ່ຳກວ່າເກນ.
ອ. 3 ຄື ອາຫານທີ່ຮັບປະທານໄດ້ ແຕ່ຕ້ອງ “ຈຳກັດປະລິມານ”
3.1) ອາຫານປະເພດຄາຣ໌ໂບໄຮເດຣດ ເຊັ່ນ ເຂົ້າ ເຝີ ເຂົ້າຈີ່ ເຜືອກ ມັນ ແລະ ອື່ນໆ ອາຫານເຫຼົ່ານີ້ມີຄາຣ໌ໂບໄຮເດຣດໜ້ອຍກວ່ານ້ຳຕານ ແລະ ມີໂປຣຕີນ ວິຕາມິນ ແຮ່ທາດ ໄຍອາຫານທີ່ຈຳເປັນຕໍ່ຮ່າງກາຍ ອາຫານຈຳພວກແປ້ງນັ້ນເວລາຖືກຍ່ອຍ ມັນຈະກາຍເປັນນ້ຳຕານ ແລະ ເປັນແຫຼ່ງພະລັງງານທີ່ສຳຄັນຂອງຮ່າງກາຍຜູ້ທີ່ເປັນໂລກເບົາຫວານຈຶ່ງບໍ່ຄວນງົດ ຫຼື ກິນຫຼາຍ ຈົນເກີດປະລິມານທີ່ຈະໃຊ້ແຮງງານໃນແຕ່ລະວັນ ບາງຄົນຖາມວ່າກິນພຽງໃດຈຶ່ງບໍ່ຫຼາຍ ແລະ ບໍ່ໜ້ອຍເກີນໄປ ຄົງບໍ່ມີໃຜທຸກຄົນມານັ່ງຊັ່ງກັນດອກວ່າ ເຂົ້າຄາບນີ້ຕ້ອງກິນຈັກຂີດ ຈັກກຣາມ ເພາະສະນັ້ນ ໃຊ້ເຕັກນິກງ່າຍໆໃນການສັງເກດຄື ເຮົາຕ້ອງສັງເກດຕົວເຮົາເອງວ່າເຮົາໃຊ້ແຮງງານປະລິມານໃດ ເຮົາກໍຄວນຈະກິນພຽງແຕ່ປະມານນັ້ນ ໃຫ້ເໝາະສົມກັບແຮງງານ ແລະ ກິດຈະກຳທີ່ເຮັດ.
3.2) ໝາກໄມ້ ໝາກໄມ້ແຕ່ລະຊະນິດຈະມີປະລິມານຄາຣ໌ໂບໄຮເດຣດທີ່ແຕກຕ່າງກັນໄປ ຊຶ່ງຄາຣ໌ໂບໄຮເດຣດໃນໝາກໄມ້ຢູ່ໃນຮູບແບບຂອງນ້ຳຕານ ໂດຍໝາກໄມ້ບາງຊະນິດຈະມີນ້ຳ ຕານຫຼາຍ ເຊັ່ນ: ທຸລຽນ ມີນ້ຳຕານປະມານ 30-35% ໝາກກ້ຽງມີປະມານ 10% ແລະ ໝາກຂາມຫວານມີປະມານ 75-80% ຊຶ່ງໝາກໄມ້ທີ່ຍິ່ງມີຄວາມຫວານຫຼາຍກໍຈະຍິ່ງເຮັດໃຫ້ມີລະດັບນ້ຳຕານໃນເລືອດສູງຂຶ້ນຫຼາຍດ້ວຍ ຈຶ່ງຄວນຫຼີກລ່ຽງໝາກໄມ້ທີ່ມີລົດຊາດຫວານຫຼາຍ ເຊັ່ນ: ລຳໄຍ ທຸລຽນ ອະງຸ່ນ ໝາກມ່ວງສຸກ ເປັນຕົ້ນ.
ຢ່າງໃດກໍຕາມ ເຖິງແມ່ນວ່າເຮົາແນະນຳບໍ່ໃຫ້ກິນນ້ຳຕານໃນປະລິມານທີ່ຫຼາຍປານໃດ ແຕ່ນ້ຳຕານກໍເປັນສິ່ງທີ່ສຳຄັນຂອງຮ່າງກາຍທີ່ຂາດບໍ່ໄດ້ເຊັ່ນດຽວກັນກັບນ້ຳ ຫຼື ວິຕາມິນທັງຫຼາຍ ເພາະສະນັ້ນ ເຮົາບໍ່ຄວນອົດ ແຕ່ເຮົາຄວນຈະກິນຢ່າງມີວິໄນ ກິນຕາມປະລິມານທີ່ກຳນົດ ໂດຍອົງການອະນາໄມໂລກຮັບຮອງວ່າບໍ່ຄວນເກີນ 5% ຂອງພະລັງງານທີ່ໄດ້ຮັບຕໍ່ວັນ ເທົ່າກັບ 4 ບ່ວງຊາ ຫຼື 20 ກຣາມຕໍ່ວັນພຽງເທົ່ານັ້ນ ລວມທັງຄວນອອກກຳລັງກາຍຢ່າງສະໝ່ຳສະເໝີຮ່ວມດ້ວຍ ເພື່ອສຸຂະພາບທີ່ດີຢ່າງໝັ້ນຍືນ