ໃນຍຸກທີ່ການໃຊ້ຊີວິດເລັ່ງດ່ວນແບບໃນປັດຈຸບັນນີ້ ເຮັດໃຫ້ຫຼາຍຄົນອາດຈະບໍ່ມີເວລາເຂົ້າຄົວ ລົງມືເຮັດອາຫານຮັບປະທານເອງ ດັ່ງນັ້ນ ອາຫານແຊ່ແຂງຈຶ່ງເປັນຕົວເລືອກທີ່ໄດ້ຮັບຄວາມນິຍົມຫຼາຍຂຶ້ນເລື້ອຍໆ ເນື່ອງຈາກຫາຊື້ງ່າຍ ອີກທັງຍັງສາມາດເກັບຮັກສາໃນຕູ້ເຢັນໄດ້ເປັນເວລາດົນນານ ແຖມສະດວກວ່ອງໄວ ເພາະພຽງແຕ່ຕ້ອງການຮັບປະທານເມື່ອໃດກໍພຽງຢິບອອກ ມາຈາກຕູ້ເຢັນ ແລ້ວນຳໄປອຸ່ນໃນໄມໂຄຣເວຟ ພຽງບໍ່ເທົ່າໃດນາທີກໍສາມາດຮັບປະທານໄດ້ແລ້ວ ແຕ່ຈະວ່າໄປແລ້ວ ເຖິງຈະສະດວກພຽງໃດກໍຕາມ ຫຼາຍຄົນກໍອາດຈະຍັງສົງໄສກັນບໍ່ໜ້ອຍວ່າ ແລ້ວຖ້າຮັບປະທານເລື້ອຍໆລະ ຈະປອດໄພອີ່ຫຼີບໍ ? ແລ້ວຕ້ອງເຮັດຢ່າງໃດຈຶ່ງປອດໄພລະ ? ມາຫາຄຳຕອບກັນ.
ອາຫານແຊ່ແຂງ ຖືໄດ້ວ່າເປັນການຖະໜອມອາຫານຢ່າງໜຶ່ງ ໂດຍການນຳຜະລິດຕະພັນອາຫານທີ່ຜ່ານຂະບວນການການແປຮູບດ້ວຍການໃຫ້ຄວາມເຢັນລະດັບເຢືອກແຂງ ເພື່ອໃຫ້ຄົງຄວາມສົດ ແລະ ຮັກສາຄຸນະພາບຂອງອາຫານໃຫ້ເກັບໄດ້ຍາວນານຫຼາຍຍິ່ງຂຶ້ນ ຊຶ່ງຈະມີທັງອາຫານແຊ່ແຂງສຳເລັດຮູບທີ່ສາມາດນຳມາອຸ່ນດ້ວຍໄມໂຄຣເວຟກິນໄດ້ເລີຍ ແລະ ອາຫານຊະນິດອື່ນທີ່ບໍ່ແມ່ນອາຫານແຊ່ແຂງສຳເລັດຮູບ ເຊັ່ນ: ຊີ້ນສັດແຊ່ແຂງ ຜັກແຊ່ແຂງ ແລະ ໝາກໄມ້ແຊ່ແຂງ ເປັນຕົ້ນ.
ອາຫານແຊ່ແຂງເກັບຮັກສາໄດ້ຍາວນານພຽງໃດ ອາຫານແຊ່ແຂງສຳເລັດຮູບແຕ່ລະຊະນິດ ມີໄລຍະເວລາໃນການເກັບຮັກສາທີ່ແຕກຕ່າງກັນ ດັ່ງນັ້ນ ກ່ອນຊື້ ຫຼື ຮັບປະທານຄວນເບິ່ງວັນໝົດອາຍຸກ່ອນທຸກຄັ້ງ.
ໄລຍະເວລາການເກັບອາຫານແຊ່ແຂງ ຍົກຕົວຢ່າງເຊັ່ນ:
– ອາຫານສຳເລັດຮູບແຊ່ແຂງ ເກັບໄດ້ 3-4 ເດືອນ.
– ຊີ້ນໝູອົບ ແຮມ ແລະ ໄສ້ກອກ ເກັບໄດ້ 1-2 ເດືອນ.
