ໃນຍຸກຂອງຄວາມເປັນສ່ວນຕົວຫຼາຍ ກວ່າທີ່ຈະຂຶ້ນກັບພໍ່ແມ່ຜູ້ປົກຄອງ ຊາຍໜຸ່ມ ຍິງໜຸ່ມຈຳນວນໜຶ່ງ ກໍເດີນຕາມຮ່ອງຮອຍຂອງສັງຄົມທີ່ແຕກຕ່າງທາງດ້ານວັດທະນະທຳ ແລະ ຮີດຄອງປະເພນີ ເມື່ອກ່ອນບໍ່ມີທີ່ແມ່ຍິງຕ້ອງເຂົ້າຫ້ອງນອນຂອງຜູ້ຊາຍ ແລະ ຜູ້ຊາຍກໍບໍ່ອາດຈະລ່ວງລ້ຳເຂົ້າໃນຫ້ອງນອນຂອງແມ່ຍິງ ເພາະກົດຂອງຮີດຄອງຖືວ່າເປັນເລື່ອງທີ່ບໍ່ຈົບບໍ່ງາມ ຍິ່ງໄປກວ່ານັ້ນ ການທີ່ຍິງຊາຍຈະນອນຮ່ວມຫ້ອງດຽວກັນກໍຍິ່ງເປັນໄປບໍ່ໄດ້ ມາໃນຍຸກຍິງສາວ ບ່າວແພວຈຳນວນໜຶ່ງຖືການຢູ່ຮ່ວມກັນ ຢູ່ຫ້ອງນອນດຽວກັນ ແລະ ນອນຮ່ວມກັນ ມັນແມ່ນສິດທີ່ບໍ່ມີໃຜຈະສາມາດຫ້າມປາມເຂົາເຈົ້າໄດ້ ມີບາງຄູ່ກໍຢູ່ກັນແບບຄູ່ຜົວຕົວເມຍ ເພາະເຂົາເຈົ້າຖືວ່ານັ້ນແມ່ນສິດທິສ່ວນບຸກຄົນ ແຕ່ເລື່ອງເຫຼົ່ານັ້ນກັບກາຍເປັນການສ້າງບັນຫາ ຄືການຖືພາຄາທ້ອງ ທີ່ທັງສອງຄົນຍັງບໍ່ທັນພ້ອມທີ່ຈະໃຫ້ມີພະຍານຮັກ ກໍຄື ລູກ ໃນເມື່ອບໍ່ມີຄວາມພ້ອມ ກໍຕ້ອງທຳການຫຼຸລູກອອກດ້ວຍວິທີການຕ່າງໆ ເຊັ່ນ: ອາດຈະກິນຢາ ອາດຈະໄປໃຫ້ຄຼີນິກເອົາອອກໃຫ້ ຫຼື ໃຫ້ຜູ້ອື່ນຊ່ວຍເອົາອອກໃຫ້ ຊຶ່ງເປັນການກະທຳຜິດຕາມທີ່ປະມວນກົດໝາຍອາຍາໄດ້ກຳນົດໄວ້ຄື: ບຸກຄົນໃດ ຫາກໄດ້ທຳການຫຼຸລູກໃຫ້ຜູ້ອື່ນຢ່າງຜິດກົດໝາຍ ຈະຖືກລົງໂທດຕັດອິດສະລະພາບແຕ່ 1 ປີ ຫາ 3 ປີ ແລະ ຈະຖືກປັບໃໝແຕ່ 5.000.000 ກີບຫາ 15.000.000 ກີບ.
ໃນກໍລະນີທີ່ຜູ້ກະທຳຜິດ ຫາກໄດ້ທຳການຫຼຸລູກໃຫ້ຜູ້ອື່ນເປັນອາຈິນ ຫຼື ໃນກໍລະນີທີ່ການຫຼຸລູກໂດຍບໍ່ຖືກຕ້ອງຕາມກົດໝາຍນັ້ນ ຫາກເຮັດໃຫ້ສຸຂະພາບຂອງແມ່ຊຸດໂຊມ ຫຼື ເຮັດໃຫ້ແມ່ເສຍຊີວິດ ຈະຖືກລົງໂທດຕັດອິດສະຫຼະພາບແຕ່ 5 ປີ ຫາ 7 ປີ ແລະ ຈະຖືກປັບໃໝແຕ່ 7 ລ້ານກີບ ຫາ 20.000.000 ກີບ.
ຜູ້ຍິງໃດ ຫາກໄດ້ທຳການຫຼຸລູກດ້ວຍຕົນເອງ ຫຼື ໃຊ້ຜູ້ອື່ນເຮັດໃຫ້ ໂດຍບໍ່ຖືກຕ້ອງຕາມກົດໝາຍ ຈະຖືກລົງໂທດຕັດອິດສະຫຼະພາບແຕ່ 3 ເດືອນ ຫາ 1 ປີ ແລະ ຈະຖືກປັບໃໝແຕ່ 3 ລ້ານກີບ ຫາ 10.000.000 ກີບ ຄວາມພະຍາຍາມກໍ່ການກະທຳຜິດກໍຈະຖືກລົງໂທດ.
ໂດຍ: ໄມ້ງັດ