ບັນຫາສິ່ງແວດລ້ອມມີຄວາມສຳຄັນຕໍ່ມະນຸດສອງປະການ ຄື: ສິ່ງແວດລ້ອມທາງທຳມະຊາດ ແລະ ສິ່ງແວດລ້ອມທາງສັງຄົມ ສິ່ງແວດລ້ອມທາງທຳມະຊາດຕິດພັນສະນິດແໜ້ນກັບການດຳລົງຊີວິດປະຈຳວັນຂອງມວນມະນຸດ ແມ່ນທຸກສິ່ງທຸກຢ່າງທີ່ມີຢູ່ອ້ອມຮອບຕົວຄົນເຮົາເປັນຕົ້ນ ດິນ ຟ້າ ອາກາດ ພູຜາ ປ່າດົງ ສາຍນ້ຳລຳທານ ຕະຫຼອດເຖິງທຸກສິ່ງວັດຖຸທີ່ອຳນວຍຄວາມສະດວກໃຫ້ແກ່ການດຳລົງຊີວິດປະຈຳວັນເຊັ່ນ ເຄື່ອງອຸປະໂພກ ແລະ ບໍລິໂພກທີ່ຖືກຫຸ້ມຫໍ່ດ້ວຍພາຊະນະສີສັນສວຍງາມ ດຶງດູດໃຈຜູ້ຊົມໃຊ້ ເມື່ອສຳເລັດໜ້າທີ່ເປົ້າໝາຍແລ້ວ ມັນກໍກາຍເປັນຂີ້ເຫຍື້ອໃຫ້ຄົນເຮົາຈະຕ້ອງບໍລິຫານຈັດການ ໃຫ້ຖືກຕ້ອງຖ້າມ້ຽນມັດບໍ່ຖືກຫຼັກການມັນກໍຈະສົ່ງກິ່ນເໝັນລົບກວນ ຫຼື ອາດຈະເປັນບ່ອນບົ່ມເຊື້ອພະຍາດຕິດຕໍ່ໃສ່ຄົນເຮົາກໍອາດເປັນໄດ້.
ສະພາບແວດລ້ອມໃນ ສປປ ລາວ ກຳລັງມີການປ່ຽນແປງຢ່າງໄວວາຍ້ອນການພັດທະນາດ້ານເສດຖະກິດ ໃນຂະນະທີ່ສາມາດເຫັນໄດ້ເຖິງຜົນກະທົບຫຼາຍຢ່າງຕໍ່ສິ່ງແວດລ້ອມ ຜົນກະທົບທີ່ພົ້ນເດັ່ນແມ່ນກ່ຽວພັນກັບການຕັດໄມ້ທຳລາຍປ່າ ມົນລະພິດດິນ ແລະ ນ້ຳ ການປ່ຽນແປງໃນການໄຫຼວຽນຂອງນ້ຳ ແລະ ການສູນເສຍຊີວະນາໆພັນ ນອກນັ້ນ ການປ່ຽນແປງຂອງສະພາບອາກາດໃນທົ່ວໂລກກໍຍັງສົ່ງຜົນກະທົບຢ່າງຕໍ່ເນື່ອງຕໍ່ຊີວິດການເປັນຢູ່ ແລະ ການພັດທະນາຂອງລາວ ການຕັດໄມ້ທຳລາຍປ່າ ຫຼື ການຫຼຸດລົງຂອງພື້ນທີ່ປົກຄຸມປ່າໄມ້ ການຂະຫຍາຍພື້ນທີ່ກະສິກຳລວມເຖິງການປູກໄມ້ອຸດສາຫະກຳ ການສ້າງເຂື່ອນໄຟຟ້ານ້ຳຕົກ ແລະ ຊົນລະປະທານ ການຂຸດຄົ້ນບໍ່ແຮ່ ໄຟປ່າ ແລະ ການສ້າງຖະໜົນຫົນທາງເຮັດໃຫ້ຄຸນະພາບ ແລະ ການບໍລິການດ້ານລະບົບນິເວດຂອງພື້ນທີ່ປ່າໄມ້ຫຼຸດລົງ.
ການປ່ຽນແປງຢ່າງໄວວາໃນການດຳເນີນການບໍລິຫານຈັດການດິນ ແລະ ການນຳໃຊ້ຊັບພະຍາກອນທຳມະຊາດໃນລາວ ໄດ້ນຳໄປສູ່ການນຳໃຊ້ສານເຄມີໃນການເຮັດກະສິກຳ ເພື່ອຊ່ວຍເຂົ້າໃນການຂະຫຍາຍທີ່ດິນກະສິກຳ ການປູກໄມ້ອຸດສາຫະກຳ ແລະ ການຂຸດຄົ້ນບໍ່ແຮ່ຕ່າງໆ ການພັດທະນາຢ່າງໄວວາຂອງອຸດສາຫະກຳສວນຢາງພາລາ ແລະ ສວນໄມ້ເພື່ອຜະລິດເຈ້ຍຂະໜາດໃຫຍ່ ປະກອບກັບແຮງງານທີ່ຈຳກັດເຮັດໃຫ້ມີການນຳໃຊ້ປຸຍ ແລະ ຢາຂ້າຫຍ້າຈຳນວນຫຼວງຫຼາຍ ສານເຄມີໃນການກະສິກຳເຫຼົ່ານີ້ ກໍ່ໃຫ້ເກີດບັນຫາດ້ານສຸຂະພາບຂອງຜູ້ອອກແຮງງານ ແລະ ແຫຼ່ງນ້ຳດື່ມທີ່ປົນເປື້ອນມົນລະພິດເຊັ່ນຫ້ວຍນ້ຳຕ່າງໆ.
