ໃນອະນາຄົດ ແພດອາດວິນິດໄສຫາໂລກອັລໄຊເມີໄດ້ງ່າຍຂຶ້ນ ໂດຍສຳນັກຂ່າວຕ່າງປະເທດລາຍງານວ່າ ຜົນການສຶກສາຊິ້ນໃໝ່ຫຼາຍສະບັບ ທີ່ນຳສະເໜີໃນກອງປະຊຸມສະມາຄົມອັລໄຊເມີນານາຊາດ ເມື່ອມໍ່ໆມານີ້ ລະບຸວ່າ ການກວດເລືອດອາດຊ່ວຍແຍກຜູ້ເປັນອັລໄຊເມີອອກຈາກຜູ້ທີ່ບໍ່ໄດ້ເປັນໄດ້.
ເຖິງແມ່ນບໍລິສັດຕ່າງໆຈະພັດທະນາການກວດເລືອດ ເພື່ອຫາໂປຣຕີນທີ່ທຳລາຍສະໝອງຂອງຜູ້ເປັນອັລໄຊເມີມາຢ່າງຕໍ່ເນື່ອງ ແຕ່ທີ່ຜ່ານມາກໍຍັງມີຂໍ້ຂັດແຍ່ງເຖິງຄວາມຖືກຕ້ອງຂອງວິທີດັ່ງກ່າວ ຢ່າງໃດກໍຕາມ ງານວິໄຈຊິ້ນໃໝ່ລະບຸວ່າ ຂະນະນີ້ການກວດເລືອດສາມາດລະບຸຜົນໄດ້ແມ່ນຢຳເຖິງ 89-98% ແລ້ວ.
ຜົນການສຶກສາດັ່ງກ່າວ ມີທັງການສຶກສາ ໂດຍ ດຣ. ອອສກາ ແຮນສັນ ຈາກມະຫາວິທະຍາໄລລຸນໃນຊູແອັດ ໃນກຸ່ມທົດລອງກວ່າ 1.400 ຄົນ ໃນປະເທດຊູແອັດ ລັດແອຣິໂຊນາໃນສະຫະລັດ ແລະ ປະເທດໂກໂລມບີ ໂດຍມີທັງຜູ້ທີ່ບໍ່ໄດ້ເປັນຜູ້ທີ່ມີອາການບໍ່ຫຼາຍ ຜູ້ເປັນໂລກອັລໄຊເມີ ແລະ ຜູ້ເປັນໂລກປະສາດອື່ນໆ.
ຜົນການກວດເລືອດພົບວ່າ ຜູ້ປ່ວຍດ້ວຍໂລກອັລໄຊເມີ ທັງທີ່ມີອາການຊັດເຈນ ແລະ ບໍ່ຮຸນແຮງ ມີໂປຣຕີນຊື່ p-tau217 ເຊິ່ງເປັນໂປຣຕີນທີ່ທຳລາຍສະໝອງຂອງຜູ້ປ່ວຍໃນເລືອດ ຫຼາຍກວ່າຜູ້ທີ່ບໍ່ໄດ້ເປັນ ເຊິ່ງການກວດຫາໂປຣຕີນ p-tau217 ນີ້ເອງ ທີ່ເຮັດໃຫ້ຜົນການກວດແມ່ນຢຳຂຶ້ນກວ່າ ການທົດລອງກວດເລືອດກ່ອນໜ້ານີ້ ທີ່ກວດຫາໂປຣຕີນອີກຕົວຊື່ amyloid ທີ່ຜິດປົກກະຕິ.
