ຈີນກຳລັງເລັ່ງພັດທະນາລະບົບອິນເຕີເນັດໃຫ້ເປິດກວ້າງ ໃຊ້ງານໄດ້ວ່ອງໄວຂຶ້ນ ບໍ່ຈຳກັດຈຳນວນຂອງອຸປະກອນ ແລະ ປິດໂອກາດບໍ່ໃຫ້ຜູ້ໃຊ້ງານປິດບັງຕົວຕົນໄດ້ອີກຕໍ່ໄປ.
ລາຍງານທີ່ອ້າງຂໍ້ມູນຈາກສຳນັກຂ່າວ ຊິນຮວາ ຂອງຈີນ ລະບຸວ່າ ໜ່ວຍງານດ້ານອິນເຕີເນັດຊັ້ນແນວໜ້າຫຼາຍບໍລິສັດຂອງຈີນ ກຳລັງເຝົ້າລໍຄອຍການເປີດຕົວອິນເຕີເນັດໂປຣໂຕຄອລ (Internet Protocol -IP) ໃໝ່ສຳລັບການໃຊ້ງານທົ່ວໂລກທີ່ໃຫຍ່ກວ່າ ແລະ ໄວກວ່າທີ່ມີຢູ່ໃນປັດຈຸບັນ ທັງຍັງປິດໂອກາດທີ່ຜູ້ໃຊ້ງານຈະປົກປິດຕົວຕົນດ້ວຍ.
ເຕັກໂນໂລຊີນີ້ ມີຊື່ເອີ້ນວ່າ IPv6 ເຊິ່ງເປັນໂຄງສ້າງໂລກອິນເຕີເນັດ ທີ່ຈະອະນຸຍາດໃຫ້ອຸປະກອນເອເລັກໂຕຣນິກນັບລ້ານລ້ານຊິ້ນເຂົ້າເຖິງອິນເຕີເນັດ ໂດຍແຕ່ລະອຸປະກອນຈະມີເລກທີ່ຢູ່ໄອພີ ຫຼື IP Address ສະເພາະຕົວດ້ວຍ.
ລະບົບອິນເຕີເນັດທີ່ໃຊ້ໃນປັດຈຸບັນນັ້ນ ຄື IPv4 ຫຼື ເວີຊັ່ນທີ 4 ເຊິ່ງເປິດຕົວມາຕັ້ງແຕ່ໄລຍະປີທີ 1990 ແລະ ມີເລກທີ່ຢູ່ໄອພີພຽງປະມານ 4.300 ລ້ານເລກເທົ່ານັ້ນ ກ່ອນທີ່ຄົນທົ່ວໂລກຈະເຂົ້າເຖິງອິນເຕີເນັດໄດ້ຫຼາຍຂຶ້ນ ຜ່ານອຸປະກອນຄອມພິວເຕີສ່ວນບຸກຄົນ ສະມາດໂຟນ ຄອມພິວເຕີ ແທບເລັດ ແລະ ອຸປະກອນອັດສະລິຍະທັງຫຼາຍທີ່ມີໃຊ້ກັນຢ່າງກວ້າງຂວາງໃນເວລານີ້.
ວິສະວະກອນດ້ານຄອມພິວເຕີ ສະເໜີແຜນພັດທະນາລະບົບອິນເຕີເນັດໃໝ່ມາຕັ້ງແຕ່ເມື່ອປີ 1998 ກ່ອນທີ່ອົງກອນ Internet Engineering Task Force (IETF) ເຊິ່ງຮັບຜິດຊອບການຈັດມາດຕະຖານອິນເຕີເນັດ ຈະເປີດຕົວຂໍ້ກຳນົດໃນການຕິດຕໍ່ສື່ສານລະ ຫວ່າງອຸປະກອນສຳລັບລະບົບ IPv6 ເຊິ່ງເອື້ອໃຫ້ມີການໃຊ້ອຸປະກອນເຊື່ອມຕໍ່ຫຼາຍຂຶ້ນແບບກ້າວກະໂດດ.
ແລະ ເນື່ອງຈາກ IPv6 ຈະບໍ່ມີຂໍ້ຈຳກັດ ເລື່ອງເລກທີ່ຢູ່ໄອພີ ລັດຖະບານຈີນຈຶ່ງພິຈາລະນາທີ່ຈະສ້າງເລກທີ່ຢູ່ສະເພາະ ແລະ ບໍ່ຊ້ຳກັບໃຜໃນໂລກໃຫ້ກັບປະຊາຊົນແຕ່ລະ ຄົນ ປຽບເໝືອນຕົວເລກປະຊາຊົນອອນ ລາຍແລ້ວ.
ທ່ານ ຫວູ ເອີ່ສວນ ປະທານກຸ່ມ Internet Society of China ແລະ ຄອງຕຳແໜ່ງຜູ້ອຳນວຍການໂຄງການ China Next Generation Internet ໃຫ້ຄວາມເຫັນວ່າ ຄວາມສຳເລັດໃນດ້ານນີ້ ຈະເຮັດໃຫ້ຈີນສາມາດລະບຸຕົວຕົນຜູ້ໃຊ້ງານອິນເຕີເນັດໄດ້ງ່າຍຂຶ້ນ ເຊິ່ງເປັນສິ່ງທີ່ນັກວິເຄາະນອກປະເທດຈີນເບິ່ງວ່າ ເປັນຈຸດທີ່ເຮັດໃຫ້ຜູ້ນຳຈີນສົນໃຈການເລັ່ງພັດທະນາລະບົບ ນີ້ຢ່າງສູງ ແລະ ຍົກແຜນງານນີ້ໃຫ້ເປັນເລື່ອງເລັ່ງດ່ວນລະດັບຊາດໄປແລ້ວ.
ໂດຍສະເພາະ ຢ່າງຍິ່ງ ເມື່ອລະບົບໃໝ່ນີ້ຈະເຮັດໃຫ້ການໃຊ້ງານ VPN ຫຼື Virtual Private Network ຫຼື ຊອຟແວຣ໌ທີ່ຖືກສ້າງຂຶ້ນມາເພື່ອປົກປ້ອງຄວາມເປັນສ່ວນ ຕົວ ທີ່ຜູ້ໃຊ້ອິນເຕີເນັດຈຳນວນຫຼາຍໃຊ້ ເພື່ອຫຼົບຫຼີກການເຊັນເຊີ ຫຼື ປິດກັ້ນລະບົບໃນບາງພື້ນທີ່ເກືອບເປັນໄປບໍ່ໄດ້ອີກຕໍ່ໄປ.