ລັດໃນຖານະເປັນຜູ້ຮັບຜິດຊອບ ໃນການບັງຄັບໃຊ້ປະມວນກົດໝາຍອາຍາ ແລະ ນຳໃຊ້ປະມວນກົດໝາຍອາຍາ ໃຫ້ສອດຄ່ອງກັບລະບອບການປົກຄອງ ແບບປະຊາທິປະໄຕ ປະຊາຊົນ ໂດຍຮັບປະກັນຫຼັກນິຕິທຳ ດັ່ງນັ້ນ ລັດຈຶ່ງກຳນົດໄວ້ໃນປະມວນກົດໝາຍອາຍາ ແລະ ກົດໝາຍ ວ່າດ້ວຍການດຳເນີນຄະດີອາຍາ ເພື່ອໃຫ້ລັດສ້າງຕັ້ງອົງການໃນຂະບວນການຍຸຕິທຳທາງອາຍາຂຶ້ນມາ ແລະ ໃຫ້ອົງການດັ່ງກ່າວໄດ້ນຳເອົາຜົນສັກສິດຂອງກົດໝາຍອາຍາໄປຈັດຕັ້ງປະຕິບັດ ເພື່ອຄຸ້ມຄອງສັງຄົມ ຊຶ່ງອົງການໃນຂະບວນການຍຸຕິທຳດັ່ງກ່າວນັ້ນປະກອບດ້ວຍ ອົງການສືບສວນ-ສອບສວນ ອົງການໄອຍະການ ສານປະຊາຊົນ ແລະ ຄ້າຍຄຸມຂັງ ຫຼື ຄ້າຍດັດສ້າງ ຊຶ່ງອົງການສືບສວນ-ສອບສວນມີໜ້າທີ່ດັ່ງນີ້:
ອົງການສືບສວນ-ສອບສວນປະກອບມີ: ອົງການສືບສວນ-ສອບສວນຂອງເຈົ້າໜ້າທີ່ຕຳຫຼວດ ອົງການສືບສວນ-ສອບສວນຂອງເຈົ້າໜ້າທີ່ທະຫານ ອົງການສືບສວນ-ສອບສວນຂອງເຈົ້າໜ້າທີ່ພາສີ ອົງການສືບສວນ-ສອບສວນຂອງເຈົ້າໜ້າທີ່ປ່າໄມ້ ແລະ ເຈົ້າໜ້າທີ່ອື່ນໆ.
ໃນບັນດາອົງການ ໃນຂະບວນການຍຸຕິທຳນີ້ ອົງການສືບສວນ-ສອບສວນຂອງເຈົ້າໜ້າທີ່ຕຳຫຼວດ ເປັນໜ່ວຍງານທຳອິດໃນຂະບວນການຍຸຕິທຳທາງອາຍາ ທີ່ຈັດຕັ້ງປະຕິບັດກົດໝາຍທີ່ກ່ຽວຂ້ອງທັງໝົດ ເພື່ອຈຳກັດ ແລະ ສະກັດກັ້ນການກະທຳຜິດ ແລະ ການລະເມີດກົດໝາຍອື່ນ ບໍ່ໃຫ້ເກີດຂຶ້ນໃນສັງຄົມ ຫຼື ຖ້າເກີດຂຶ້ນກໍໃຫ້ເກີດຂຶ້ນໜ້ອຍທີ່ສຸດ ແລະ ໃນຂະນະດຽວກັນນັ້ນ ກໍຕ້ອງປະຕິບັດຕໍ່ຜູ້ກະທຳຜິດຢ່າງສະເໝີພາບ ແລະ ດ້ວຍຄວາມເປັນທຳ ຕຳຫຼວດໃນຖານະທີ່ເປັນໜ່ວຍງານປ້ອງກັນຄວາມສະຫງົບເບື້ອງຕົ້ນ ໂດຍຮັບຜິດຊອບກ່ຽວກັບການຈັດຕັ້ງປະຕິບັດກົດໝາຍໃຫ້ປາກົດຜົນເປັນຈິງ ຄືຮັກສາຄວາມສະຫງົບຮຽບຮ້ອຍ ແລະ ຄວາມປອດໄພຂອງຊາດ ຊຶ່ງເປັນອົງການທຳອິດເລີ່ມຕົ້ນຄະດີອາຍາ ໜ້າທີ່ໃນການຄຸ້ມຄອງສັງຄົມຂອງກົດໝາຍອາຍາ ໃນຂັ້ນຕອນນີ້ກົດໝາຍໄດ້ໃຫ້ຕຳຫຼວດມີສິດອຳນາດໃນການກວດຄົ້ນ ການຈັບຕົວກັກຂັງ ສືບສວນ-ສອບສວນ ຕາມຄຳສັ່ງຂອງໄອຍະການ ຫຼື ສານ ຫຼື ອົງການທີ່ມີສິດອຳນາດອື່ນໆ ເພື່ອຄົ້ນຫາຄວາມຈິງໃຫ້ປາກົດແລ້ວ ລວບລວມພະຍານຫຼັກຖານສົ່ງໃຫ້ໄອຍະການດຳເນີນຄະດີເປັນຂັ້ນຕອນຕໍ່ໄປ.
ໂດຍ: ໄມ້ງັດ