ແຕ່ເດືອນກັນຍາຫາເດືອນພະຈິກ ປີ 2020 ນີ້ ທາງການ ສປ ຈີນ ໄດ້ຮັບຮອງ ແລະ ປະກາດໃຊ້ກົດໝາຍໃໝ່ໆຫຼາຍສະບັບ ແຕ່ໃນບົດປະຈຳວັນນີ້ ຜູ້ຂຽນຂໍສະເໜີພຽງ 3 ສະບັບ ຄື: ກົດໝາຍກ່ຽວກັບການລາພັກປະຈຳປີຂອງລູກຈ້າງ ກົດໝາຍເຂດການຄ້າເສລີ ແລະ ກົດໝາຍຄວບຄຸມການຂົນສົ່ງສິນຄ້າເຕັກໂນໂລຊີ ຊຶ່ງມີລາຍລະອຽດດັ່ງລຸ່ມນີ້:
ກົດໝາຍວ່າດ້ວຍການລາພັກຂອງລູກຈ້າງ: ຂ່າວໃນວັນທີ 12 ເດືອນພະຈິກ 2020 ໃຫ້ຮູ້ວ່າ: ນະຄອນເຊິນເຈິນ ທີ່ມົນທົນກວາງຕຸງ ໄດ້ອອກກົດໝາຍວ່າດ້ວຍການລາພັກປະຈຳປີຂອງລູກຈ້າງ ໂດຍບໍ່ມີການຕັດຄ່າແຮງງານ ຄະນະກຳມະການຄຸ້ມຄອງແຮງງານຂອງນະຄອນ ເຊິນເຈິນ ໄດ້ໃຫ້ລາຍລະອຽດກ່ຽວກັບກົດໝາຍສະບັບນີ້ວ່າ ນັບແຕ່ປີ 2021 ເປັນຕົ້ນໄປ ບັນດານາຍຈ້າງຕ້ອງປະຕິບັດຢ່າງເຄັ່ງຄັດ ກ່ຽວກັບການລາພັກຂອງລູກຈ້າງໂດຍບໍ່ມີການຕັດຄ່າແຮງງານ ຈຸດປະສົງຕົ້ນຕໍຂອງກົດໝາຍ ແມ່ນເພື່ອຫຼຸດຜ່ອນຄວາມສ່ຽງຈາກສະພາບບົກແຫ້ງຂອງແຮງງານ ຍ້ອນຜູ້ໃຊ້ແຮງງານເຮັດວຽກໜັກເກີນໄປ ເວົ້າອີກຈັ່ງໜຶ່ງ ກໍແມ່ນວ່າຖ້າຢາກໃຊ້ແຮງງານຢ່າງຍາວນານ ກໍຕ້ອງໃຫ້ລູກຈ້າງໄດ້ມີໂອກາດພັກຜ່ອນ ພ້ອມດ້ວຍນະໂຍບາຍບໍ່ຕັດຄ່າແຮງງານ ໃນໄລຍະຜ່ານມາ ຂໍ້ບັງຄັບກ່ຽວກັບການເຮັດວຽກຂອງແຕ່ລະບໍລິສັດໃນຈີນນັ້ນ ມີຄວາມແຕກຕ່າງກັນ ໂດຍສະເລ່ຍແລ້ວ ລູກຈ້າງສາມາດລາພັກ ແລະ ໄດ້ຮັບຄ່າຈ້າງຢ່າງໜ້ອຍ 5 ວັນຂອງຈຳນວນວັນທີ່ພັກ ພາຍຫຼັງເຮັດວຽກມາເປັນເວລາ 1 ປີ ສິດດັ່ງກ່າວໄດ້ກຳນົດຢູ່ໃນກົດໝາຍແຮງງານຈີນ ແຕ່ການບັງຄັບໃຊ້ນັ້ນຜັດຍັງບໍ່ເຂັ້ມງວດ ກົດໝາຍວ່າດ້ວຍການລາພັກ ໂດຍບໍ່ຖືກຕັດຄ່າແຮງງານຂອງລູກຈ້າງຢູ່ນະຄອນຫຼວງເຊິນເຈິນນີ້ ມີເປົ້າໝາຍໃຫ້ກາຍເປັນຕົວຢ່າງສຳລັບນະຄອນ ກໍຄື ຕົວເມືອງອື່ນໆໃນທົ່ວປະເທດຈີນ.
