ຄວາມຈິງ ຜູ້ຂຽນຢາກເວົ້າແມ່ນການປ້ອງກັນໄພ ການແຜ່ລະບາດຂອງພະຍາດໂຄວິດ-19 ເຊິ່ງຖ້າວ່າເຮົາຂາດສະຕິຖືເບົາ ບາງທີຊີວິດເຮົາກໍບໍ່ໂຊກດີສະເໝີໄປ ສາມາດຕິດຕໍ່ພະຍາດຈາກບຸກຄົນອື່ນໄດ້ຫຼາຍຮູບແບບເຊັ່ນ: ຈາກໝູ່ເພື່ອນ ຫຼື ຈາກຄົນທີ່ບໍ່ຮູ້ຈັກເພາະພະຍາດນີ້ ຜູ້ເປັນເລີ່ມຕົ້ນ ບາງຄົນຍັງບໍ່ຮູ້ສຶກໂຕວ່າໂຕເອງຕິດ ດັ່ງນັ້ນ ເລື່ອງການມີສະຕິຊ່ວຍກັນປ້ອງກັນເອົາໃຈໃສ່ ຕັກເຕືອນລູກຫຼານໃນຄອບຄົວໃຫ້ມີສະຕິສູງ ກໍຖືໄດ້ວ່າຊ່ວຍກັນປ້ອງກັນທົ່ວສັງຄົມ.
ລັດຖະບານ ໂດຍທ່ານນາຍົກລັດຖະມົນຕີ ໄດ້ຖະແຫຼງຂ່າວຄັ້ງລ້າສຸດ ໃນເດືອນທັນວາ 2020 ໂດຍໄດ້ຮຽກຮ້ອງໃຫ້ປະຊາຊົນຊ່ວຍກັນມີສະຕິໃນການໃຊ້ຊີວິດ ຫຼື ທ່ອງທ່ຽວໄປມາຕາມສະຖານທີ່ຕ່າງໆ ຕ້ອງໄດ້ໃຊ້ຜ້າອັດປາກ ອັດດັງ ໃນເວລາເຂົ້າຊຸມຊົນ ແລະ ການອອກຈາກເຮືອນໄປມາຢ່າງເຄັ່ງຄັດ ຮຽກຮ້ອງໃຫ້ປະຊາຊົນທຸກຄົນປະຕິບັດໄລຍະຫ່າງ ບໍ່ສຳຜັດມືໃນເວລາພົບກັນ ໃຫ້ໃຊ້ການຍົກມືນົບທັກທາຍຕາມປະເພນີລາວ… ເລື່ອງການມີສະຕິຕັກເຕືອນບອກລູກຫຼານໃຫ້ຊ່ວຍກັນ ເຄັ່ງຄັດປະຕິບັດໄລຍະຫ່າງນີ້ສຳຄັນຫຼາຍ ເຊິ່ງກວມເຖິງຫ້ອງການ ສຳນັກງານ ໂດຍສະເພາະ ໂຮງຮຽນ ຍິ່ງຕ້ອງມີສະຕິເອົາໃຈໃສ່ ທັງໄພຂອງພະຍາດ ແລະ ຂີ້ຝຸ່ນຕາມເດີ່ນໂຮງຮຽນ ເພື່ອຮັກສາສຸຂະພາບເຍົາວະຊົນ ບໍ່ແມ່ນຍາມເລີກຫຼິ້ນແລ້ວຂີ້ຝຸ່ນໄງ່ກຸ້ມເຂົ້າດັງນັກຮຽນແລ້ວ ຜູ້ອຳນວຍການ ຫຼື ຜູ້ບໍລິຫານການສຶກສາເຮັດເອົາຫູໄປນາເອົາຕາໄປໄຮ່ເສີຍ.
ນະໂຍບາຍລັດຖະບານ ຍັງກວມລວມເຖິງການຈັດງານສັງສັນ ງານດອງ ຫຼື ບຸນປີໃໝ່ສາກົນ ກໍຄວນມີສະຕິຊ່ວຍກັນວ່າ ເຮົາເລືອກປະຕິບັດແນວເໝາະສົມ ເຊັ່ນ: ບາງບໍລິສັດມີຕ່າງປະເທດຫຼາຍ ເຂົາກໍຈັດສະຫຼອງກັນຕາມຄວາມເໝາະສົມ ແຕ່ສຳລັບລາວເຮົາ ເຮັດເອີກກະເຫຼີກເຮຮາ ພາເພີນ ຈົນຂາດຈິດສຳນຶກວ່າອັນໃດເໝາະສົມ ຫຼື ຈະເລືອກຈັດແບບໃດໃຫ້ມັນເໝາະສົມ ເຊິ່ງເປັນສິ່ງທີ່ໜ້າຄິດ ສຳຄັນແມ່ນບໍ່ຫຼົງເຫີ່ຈົນຂາດສະຕິ ບໍ່ແມ່ນຈະອີງໃສ່ກຳລັງເສດຖະກິດເປັນໂຕຕັດສິນຢ່າງດຽວນໍ ! ແຕ່ຄວນຄຳນຶງເຖິງສ່ວນລວມຂອງຊາດ.
ລັດຖະບານຍັງແນະນຳໃຫ້ສະຫຼອງປີໃໝ່ຢູ່ກັບເຮືອນ ຖືວ່າເປັນຂໍ້ແນະນຳທີ່ປະຊາຊົນລາວຄວນປະຕິບັດ ເຊັ່ນ: ການຢາກສູດມົນຂ້າມປີ ທີ່ເຫີ່ເຮັດຕາມປະເທດໃກ້ຄຽງ ທັງໆທີ່ຫຼາຍສິບປີຜ່ານມາບໍ່ເຄີຍເຮັດ ບໍ່ມີປະເພນີເຮັດ ກໍຄວນຢັບຢັ້ງຊັ່ງໃຈ ເຮົາສາມາດພາລູກຫຼານໄຫວ້ພະສູດມົນໄດ້ ຄົນລາວຊາວພຸດໃນເຮືອນມີຫ້ອງໄຫວ້ພະຍິ່ງເປັນການດີ ບໍ່ແມ່ນຍາມໃດກໍຈະຫຼົງແຕ່ເຫີ່ອວດກັນ ຈັດແຕ່ພຽງຮູບແບບພິທີກຳ ແຕ່ບໍ່ໄດ້ເນື້ອໃນແກ່ນສານ.
ໂດຍ: ດັ້ນກີບເມກ