– ຊຸບ ແລະ ອາຫານທີ່ຜ່ານການຂ້ຽວ ເກັບໄດ້ 2-3 ເດືອນ.
– ຊີ້ນໝູ ຫຼືຊີ້ນງົວທີ່ສຸກແລ້ວ ເກັບໄດ້ 2-3 ເດືອນ.
– ຊີ້ນເປັດໄກ່ທີ່ສຸກແລ້ວ ເກັບໄດ້ 4 ເດືອນ.
– ໄຂ່ຂາວ ເກັບໄດ້ 12 ເດືອນ.
ຄວາມປອດໄພຂອງອາຫານແຊ່ແຂງ ອາຫານແຊ່ແຂງທີ່ຖືກເກັບຮັກສາທີ່ອຸນຫະພູມ 0 ອົງສາ ແຊນຢ່າງຕໍ່ເນື່ອງ ຈະມີຄວາມປອດໄພຈາກເຊື້ອໂຣກ ເນື່ອງຈາກການແຊ່ແຂງຈະຊ່ວຍຊະລໍການເຄື່ອນໄຫວຂອງໂມລະກຸນ ເຮັດໃຫ້ຈຸລິນຊີພາຍໃນອາຫານຢຸດຈະເລີນເຕີບໂຕຊົ່ວຄາວ ແຕ່ກໍບໍ່ໄດ້ເຮັດໃຫ້ຕາຍ ເພາະເມື່ອອາຫານລະລາຍ ຈຸລິນຊີເຫຼົ່ານີ້ອາດຈະກັບມາເຄື່ອນໄຫວ ແລະ ເພີ່ມຈຳນວນຫຼາຍຂຶ້ນໄດ້ໃນບາງສະພາວະ.
ນອກຈາກນີ້ ໂດຍສ່ວນໃຫຍ່ແລ້ວນັ້ນ ອາຫານກ່ອງແຊ່ແຂງສຳເລັດຮູບ ມັກຈະມາພ້ອມກັບພາຊະນະທີ່ເປັນ ກ່ອງປຼັສຕິກທີ່ປິດມິດຊິດ ດ້ານໃນມີອາຫານທີ່ຖືກແຊ່ເຢັນຈົນແຂງ ເມື່ອຈະຮັບປະທານ ຕ້ອງເຈາະຮູນ້ອຍກ່ອນຈະນຳເຂົ້າໄມໂຄຣເວຟ ແຕ່ຖ້າເປັນອາຫານສຳເລັດຮູບແຊ່ແຂງຊະນິດອື່ນໆທີ່ບໍ່ໄດ້ມາພ້ອມກັບກ່ອງ ເວລາຈະອຸ່ນດ້ວຍໄມໂຄຣເວຟ ບາງຄົນອາດຈະນຳໄປໃສ່ພາຊະນະທີ່ເປັນແກ້ວ ເຊຣາມິກ ປຼັສຕິກ ເມລາມີນ ຫຼື ຖົງປຼັສຕິກແລ້ວຈຶ່ງນຳໄປອຸ່ນໃນໄມໂຄຣເວຟ ຊຶ່ງຖ້າຫາກເປັນຈອກ ຫຼື ເຊຣາມິກທີ່ບໍ່ໄດ້ຖືກເຄືອບດ້ວຍສີສັນຕ່າງໆກໍຈະປອດໄພ ສາມາດນຳເຂົ້າໄມໂຄຣເວຟເພື່ອເຮັດການອຸ່ນໄດ້ເລີຍ ແຕ່ຖ້າຫາກວ່າພາຊະນະຈອກ ຫຼື ເຊຣາມິກນັ້ນມີການເຄືອບສີ ຫຼື ແຕ້ມລວດລາຍ ກໍຈະບໍ່ ເໝາະທີ່ຈະນຳມາໃສ່ອາຫານ ເພາະສີ ຫຼືລວດລາຍ ເມື່ອຖືກຄວາມຮ້ອນຂອງອາຫານຂະນະຢູ່ໃນໄມໂຄຣເວຟ ຈະລະລາຍ ແລະ ປົນເປື້ອນໃນອາຫານໄດ້ ແລະ ເມື່ອກິນອາຫານທີ່ມີສານປົນເປື້ອນເຂົ້າໄປ ກໍຈະເກີດການສະສົມໃນຮ່າງກາຍ ເຮັດໃຫ້ ສ່ຽງຕໍ່ການເກີດໂລກຕ່າງໆຕາມມາ ເພາະຄວາມຮ້ອນຈະເຮັດໃຫ້ປຼັສຕິກເກີດການລະລາຍ ແລະ ສານພິດຈາກປຼັສຕິກຈະປົນເປື້ອນອາຫານທີ່ອຸ່ນເອົາໄວ້ ເມື່ອກິນສານພິດເຫຼົ່ານີ້ຫຼາຍໆ ຈະເກີດການສະສົມ ເຮັດໃຫ້ສ່ຽງຕໍ່ການເກີດມະ ເຮັງໃນສ່ວນຕ່າງໆຂອງຮ່າງກາຍໄດ້ ດັ່ງນັ້ນ ເວລາຈະລະລາຍອາຫານແຊ່ແຂງສຳເລັດຮູບ ດ້ວຍໄມໂຄຣເວຟ ຄວນເລືອກພາຊະນະທີ່ສາມາດນຳໄປເຂົ້າໄມໂຄຣເວຟໃຫ້ດີໆ ເຊັ່ນ: ສັງເກດສັນຍະລັກຮູບໄມໂຄຣເວຟ ແລະ ຄຳວ່າ Microwave Safe, Oven Safe, Dishwasher Safe ເປັນຕົ້ນ ເພື່ອຈະຫຼຸດການສ່ຽງອັນຕະລາຍດັ່ງກ່າວ.
ວິທີເກັບຮັກສາອາຫານແຊ່ແຂງທີ່ດີ
– ເມື່ອຊື້ອາຫານແຊ່ແຂງສຳເລັດຮູບມາແລ້ວ ໃຫ້ຮີບໃສ່ຊ່ອງຟຣີຊໃຫ້ໄວທີ່ສຸດ.
– ບໍ່ຄວນນຳອາຫານມາຕັ້ງຖິ້ມໃຫ້ລະລາຍ ແລ້ວນຳກັບເຂົ້າແຊ່ແຂງອີກ ໂດຍສະເພາະ ອາຫານແຊ່ແຂງທີ່ເຮັດໃຫ້ສຸກແລ້ວ ຈະຕ້ອງບໍ່ຢູ່ນອກຕູ້ເຢັນນານກວ່າ 1 ຊົ່ວໂມງ ແລ້ວນຳກັບໄປແຊ່ແຂງອີກ ເພາະຈະເຮັດໃຫ້ອາຫານນັ້ນເສຍຄຸນ ນະພາບໄດ້.
– ສ່ວນອາຫານແຊ່ແຂງທີ່ຍັງບໍ່ຜ່ານການເຮັດ ໃຫ້ສຸກ ສາມາດລະລາຍແລ້ວນຳກັບໄປແຊ່ອີກຄັ້ງໄດ້ ແຕ່ອາດຈະເຮັດໃຫ້ມີຄຸນະພາບຫຼຸດລົງໄປເລັກນ້ອຍ.
– ອາຫານແຊ່ແຂງທີ່ບໍ່ແມ່ນອາຫານແຊ່ແຂງສຳເລັດຮູບ ຫາກຈະນຳມາເຮັດອາຫານຮັບປະທານ ຄວນລ້າງນ້ຳໃຫ້ສະອາດກ່ອນທຸກຄັ້ງ ເພາະຊ່ວຍຫຼຸດສານເຄມີທີ່ຢູ່ກັບອາຫານໄດ້ ຊຶ່ງຈະໄດ້ນຳມາຮັບປະທານໄດ້ຢ່າງປອດໄພ.
– ພະຍາຍາມຮັບປະທານອາຫານທີ່ແຊ່ແຂງໄວ້ໃຫ້ໝົດພາຍໃນ 2-3 ເດືອນ ຈະດີທີ່ສຸດ.