ກົດໝາຍເຂດການຄ້າເສລີ: ຂ່າວຈາກ ສປ ຈີນ ໃນວັນທີ 2 ກັນຍາປີນີ້ ໃຫ້ຮູ້ວ່າ: ກົດໝາຍເຂດການຄ້າເສລີ ສະບັບທຳອິດຂອງຈີນ ໄດ້ມີຜົນບັງຄັບໃຊ້ໃນວັນທີ 1 ກັນຍາ 2020 ກົດໝາຍໄດ້ກຳນົດຂໍ້ບັງຄັບ ວ່າດ້ວຍເຂດທົດລອງການຄ້າເສລີ ເສີໂຄຊຽນໄຫ່ ໃນເຂດເສດຖະກິດພິເສດ ເຊິນເຈິນ ແລະ ຂໍ້ບັງຄັບວ່າດ້ວຍການບໍລິການດ້ວຍລະບົບສະໄໝໃໝ່ ໃນທ່າເຮືອນຳເລິກຊຽນໄຫ່ ຂອງເຂດເສດຖະກິດພິເສດເຊິນເຈິນ ເຊັ່ນດຽວກັນ ເຂດການຄ້າເສລີ ເສີໂຄຊຽນໄຫ່ ຈະເປີດໄຟຂຽວໃຫ້ນັກລົງທຶນຕ່າງປະເທດເຂົ້າມາລົງທຶນໄດ້ຢ່າງເສລີ ຍົກເວັ້ນໃນບາງພື້ນທີ່ໂດຍປະຕິບັດຕາມຮູບແບບທີ່ບໍ່ມີການແຊກແຊງ ຖ້າຫາກບໍ່ມີການລະເມີດກົດໝາຍ ນີ້ຖືວ່າເປັນການຍົກເລີກຂໍ້ກຳນົດທີ່ບໍ່ຈຳເປັນຂອງການລົງທຶນຕ່າງປະເທດໃນຈີນ ກົດໝາຍສະບັບນີ້ ຍັງມີຂໍ້ບັງຄັບວ່າດ້ວຍການປັບປຸງຂໍ້ກຳນົດກ່ຽວກັບການຂຶ້ນທະບຽນນິຕິບຸກຄົນ ຊຶ່ງອະນຸຍາດໃຫ້ຜູ້ປະກອບທຸລະກິດໃນຮົງກົງ ແລະ ມາເກົ້າ ຂຶ້ນທະບຽນໃນເຂດການຄ້າເສລີ ເພື່ອດຳເນີນທຸລະກິດທີ່ກ່ຽວຂ້ອງໄດ້.
ກົດໝາຍຄວບຄຸມການຂົນສົ່ງສິນຄ້າເຕັກໂນໂລຊີ: ຂ່າວຕ່າງປະເທດໃຫ້ຮູ້ໃນວັນທີ 19 ຕຸລາ 2020 ວ່າ ຄະນະປະຈຳຂອງສະພາປະຊາຊົນແຫ່ງຊາດຈີນ ໄດ້ຮັບຮອງເອົາກົດໝາຍວ່າດ້ວຍການຄວບຄຸມການຂົນສົ່ງສິນຄ້າເຕັກໂນໂລຊີ ໄດ້ເລີ່ມມີຜົນສັກສິດນັບແຕ່ວັນທີ 1 ທັນວາ 2020 ເປັນຕົ້ນໄປ ກົດໝາຍສະບັບນີ້ ມີຈຸດປະສົງເພື່ອຄຸ້ມຄອງຄວາມໝັ້ນຄົງຂອງຊາດ ໂດຍໄດ້ລະບຸແຈ້ງວ່າ ລັດຖະບານຈີນ ມີອຳນາດໃນການຕອບໂຕ້ກັບປະເທດ ລັດ ແລະ ດິນແດນແຫ່ງໃດກໍຕາມ ທີ່ລະເມີດກົດໝາຍຂົນສົ່ງ ແລະ ມີພຶດຕິກຳຂົ່ມຂູ່ຄຸກຄາມຄວາມໝັ້ນຄົງ ຕະຫຼອດຮອດຜົນປະໂຫຍດຂອງ ສປ ຈີນ ທີ່ຕິດພັນກັບການສົ່ງອອກສິນຄ້າອ່ອນໄຫວ ຊຶ່ງກ່ຽວຂ້ອງກັບເຕັກໂນໂລຊີ.