ເລື່ອງທັງໝົດທີ່ສັນຫາມາເລົ່າໃນບົດນີ້ ລ້ວນແຕ່ພົວພັນກັບການໃຊ້ລົດໃຊ້ຖະໜົນໃຫ້ມີຄວາມສະດວກສະບາຍ ແລະ ປອດໄພ ໂດຍມີຕົວຢ່າງຈາກປະເທດຍີ່ປຸ່ນ ອັງກິດ ສິງກະໂປ.
ທີ່ຍີ່ປຸ່ນ: ເລີ່ມແຕ່ວັນທີ 1 ມິຖຸນາ 2015 ເປັນຕົ້ນມາ ກົດໝາຍວ່າດ້ວຍການຈະລາຈອນສະບັບປັບປຸງຂອງຍີ່ປຸ່ນ ໄດ້ມີຜົນບັງຄັບໃຊ້ໃນພາກບັນຍັດ ກ່ຽວກັບການຂີ່ລົດຖີບນັ້ນ ກົດໝາຍໄດ້ກຳນົດໃຫ້ຜູ້ຂີ່ລົດຖີບທີ່ມີພຶດຕິກຳປະໝາດເລີ່ນເລີ້ຈົນອາດກໍ່ໃຫ້ເກີດມີອຸບັດເຫດຂັ້ນຮ້າຍແຮງນັ້ນ ຕ້ອງໄດ້ເຂົ້າເຝິກອົບຮົມຫຼັກສູດດ້ານຄວາມປອດໄພ ເມື່ອສົມທຽບກັບຜູ້ຂັບຂີ່ຍານພາຫະນະທີ່ຂັບເຄື່ອນດ້ວຍແຮງຈັກແລ້ວ ຜູ້ຂີ່ລົດຖີບບໍ່ຄ່ອຍໄດ້ຮຽນຮູ້ ຫຼື ສົນໃຈກ່ຽວກັບກົດຈະລາຈອນພໍເທົ່າໃດ ດັ່ງນັ້ນ ກົດໝາຍຈຶ່ງມີຂໍ້ບັງຄັບໃຫ້ມີການເຝິກອົບຮົມສຳລັບຜູ້ຂີ່ລົດຖີບ ນອກຈາກນັ້ນ ກົດໝາຍຍັງໄດ້ກຳນົດຢ່າງລະອຽດ ກ່ຽວກັບພຶດຕິກຳທີ່ເປັນອັນຕະລາຍສຳລັບຜູ້ຂີ່ລົດຖີບ ເຊິ່ງລວມມີ 14 ຂໍ້ ໃນນັ້ນ ມີ 3 ຂໍ້ ເປັນຕົ້ນຕໍ ຄື ການລະເມີດໄຟອຳນາດ ການຂີ່ລົດຖີບໃນຂະນະມີອາການມຶນເມົາ ການຝ່າຝືນປ້າຍສັນຍານບອກໃຫ້ຢຸດ ກົດໝາຍໄດ້ກຳນົດໂທດອາຍາ ແລະ ໂທດປັບໃໝສຳລັບຜູ້ລະເມີດ ສຳລັບຜູ້ທີ່ມີອາຍຸແຕ່ 14 ປີຂຶ້ນໄປ ທີ່ໄດ້ມີຄວາມຜິດດ້ວຍພຶດຕິກຳປະໝາດເວລາຂີ່ລົດຖີບນັ້ນ ກົດໝາຍໄດ້ກຳນົດວ່າ ຖ້າເຮັດຜິດຢ່າງໜ້ອຍ 2 ຄັ້ງໃນ 3 ປີ ຜູ້ກ່ຽວຕ້ອງໄດ້ເຂົ້າເຝິກອົບຮົມຕາມຫຼັກສູດດ້ານຄວາມປອດໄພ ເປັນເວລາ 3 ຊົ່ວໂມງ ແລະ ເສຍຄ່າທຳນຽມເປັນເງິນ 5.700 ເຢັນ (1 ເຢັນ ປະມານເກືອບ 70 ກີບ) ໃນກໍລະນີຜູ້ກ່ຽວບໍ່ຍອມເຂົ້າເຝິກອົບຮົມຕາມຄຳສັ່ງພາຍໃນ 3 ເດືອນ ມູນຄ່າການປັບໃໝກໍຈະເພີ່ມຂຶ້ນເປັນ 50.000 ເຢັນ ສະຖິຕິອຸບັດເຫດໃນປີ 2014 ຢູ່ຍີ່ປຸ່ນ ຊີ້ໃຫ້ເຫັນວ່າ ຜູ້ຂີ່ລົດຖີບປະສົບອຸບັດເຫດຈົນໄດ້ຮັບບາດເຈັບ ຫຼື ເສຍຊີວິດນັ້ນ ມີຈຳນວນສູງເຖິງ 106.427 ຄົນ 63,77% ຂອງຈຳນວນຜູ້ປະສົບອຸບັດເຫດນັ້ນ ແມ່ນຍ້ອນລະເມີດກົດຈາລະຈອນ ເຊັ່ນ: ບໍ່ປະຕິບັດຕາມສັນຍານໄຟຈະລາຈອນເປັນຕົ້ນ.
