ໃນຍຸກສັງຄົມອອນລາຍນີ້ ຄົນເຮົາໄດ້ຮັບຄວາມສະດວກສະບາຍນາໆປະການໃນຊີວິດ ກໍຄື ການເຄື່ອນໄຫວ ແຕ່ພ້ອມດຽວກັນກໍມີບັນຫາ ແລະ ສິ່ງທ້າທາຍເປັນເງົາຕາມຕົວມາ ດັ່ງນັ້ນ ຈຳເປັນຈະຕ້ອງໄດ້ສ້າງລະບົບລະບຽບ ກໍຄື ມາດຕະການທາງດ້ານກົດໝາຍ ເພື່ອຄຸ້ມຄອງສື່ສັງຄົມອອນລາຍໃນຍຸກດີຈີຕອນນີ້ ດັ່ງຈະຍົກບົດຮຽນຈາກຝຣັ່ງ ແລະ ຈີນມາເລົ່າສູ່ຟັງ.
ທີ່ ຝຣັ່ງ: ໃນລະຫວ່າງກາງເດືອນພະຈິກ ປີ 2020 ທາງການຂອງປະເທດຝຣັ່ງ ໄດ້ສະເໜີຮ່າງກົດໝາຍວ່າດ້ວຍຄວາມໝັ້ນຄົງສະບັບໃໝ່ ທີ່ມີການກຳນົດຫ້າມເຜີຍແຜ່ພາບທີ່ມີເນື້ອໃນໃສ່ຮ້າຍປ້າຍສີເຈົ້າໜ້າທີ່ ທີ່ກຳລັງປະຕິບັດວຽກງານ ຈຸດປະສົງຕົ້ນຕໍຂອງກົດໝາຍ ແມ່ນເພື່ອປົກປ້ອງເຈົ້າໜ້າທີ່ຕຳຫຼວດຈາກການໂຈມຕີທາງອອນລາຍ ມາດຕະການ 24 ຂອງຮ່າງກົດໝາຍສະບັບນີ້ ໄດ້ກຳນົດຄວາມຜິດທາງອາຍາ ດ້ວຍໂທດຈຳຄຸກ 1 ປີ ແລະ ປັບໃໝເປັນເງິນ 45 ພັນເອີໂຣ (ປະມານ 486 ລ້ານກວ່າກີບ) ຕໍ່ຜູ້ເຜີຍແຜ່ພາບທີ່ມີເປົ້າໝາຍທຳລາຍ ສ້າງພາບພົດບໍ່ດີ ຫຼື ສ້າງຄວາມກະທົບກະເທືອນທາງດ້ານຮ່າງກາຍ ແລະ ຈິດໃຈແກ່ເຈົ້າໜ້າທີ່ຕຳຫຼວດ ພິເສດ ກົດໝາຍຍັງໄດ້ອະນຸຍາດໃຫ້ເຜີຍແຜ່ຮູບພາບທີ່ບັນທຶກດ້ວຍກ້ອງຕິດຕົວ ຂອງຕຳຫຼວດເວລາປະຕິບັດໜ້າທີ່ ທັງນີ້ກໍເພື່ອສົມທຽບກັບພາບທີ່ຖືກເຜີຍແຜ່ທາງສື່ສັງຄົມອອນລາຍ ເພາະວ່າພາບທີ່ຖືກເຜີຍແຜ່ນັ້ນ ມັກຖືກຕັດຕໍ່ດັດແປງເພື່ອບິດເບືອນຄວາມຈິງ ເຮັດໃຫ້ປະຊາຊົນເຫັນການປະຕິບັດງານຂອງເຈົ້າໜ້າທີ່ຜິດໄປຈາກຄວາມເປັນຈິງ ແນວໃດກໍດີ ຮ່າງກົດໝາຍສະບັບນີ້ ກໍໄດ້ປະເຊີນກັບສຽງຄັດຄ້ານວ່າ ເປັນກົດໝາຍທີ່ລະເມີດສິດທິເສລີພາບ ໃນການລາຍງານຂ່າວ.