ນອກນັ້ນການປ່ອຍຂອງເສຍຈາກການຂຸດຄົ້ນບໍ່ແຮ່ກໍມີການເຊື່ອມໂຍງກັບມົນລະພິດທາງດິນ ແລະ ນ້ຳເປັນຕົ້ນການນຳໃຊ້ສານໄຊຍາໄນ (cyanide) ໃນການຂຸດຄົ້ນບໍ່ຄຳໄດ້ສົ່ງຜົນໃຫ້ປາຕາຍ ແລະ ມີການປົນເປື້ອນໃນດິນ ເຖິງແມ່ນວ່າການຂຸດຄົ້ນບໍ່ແຮ່ຂະໜາດໃຫຍ່ຈະນຳໃຊ້ເຕັກໂນໂລຊີທີ່ທັນສະໄໝເພື່ອຊ່ວຍໃຫ້ການໃຊ້ສານເຄມີອຸດສາຫະກຳມີຄວາມປອດໄພ ແລະ ມີປະສິດທິພາບຫຼາຍຂຶ້ນ ແຕ່ການຂຸດຄົ້ນດັ່ງກ່າວກໍ່ຍັງເຮັດໃຫ້ພື້ນທີ່ປ່າໄມ້ທີ່ກວ້າງໃຫຍ່ເຊື່ອມໂຊມລົງໄດ້ ການຂຸດຄົ້ນບໍ່ແຮ່ຂະໜາດນ້ອຍກໍມີຜົນກະທົບຕໍ່ສິ່ງແວດລ້ອມໂດຍການຈຳກັດ ການນຳໃຊ້ທີ່ດິນທຳການຜະລິດ ແລະ ການປະມົງເນື່ອງຈາກການຂຸດຄົ້ນ ຫຼື ການປົນເປື້ອນສານບາຫຼອດ ໂຄງການຂະໜາດກາງອື່ນໆ.
ອີກດ້ານໜຶ່ງການຂະຫຍາຍຕົວຂອງຕົວເມືອງ ແລະ ຮູບແບບການບໍລິໂພກໄດ້ສົ່ງຜົນໃຫ້ການຜະລິດຂີ້ເຫຍື້ອເພີ່ມຂຶ້ນ ໂດຍສະເລ່ຍການສ້າງຂີ້ເຫຍື້ອໃນຕົວເມືອງຫຼາຍກິໂລຕໍ່ຫົວຄົນຕໍ່ວັນ ເຊິ່ງວິທີຫຼັກໃນການກຳຈັດຂີ້ເຫຍື້ອເຫຼົ່ານີ້ແມ່ນການນຳໃຊ້ສະໜາມຝັງຂີ້ເຫຍື້ອ ນອກຈາກນັ້ນ ກໍຍັງມີການຈູດຂີ້ເຫຍື້ອຕາມສະຖານທີ່ຫວ່າງເປົ່າ ການຖິ້ມຂີ້ເຫຍື້ອໃນຊຸມຊົນແມ່ນຂາດການບໍລິຫານຈັດການທີ່ດີ ບາງແຫ່ງກໍທຳການຈູດຂີ້ເຫຍື້ອ ຫຼື ຖີ້ມຂີ້ເຫຍື້ອແບບຊະຊາຍຢູ່ຕາມສະຖານທີ່ເປົ່າຫວ່າງ ຮ່ອງນ້ຳ ຫຼື ແມ່ນ້ຳຕ່າງໆລວມທັງຂີ້ເຫຍື້ອອັນຕະລາຍເຊັ່ນ: ຖ່ານໄຟສາຍ ກະປ໋ອງສີ ແລະ ປ໋ອງສະເປຕ່າງໆກໍຖີ້ມປະປົນກັບຂີ້ເຫຍື້ອທົ່ວໄປ ສົ່ງຜົນກະທົບຕໍ່ການໄຫຼຊຶມຂອງນ້ຳທີ່ອາດເກີດຂຶ້ນຕໍ່ກັບທີ່ດິນ ແຫຼ່ງນ້ຳເທິງໜ້າດິນ ແລະ ນ້ຳບາດານ.
ເຖິງແມ່ນວ່າປະເທດລາວມີຊັບພະຍາກອນນ້ຳຢ່າງຫຼວງຫຼາຍ ການພັດທະນາດ້ານເສດຖະກິດທີ່ໄວວາ ໂຄງການຂຸດຄົ້ນຊັບພະຍາກອນຕ່າງໆ ແລະ ການປ່ຽນແປງຂອງສະພາບອາກາດໄດ້ສົ່ງຜົນກະທົບຕໍ່ການໄຫຼວຽນຂອງນ້ຳ ແລະ ຄວາມໝັ້ນຄົງທາງນ້ຳ ເປັນຕົ້ນ ແມ່ນຜົນກະທົບຂອງເຂື່ອນໄຟຟ້ານ້ຳຕົກໄດ້ເຮັດໃຫ້ເກີດມີນ້ຳຖ້ວມໃນພື້ນທີ່ຕົ້ນນ້ຳ ການປ່ຽນແປງທາງໄຫຼຂອງນ້ຳ ຄວາມຂຸ່ນຂອງນ້ຳ ແລະ ຈຳນວນຕະກອນໃນເຂດລ້ອງ ຕໍ່ກັບຜົນກະທົບດັ່ງກ່າວ ໄດ້ສົ່ງຜົນຕໍ່ການສູນເສຍຊີວະນາໆພັນອີກດ້ວຍ.