ການວິໄຈຂອງທ່ານ ດຣ. ອອສກາ ແຮນສັນ ໃນລັດແອຣິໂຊນາ ຍັງສຶກສາຕົວຢ່າງ 81 ຄົນ ທີ່ບໍລິຈາກສະໝອງໃຫ້ ຫຼັງພວກເຂົາເສຍຊີວິດ ໂດຍຜົນການກວດເລືອດຂອງພວກເຂົາໃນຂະນະທີ່ຍັງມີຊີວິດຢູ່ ມີຜົນອອກມາໃກ້ຄຽງກັບຜົນການກວດສະໝອງ ນອກຈາກນີ້ ການວິໄຈໃນໂກໂລມບີ ຍັງພົບວ່າ ຜູ້ທີ່ມີທ່າອ່ຽງເປັນອັລໄຊເມີໄດ້ຕັ້ງແຕ່ອາຍຸຍັງນ້ອຍ ຈະເລີ່ມມີລະດັບ p-tau217 ໃນເລືອດສູງຂຶ້ນເຖິງ 20 ປີກ່ອນທີ່ຈະສະແດງອາການ.
ນອກຈາກນີ້ ນັກວິໄຈອີກກຸ່ມຈາກມະຫາວິທະຍາໄລກາລິຟໍເນຍ ຊານຟຣານຊິສໂກ ຍັງພົບດ້ວຍວ່າ p-tau217 ຊ່ວຍແຍກຜູ້ເປັນໂລກອັລໄຊເມີ ອອກຈາກຜູ້ເປັນໂລກສະໝອງສ່ວນໜ້າເສື່ອມໄດ້ ໂດຍຜົນການກວດເລືອດ ມີຄວາມແມ່ນຢຳເຖິງ 96% ໃນກຸ່ມທົດລອງ 617 ຄົນ ເຊັ່ນດຽວກັບນັກວິໄຈຈາກມະຫາວິທະຍາໄລວໍຊິງຕັນ ໃນເມືອງເຊນຫຼຸຍສ໌ ລັດມິສຊູຣີ ທີ່ພົບວ່າໂປຣຕີນ p-tau217 ສາມາດບົ່ງຊີ້ໄດ້ວ່າຜູ້ເປັນມີຄາບໂປຣຕີນໃນສະໝອງ ເຊິ່ງເປັນສັນຍານບົ່ງບອກໂຣກອັລໄຊເມີ.
ຢ່າງໃດກໍຕາມ ທ່ານ ດຣ. ອີໄລເຊີ ມາສເລຍ ຫົວໜ້າພະແນກປະສາດວິທະຍາຂອງ National Institute on Aging ຂອງສະຫະລັດ ເຫັນວ່າ ເຖິງແມ່ນຜົນການກວດເລືອດຈະເບິ່ງແລ້ວແມ່ນຢຳຂຶ້ນ ແຕ່ກໍຍັງຄົງຕ້ອງມີການກວດຄວາມຖືກຕ້ອງເພີ່ມເຕີມ ເຊັ່ນ ຈະຕ້ອງກວດໃນກຸ່ມທົດລອງທີ່ໃຫຍ່ ແລະ ຫຼາກຫຼາຍຂຶ້ນ.
ການກວດຫາໂລກອັລໄຊເມີໃນປັດຈຸບັນ ມີທັງການທົດສອບທັກສະການຄິດ ແລະ ຄວາມຈຳ ເຊິ່ງເປັນວິທີທີ່ບໍ່ແມ່ນຢຳປານໃດ ແລະ ການກວດນ້ຳໄຂສັນຫຼັງ ແລະ ການສະແກນສະໝອງ ເຊິ່ງມີຄ່າໃຊ້ຈ່າຍສູງ ດັ່ງນັ້ນ ຫາກແພດປະຈຳເຮືອນສາມາດກວດຫາໂລກອັລໄຊເມີຈາກການກວດເລືອດໄດ້ ຈະເຮັດໃຫ້ການກວດຫາໂລກດັ່ງກ່າວງ່າຍຂຶ້ນຫຼາຍ ໂດຍນັກວິໄຈຫວັງວ່າຫາກຜົນການທົດລອງນີ້ໄດ້ຮັບການຢືນຢັນ ຄົງຈະສາມາດພັດທະນາການກວດເລືອດໃຫ້ໃຊ້ໄດ້ຈິງພາຍໃນສອງປີ.