ທີ່ ສປ ຈີນ: ການຊື້-ຂາຍສິນຄ້າ ກໍຄື ການໃຊ້ບໍລິການຕ່າງໆຜ່ານອອນລາຍນັ້ນ ໄດ້ກາຍເປັນກະແສມາແຮງໃນສັງຄົມຈີນ ຊຶ່ງກໍບໍ່ເປັນເລື່ອງແປກ ເພາະວ່າ ສປ ຈີນ ແມ່ນໜຶ່ງໃນບັນດາປະເທດຫົວແຖວທີ່ບຸກເບີກ ລະບົບການຄ້າຂາຍໃນຍຸກດີຈີຕອນ ກຳລັງທີ່ຊ່ວຍຂັບເຄື່ອນການຄ້າຂາຍຜ່ານລະບົບອອນລາຍນີ້ ກໍແມ່ນການຖ່າຍທອດສົດເພື່ອໂຄສະນາສິນຄ້າ ກໍຄື ການບໍລິການເພື່ອຮັບປະກັນຄວາມປອດໄພ ໄຮ້ກົນອຸບາຍຕົວະຍົວະຫຼອກລວງໃນການໂຄສະນາດັ່ງກ່າວ ທາງການຈີນ ຈຶ່ງໄດ້ສ້າງຮ່າງກົດໝາຍຄວບຄຸມການຂາຍສິນຄ້າອອນລາຍ ໂດຍຜ່ານວິທີການຖ່າຍທອດສົດ ໃນຕົ້ນເດືອນພະຈິກ 2020 ຮ່າງກົດໝາຍນີ້ ມີຈຸດປະສົງຕົ້ນຕໍຢູ່ 2 ປະການຄື: ໜຶ່ງ: ເພື່ອຍົກມາດຕະຖານຄວາມປອດໄພໃຫ້ຜູ້ບໍລິໂພກທາງອອນລາຍ ແລະ ສອງ: ເພື່ອສ້າງຄວາມເຊື່ອຖືໃຫ້ແກ່ບັນດາຜູ້ປະກອບການ-ການຄ້າທາງອອນລາຍ ດ້ວຍວິທີຖ່າຍທອດສົດໃຫ້ພວກເຂົາເຈົ້າມີຄວາມເປັນອິດສະຫຼະ ໃນການພັດທະນາການຄ້າເອເລັກໂຕຣນິກຊັ້ນນຳນີ້ຫຼາຍຂຶ້ນ ຮ່າງກົດໝາຍໄດ້ກຳນົດຢ່າງຈະແຈ້ງ ໃຫ້ຜູ້ຂາຍສິນຄ້າອອນລາຍຕ້ອງລົງທະບຽນດ້ວຍຊື່ ແລະ ນາມສະກຸນຈິງໃນໂລກອອນລາຍ ພ້ອມກັບເອກະສານຢັ້ງຢືນຄະແນນຄວາມໜ້າເຊື່ອຖື ເພື່ອໃຫ້ມີຄວາມສາມາດກວດສອບໄດ້ ທັງນີ້ກໍເພື່ອບໍ່ໃຫ້ຜູ້ຂາຍສິນຄ້າຕົວະຕົ້ມ ກ່ຽວກັບຄຸນນະພາບຂອງສິນຄ້າ ກໍຄື ການບໍລິການດ້ວຍວິທີປອມແປງຈຳນວນຄວາມນິຍົມຊົມຊອບສິນຄ້າຂອງຕົນຈາກລູກຄ້າ ແລະ ອື່ນໆ ພ້ອມດຽວກັນນັ້ນ ກົດໝາຍຍັງໄດ້ສົ່ງເສີມໃຫ້ຄະແນນຄວາມໜ້າເຊື່ອຖື ຕໍ່ລະບົບການຂາຍສິນຄ້າອອນລາຍ ເປັນປະໂຫຍດຕໍ່ການພັດທະນາລະບົບດັ່ງກ່າວ.