ທີ່ອັງກິດ: ຂ່າວຕ່າງປະເທດ ໃນຕົ້ນເດືອນເມສາ 2017 ໃຫ້ຮູ້ວ່າ ລັດຖະບານອັງກິດ ໄດ້ເປີດບັ້ນສົ່ງເສີມການໂດຍສານດ້ວຍການຍ່າງ ແລະ ໃຊ້ລົດຖີບໄປສະຖານທີ່ ທີ່ບໍ່ຢູ່ຫ່າງໄກ ຫຼື ສະຖານທີ່ບ່ອນທີ່ຄຸ້ນເຄີຍ ເຊັ່ນ: ໂຮງຮຽນ ສຳນັກງານ ສະຖານທີ່ໂດຍສານ ເປັນຕົ້ນ ບັ້ນສົ່ງເສີມການຍ່າງ ແລະ ການຂີ່ລົດຖີບນີ້ ແມ່ນຍຸດທະສາດການລົງທຶນທີ່ກະຊວງຄົມມະນາຄົມ ແລະ ຂົນສົ່ງຂອງອັງກິດເປັນເຈົ້າການອອກແບບມາ ໂດຍໄດ້ຕັ້ງຄວາມຫວັງເອົາໄວ້ວ່າ ເມື່ອຮອດປີ 2040 (ອີກ 20 ປີຕໍ່ໜ້າ) ຊາວອັງກິດທຸກໆຄົນຈະມີຄວາມຊິນເຄີຍ ແລະ ຕິດນິດໄສຍ່າງ ຫຼື ຂີ່ລົດຖີບໄປສະຖານທີ່ ທີ່ບໍ່ຢູ່ຫ່າງໄກພໍປານໃດ ແທນການນັ່ງລົດໃຫຍ່ຄືໃນປັດຈຸບັນ ຂ່າວບອກວ່າ ອັງກິດ ມີແຜນໃຊ້ງົບສູງເຖິງ 70,7 ລ້ານໂດລາສະຫະລັດ ສຳລັບໂຄງການສົ່ງເສີມການຂີ່ລົດຖີບໃຫ້ເດັກນ້ອຍ ຈຳນວນ 1,3 ລ້ານຄົນ ໃນທົ່ວປະເທດ ແລະ ປະມານ 280 ລ້ານໂດລາສະຫະລັດ ເພື່ອລົງທຶນເຂົ້າໃນການຍົກລະດັບ ແລະ ກໍ່ສ້າງພື້ນຖານໂຄງລ່າງສຳລັບການໂດຍສານທາງລົດຖີບ ຈາກສອງເລື່ອງທີ່ເລົ່າມານີ້ ກໍພໍສະຫຼຸບໄດ້ວ່າ ລະບົບໂດຍສານທີ່ເປັນສ່ຽວຮັກສ່ຽວແພງກັບສິ່ງແວດລ້ອມແທ້ໆນັ້ນ ກໍຄື ການຍ່າງ ແລະ ຂີ່ລົດຖີບນັ້ນເອງ.